The Definitive Guide to Living in the Capital , Cairo , Egypt

فن وثقافة
المطرح فنون وثقافة – El Matrah Art & Culture

المطرح فنون وثقافة: بيتك ومطرحك

تم التقييم بواسطة
Ahmed Abd El Gawad
قيم
قيم الآن
المطرح فنون وثقافة: بيتك ومطرحك

المطرح:

زمان كانت الناس الجميلة لما تقابل حد فى بيتها وعاوزة تحسسه بأنه فى بيته تقول له: “اتفضل بيتك ومطرحك” فـ يحس الضيف أنه قاعد فى بيته، فـ يأخذ راحته، ودى كانت من أدبيات الضيافة زمان.

 

أدبيات:

لما زورنا المطرح لاقيناهم زى الناس زمان برضه.. بـ ينفذوا عملى فكرة “بيتك ومطرحك”، بـ يخلوك تحس أنك صاحب مكان يعنى مش فى بيت غريب ولا حاجة.. هما شايفين أن المكان مش مجرد مركز ثقافى متخصص فى الفنون وتعليمها، لكنه مكان للراحة فى المقام الأول، راحة المستفيد وعمل حالة من التوافق الاجتماعى والفكرى والنفسى للمتدرب والزائر، هو ده اللى بـ يحاولوا يعملوه، علشان كده بـ يتم اختيار الموسيقى ونسبة الإضاءة على حسب نوع الورشة أو المحاضرة اللى بـ تتم فى المركز.

 

المركز:

لما زورنا المكان قابلنا د. سميحة تهامي وهى معيدة فى كلية تربية فنية وعرفنا منها أن المكان ملك د. أحمد عبد الغني اللى بـ يدرس فى كلية التربية الفنية، وكمان معاه شريكه أ. أيمن أبو دومة الفنان التشكيلي.. والمركز قائم على فكرة مهمة جدًا وهى طرح الثقافة البصرية للجمهور وتنميتها، وتعريف الجمهور فكرة العمل الفنى وأسسه الجمالية والفكرية والفلسفية.. وعلى أى أساس بـ يتم تقييم الأعمال الفنية.

 

الفنية:

الفنية هنا هى القيمة اللى بـ يقدمها المكان.. وهى قائمة على فلسفة المكان وده باين من الأعمال اللى على الحائط من إبداع د. أحمد عبد الغنى والفنان أيمن أبو دومة، وجذب نظرنا معرض د. أحمد اللى قائم على فكرة فلسفية عبارة عن نظرة على الطبقة الفقيرة ومحاولة لإخراج الجماليات فيها.

 

الجماليات:

المكان بجد جميل، عبارة عن شقة كبيرة فيها مكان مفتوح للورش والرسم وفيه غرف ثانية للمتدربين.. ومكتبة كبيرة فيها كتب متنوعة عن النقد والفن والسينما وتاريخ الفن والموسيقى، والجماليات النفسية من أهم الحاجات فى المكان لأنهم بـ يحاولوا دائمًا يخلوك فى حالة نفسية ومزاجية عالية، وده طبعًا مرتبط بالفن زى ما فهمنا من القائمين على المكان، لأنهم بـ يحاولوا يعملوا توعية بنشر المفهوم الجمالى وتوصيل معلومة أن الفن التشكيلى مش مجرد رسومات، لكنه حالة ولها أبعاد فلسفية وفكرية زى فكرة البيت القديم اللى جمالياته مش فى رسمه لكن فى التاريخ اللى عدى عليه والذكريات اللي مخزنها، وزى لعبة الضوء واللون وانعكاس الرسوم على النفس البشرية.

 

الرسوم:

فى النهاية كل حاجة بـ تدور حول ثقافة الرسوم والبصر وعلشان كده هما بـ يعملوا فعاليات كثير زى الدورات والورش التدريبية فى “التصوير، الرسم، النحت، الخزف، الفوتوغرافيا، السلك سكرين”، وبـ يعملوا حلقات نقاشية لتبادل الخبرات فى الفنون التشكيلية والمسرح والأدب، وحلقات لقراءة ونقد الأعمال الفنية، وعروض الأفلام السينمائية وفتح الحوارات فى التذوق الفنى، وكمان الزيارات المتحفية اللى بـ يعملوها بالتزامن مع الورش المختلفة.


المطرح روح وجمال وفن وراحة وثقافة وزيارات ومتعة بصرية وحلقات نقاش.

نصيحة 360

زور الجروب بتاعهم على الفيسبوك.

أحسن حاجة

تعدد الأنشطة الفنية فى المكان.

أسوأ حاجة

المكان دون يافطة فى الخارج، الاستمتاع بالقراءة لو أنت مشترك فى الورش فقط.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح