The Definitive Guide to Living in the Capital , Cairo , Egypt

“كليم”
اسم جديد وقوى فيه من التراث كثير جدًا، وفيه سحر خاص، وأنك تختار الاسم ده لدار
نشر معناه أنك بـ تحبه جدًا أو مرتبط بالتراث جدًا، ونقول لكم ليه التراث، لأن
“كليم” على طول بـ تروح بك لكليم الله وهو سيدنا موسى عليه السلام.

أو بـ تروح بك لمعنى خاص عند صاحب الدار وهو قصيدة “صمت
الكليم”، إحنا النهاردة بـ نتكلم عن دار كليم لصاحبها الشاعر أحمد بخيت،
وعنده قصيدة طويلة اسمها صمت الكليم بـ يقول فيها:

فاتحة..

سألتها في حنوٍ..

هل تدخلين الجنة؟

فأجابت بوقار نبيل..

عندما أقف أمام الله – جل جلاله –

سأتقبل عطاياه برضا تام

دون أن أطالبه بأي تعويض عن عذابي!

1

هناك

ولا هناك هناك

كانت تقطف الأضواء

ولم تكن الطبيعة قد

تراءت -بعد- في الأسماء

مشى حزن إلى حزنٍ

وماء في اتجاه

الماء

ده جزء من القصيدة الطويلة اللى كانت سبب لتسمية الدار
بالاسم ده، لكن هل الدار مجرد دار نشر؟

خالص طبعًا، إحنا بـ نتكلم عن مركز ثقافى متكامل عنده
عدد كبير من المشروعات الثقافية والبحثية، لكنه الآن بـ يركز على النشر والندوات
الثقافية وحفلات التوقيع اللى بـ تتعمل هناك.

مبدئيًا فيه كل يوم سبت فى “كليم” أمسية شعرية
غنائية متكاملة، هـ تلاقى شعراء من كل التوجهات فيهم الفصحى وفيهم العامية واللى بـ
يكتب نثر وعمودى وتفعيلة، يعنى تركيبة لطيفة تستمتع لما هـ تحضر تسمعهم، وكمان هـ تلاقى
عازف عود أو مغنى بـ يدندن جنبك أو على المنصة بأغانى من التراث أو أغانى مختلفة لها
طابع خاص.

المكان موقعه جديد على المراكز الثقافية اللى كانت فى
فترة قريبة بـ تتركز فى وسط البلد، لكن بدأت الفكرة دى تختفى من على خريطة توزيع
الأماكن الثقافية فى مصر يعنى أصبح عندنا أماكن فى الزمالك والمعادى والهرم
والمهندسين.

ومركز كليم الثقافى فى المهندسين تحديدًا فى شارع أحمد
عرابى عمارة رقم 7 من تجمع عمارات البترول، ولما تطلع المكان هناك هـ تلاقى أكثر حاجة
بـ تميزه أنه بسيط فى تصميمه لكنه فى الوقت نفسه مريح، لأنه معمول من غير تكلف،
يعنى هـ تلاقى ركنة على اليمين لكبار الضيوف، ومكتب صغير فى الواجهة، وأمامه عدد
متوسط من الكراسى للجمهور، وفى الخلفية لوحة كبيرة عليها صور عدد كبير من الأدباء
والشعراء والمفكرين زي: طه حسين وأحمد عبد المعطى حجازى ومحمود درويش، وطبعًا
الشاعر أحمد بخيت ما نسيش يحط صورته.