The Definitive Guide to Living in the Capital , Cairo , Egypt

مركز طلعت حرب الثقافي

مركز طلعت حرب الثقافي: مكان فى الخيال

  • 1 شارع السيدة نفيسة - حي زينهم - أمام مستشفى المغربى للعيون
  • رقص وإستعراضات
  • 0223628174,0223622647
تم التقييم بواسطة
Samah Nageh
قيم
قيم الآن
مركز طلعت حرب الثقافي: مكان فى الخيال

فى حى زينهم بالسيدة
نفيسة كان فيه مكان زمان اسمه “مكتبة طلعت حرب”.. المكتبة دى ما كانتش
مجرد مكتبة بـ تفتح أبوابها كل يوم للقراء علشان يقرأوا كتاب أو يستعيروه أو محدش
ييجى خالص. صدقونا لو قلنا لكم أن المكتبة دى غيرت حياة الناس فى حى زينهم، الحى
البسيط اللى سكانه ما كانوش يعرفوا يعنى إيه معرض فوتوغرافيا أو يعنى إيه معرض فن
تشكيلى أو مسرح أو شعر أو.. إلخ.

طبعًا أهل زينهم عمرهم ما
فكروا يدخلوا المكتبة دى غير لما صحيوا فى يوم لقوا إعلانات ملصقة على منازلهم بـ تعلن
عن مهرجان شعرى هـ يحضره شعراء كبار وفنانين معروفين، طبعًا الناس راحوا يشوفوا الفنانين،
ولما راحوا شافوا حاجات كثير فى الدنيا غير الفنانين، ومع الوقت بدأ الأهالى
يشوفوا الإعلانات ويروحوا يحضروا أو يبعثوا أولادهم يمكن يكونوا فى يوم من الأيام
زى الفنان فلان أو الشاعر فلان.

الجميل أن اللى فكر فى
الفكرة دى مجموعة شباب أسسوا جماعة أدبية وكان من أهداف الجماعة دى توصيل الأدب
والفنون للإنسان البسيط وساعدهم فى تحقيق الفكرة مديرة المكتبة الأستاذة إيمان عبد
المحسن.

ولما نشاط المكتبة زاد ونجحت
فى جذب الجمهور البسيط، قرر صندوق التنمية الثقافية أنه يمد المكتبة بآليات جديدة
تتناسب مع كم الجمهور وغيروا اسم المكتبة من “مكتبة طلعت حرب” إلى “مركز
طلعت حرب الثقافى”.

فى مركز طلعت حرب هـ تلاقى
كل شيء يساعدك على الإبداع لو أنت حبيت فى يوم أجازتك تقضى يوم ممتع مع أصدقاءك أو
أولادك أو مع نفسك اللى لازم تهتم بها شوية زيادة وتغذيها بالمعرفة وممكن تحضر عرض
مسرحى أو تكون أنت بطل العرض لو عندك موهبة التمثيل واشتركت فى فريق المسرح الخاص
بالمركز.

لو ابنك أو بنتك أو أنت
شخصيًا عندك موهبة ممكن تلاقى هناك طريق صحيح لتنمية الموهبة دى لأنك هـ تلاقى ورش
فنية للأطفال وللكبار وورش فى التنمية البشرية وورش لتعليم الغناء والعزف على الآلات
الموسيقية ومسابقات فى جميع الفنون والأنواع الأدبية وأنشطة ثانية كثير ممكن
تعرفها لو قمت بزيارة لمركز طلعت حرب الثقافى.

أجمل شيء فى المركز أن كل
نشاط له مكان خاص به وده بـ يسمح بممارسة أنشطة كثير فى نفس الوقت لأن فيه قاعة
للاطلاع خاصة بالأطفال وقاعة اطلاع للكبار وقاعة لممارسة الهوايات المختلفة وقاعة
ندوات وقاعة عرض سينمائى وفصل تعليمى وقاعة لتعليم الحاسب الآلى وقاعة معارض ومسرح
مكشوف ومسرح مغلق.

ولو أنت من اللى بـ يحبوا
القراءة الإلكترونية هناك هـ تلاقى قاعة للكتاب الإلكترونى. طبعًا عاوزين تسألونا
عن رسوم الورش وتكلفتها هـ تتفاجأوا لما نقول لكم أن مافيش أى رسوم غير الاشتراك
السنوى للمكتبة.

أه.. نسينا نقول لكم أن
فى المركز حديقة جميلة جدًا ممكن تساعد أى حد على الإبداع فيها هدوء وجمال إلهى. ولو
عاوزين تعرفوا مواعيد الورش والمعارض ممكن تتصلوا بالمركز وهما هـ يمدوكم بكل
التفاصيل.

نصيحة 360

على فكرة أسهل طريقة للوصول هناك هى المترو، بجد ما تفوتش استفادة كبيرة هـ تكلفك مجهود بسيط، ومش استفادة فقط.. ده استمتاع كمان.

أحسن حاجة

لما تزور المركز هـ تحس بجو مصر القديمة لأن أجواء المنطقة هـ تأخدك لزمان، يعنى ممكن تحس أنك داخل كتاب تاريخ مرسوم مش مكتوب فقط.

أسوأ حاجة

ممكن يكون المكان بعيد على ناس كثير.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح