The Definitive Guide to Living in the Capital , Cairo , Egypt

فن وثقافة
المركز الثقافى التركى (يونس إمرة)

المركز الثقافى التركى يونس إمرة: عن الشعر والثقافة واللغة التركية

تم التقييم بواسطة
Ahmed Abd El Gawad
قيم
قيم الآن
المركز الثقافى التركى يونس إمرة: عن الشعر والثقافة واللغة التركية

المكان:

ممكن تعتبره زى أى مركز ثقافى لأى بلد موجود علشان يدعم فكرة الثقافات بين البلدين.. هو ده سبب وجود المراكز الثقافية فى أى بلد وهو مبنى عادى فى الدقى لكنه مجهز بشكل كبير فيه قاعات للعرض وأكثر حاجة فيه مجهزة هى قاعات تعليم اللغة التركية.

 

التركية:

اللغة التركية أصلاً قريبة من اللغة العربية فى المخارج وبعض الحروف.. وفيه حوالى (600) طالب بـ يدرسوا اللغة التركية فى المركز زى ما قال سليمان سيزار رئيس المركز الثقافى التركى بالقاهرة “يونس إمرة”، وكمان فيه فرع جديد هـ يعملوه فى الإسكندرية علشان عدد الطلاب الكبير اللى عاوز يدرس اللغة التركية.. ويمكن ده راجع إلى قرب الثقافتين التركية والمصرية والعلاقات بين البلدين.. يعنى لحد فترة قريبة كانت حلوة.. ولا ننسى أن الدولة العثمانية أصلها تركيا وشوفوا بقى قعدوا قد إيه.. ومصر ولاية عثمانية.. وكام بلد كانت تحت الإمارة العثمانية وده طبعًا عامل كبير فى انتشار الثقافة التركية فى مصر.. وفيه بقى عامل لطيف ثانى لازم ناخد بالنا منه وهو المسلسلات التركية واللى انتشرت تقريبًا على أغلب القنوات المصرية ولاقت إقبال كبير من الجمهور المصرى عليها.. ولا ناسيين “نور ومهند”؟

 

نشاطات المركز:

المركز بـ يهتم بتعليم اللغة فى المقام الأول سواء الترجمة أو الكتابة والقراءة بها والمحادثة.. وكمان بـ يعمل لقاءات تعريفية بالثقافة التركية وفنها وتاريخها علشان يعرف الناس أكثر عليها.. وبـ يعمل رحلات للأماكن السياحية المصرية زى رحلة الفيوم اللى عملوها للتعرف على الآثار هناك.. والجميل فى المركز أنه كمان بـ يحاول يعرف بالثقافة المصرية علشان الطلاب الأتراك اللى موجودين يهتموا بها ويعرفوا يتعاملوا مع المصريين ويقرب نسيج الشعبين من بعض.. وكمان فيه ورش لتعليم الرسم خاصة الرسم على الماء وهو موضوع شيق جدًا ولازم تروح علشان تفهم الموضوع عامل إزاى.. الجميل بقى أن المركز الثقافى التركى فى مصر هو الثالث على مستوى العالم يعنى فتح فى بلدين بس قبل مصر وهما “بوسنة وألبانيا” والأول على مستوى الدول العربية.

 

معهد يونس إمرة:

الفكرة جاية أصلاً من أن المركز مش يبقى بس مجرد مركز ثقافى لكنه معهد تعليمى كبير ومُعتَمد كمان، يعنى لما تأخذ شهادة من هناك هـ تأخذها معتمدة كأنك درست اللغة التركية فى الجامعة.. وهدف المعهد هو نشر اللغة التركية وعمل دورات متخصصة للمعلمين والخبراء وعلماء اللغة التركية.. وكمان بـ يقدم منح للسفر إلى تركيا ويعرف العالم بالثقافة والفن والتاريخ التركى.. وبـ يقدم أفلام وكتب وبـ يدعم الترجمة من التركية وإلى التركية يعنى حاجة شاملة كده.

 

مين يونس إمرة؟

عاش يونس إمرة فى الفترة ما بين النصف الثانى للقرن الثالث عشر والنصف الأول للقرن الرابع عشر وتقريبًا فى الأناضول.. وهو شاعر شعبى ورائد الشعر التركى في الأناضول.. استخدم أسلوب بسيط ولغة فصيحة فى أشعاره.. وأشهر قصائده كانت فى العشق الإلهى وحب الإنسان والعدل والفضل.

يونس إمرة يعتبر من الشعراء الكبار اللى وجهوا رسالتهم للبشرية كلها.. وحب الناس عند يونس جزء من معتقده فى الحياة وفلسفته الشعرية… وفى فلسفة يونس إمرة بـ يستحق كل الناس الحب من غير أى تمييز دينى أو مذهبى أو طبقى أو اجتماعى.. بـ يقول فى قصيدة: “سامح المخلوق من أجل الخالق!”  

نصيحة 360

اقرأ أشعار يونس إمرة أو زور البلوج ده.

أحسن حاجة

التقاء الثقافتين المصرية والتركية فى مكان واحد لأنه بـ يهتم بتعليم الثقافتين.

أسوأ حاجة

المكان مش نشيط على مواقع التواصل الاجتماعى كثير وده ضده.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح