The Definitive Guide to Living in the Capital , Cairo , Egypt

متحف الفن الإسلامي

متحف الفن الإسلامي: عرض تاريخي للحضارة الإسلامية

تم التقييم بواسطة
Callie Wallace
قيم
قيم الآن
متحف الفن الإسلامي: عرض تاريخي للحضارة الإسلامية
أخيراً تم إعادة فتح متحف الفن الإسلامي في سبتمبر 2010 بعد ما كان مغلق للتجديدات لمدة 8 سنين وإتكلف حوالي 10 مليون دولار، والنتائج جات مبهرة والقاهرة كسبت متحف جديد في الشكل والمضمون؛ نتيجة فعلاً تستحق الإنتظار. مشروع التجديد كان ضخم جداً وإجتمع فيه معماريين مصريين وأجانب وفنانين ومتخصصين ترميم وتصميم متاحف. المشروع الهائل اخرج المتحف بشكل رائع من جوة وبرة، بقت زيارته تجربة فريدة ومن الصعب تلاقي زيها في القاهرة.

قبل ما نلقي نظرة على القطع الأثرية في المكان لفت نظرنا الديكور الداخلي والسقف والشبابيك العالية واللون الرمادي في أزرق للحوائط والأراضيات الرخامية اللامعة والإضاءة الجيدة، كل ده مخلي المتحف  مختلف عن متاحف كتير في القاهرة غالباً ما بـ تكون زحمة (أو مهجورة تماماً) وإضاءتها مش كافية. وبالرغم من الحشود اللي داخلة وخارجة من غرف العرض مصريين وسياح إلا أن المكان محافظ على هدوءه  ونظامه.

المتحف بـ يضم مجموعة من أروع  وأهم الفنون والقطع الأثرية الإسلامية في العالم، تم تجميعها من الشرق الأوسط وبلاد تانية، من أيام الخلافة الأموية لحد الإمبراطورية العثمانية. المعروضات تم  تقليل عددها لـ1700 قطعة أثرية بعد ما كانت حوالي 10000 قطعة قبل التجديد، بس عملية الفرز دي تمت بشكل إيجابي لصالح المتحف.

في الغرفة اللي بعد المدخل مباشرة في لوحات توضيحية مكتوب عليها معلومات عن كل عصر من عصور الخلافة الإسلامية: «الأموي» و«العباسي» و«الفاطمي» و«الأيوبي» و«المملوكي» و أخيراً «العثماني». كل لوحة عليها خريطة بـ توضح توسعات الدولة وحدودها في شمال أفريقيا والشرق الأوسط ومعلومات عن أفراد العائلة الحاكمة ونسلهم وإنجازات الحكام وإسهاماتهم المعمارية والفنية، (ويذكر ان الكتابة بالإنجليزية ما كانش فيها أي غلطات إملائية أو نحوية، ودي مشكلة في متاحف كتير في مصر).

المتحف مقسوم جناحين، الجناح الشِمال فيه خامات من جميع أنحاء العالم الإسلامي: قطع نسيج، سجاد، شبابيك خشب، مشربيات، خزفيات وفي أدوات كانت بـ تستخدم في الجراحة و أزايز عطور صغيرة. الجناح ده متنظم زمنياً حسب قِدم وحداثة الحاجات وحسب خامات القطع المعروضة. كل قطعة أثرية مكتوب تحتها الخامة المصنوعة منها والفترة اللي إتعملت فيها في التاريخ الإسلامي. ومن أجمل المعروضات نافورة رخامية بـ ترجع للقرن الـ 15 الميلادي لدولة المماليك ودي تم ترميمها مؤخراً عشان يبان ألوانها البراقة وتصميمها الفريد.

الجناح التاني على اليمين بـ يضم القطع الأكبر حجماً اللي متاخدة معظمها من آثار القاهرة القديمة.

ممكن تخرج من المتحف من آخر الناحية اليمين للمبنى وبعد بوابة الخروج في ساحة مفتوحة وفيها المبنى الإداري بتاع المتحف. وعلى فكرة المتحف مؤهل للزوار على كرسي متحرك.

نصيحة 360

المتحف بـ يفتح كل يوم من 9 الصبح لـ4 العصر وموجود في منطقة باب الخلق بس المدخل الرئيسي على شارع بورسعيد. أسعار التذاكر 50 جنيه للأجانب، 25 جنيه للطلبة الأجانب، 2 جنيه للمصريين.

أحسن حاجة

المبنى نفسه وتصميم المتحف جذاب جداً، الخبرة والإبداع  والتمويل عاملين نتائج مذهلة وهـ تشوف ده بـ عينيك.

أسوأ حاجة

رسم الدخول غالي شوية للأجانب، بس المكان يستاهل.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح