The Definitive Guide to Living in the Capital , Cairo , Egypt

مكتبة مصر العامة

مكتبة مصر: جنة كتب حقيقية ومكان مريح للأعصاب في الجيزة

  • 4 شارع جمال حمدان (الطحاوية)، متفرع من شارع النيل
  • مراكز ثقافية
  • 3336029102,3749692802,3336029302
  • يوميًا من 10 ص: 6 ع، ماعدا الثلاثاء فقط
تم التقييم بواسطة
Rehab Loay
قيم
قيم الآن
مكتبة مصر: جنة كتب حقيقية ومكان مريح للأعصاب في الجيزة

ساعات بـ تحس أنك محتاج مكان جديد تتردد
عليه بانتظام ويكون ملجأ لك لما تحب تنفرد بنفسك، وتفكر بهدوء، وتحس أنك بجد بـ
تستجم عقليًا، وبـ ترمم دماغك من كمية الضغوط والمشاكل اللي بـ تواجهك في كل
دقيقة، إحنا نعرف مكان كده اسمه “مكتبة مصر”، المكتبة دي في الدقي لكنها
معزولة بشكل عجيب عن الدوشة، وموقعها بـ يطل على النيل مباشرة، وكل حاجة فيها
لونها أبيض، والناس اللي شغالة فيها بـ تحافظ على الهدوء، وبـ تحب شغلها، ولما
تروح هناك بجد هـ تتبسط ومش هـ تندم أنك رحت.

المكتبة ممكن تروح لها بثلاث طرق من ثلاث
اتجاهات، لو أنت في الجيزة، تعالى عند مديرية أمن الجيزة، ومن هناك هـ توصل بسرعة
في ثواني، وهـ تلاقي يافطة على أول الشارع بـ تقول لك أن المكتبة موجودة، ولو أنت
في الدقي عندك طريقتين تروح بهم: إما أنك تدخل شارع النيل اللي على أوله الشيراتون
وتتمشى وسط المنظر التحفة اللي هناك على النيل، أو تدخل الشارع اللي فيه مجلس
الدولة ومدرسة الأورمان اللي بـ يوصل لك على مديرية الأمن وهـ تلاقيه في السكة برضه…
أنت وراحتك.

كان اسمها قبل الثورة “مكتبة
مبارك العامة” ولها فروع في دمياط والزيتون، وتم تغيير اسمها إلى “مكتبة
مصر” بعد الثورة، لكن سيبك أنت من الاسم أهم حاجة المضمون، وفعلاً المكتبة من
الداخل تحفة، مكونة من أربعة أدوار وجنينة، الجنينة فيها أماكن للقعود، علشان لما
تستعير كتب وتحب تقرأها قبل ما تمشي في المكتبة تقدر تقعد وتستمتع بالمشهد حولك، أما
المكتبة نفسها ففي الدور الأرضي هـ تلاقي شئون الاستعارة والاشتراكات والدفع
والمعاملات، والإعلانات عن الندوات.

وفي الدور الأول هـ تلاقي الكافيتريا
وقسم القراءة للكبار، كتب رصينة ومهمة في كل المجالات، مقسمة وتقدر تتبع الكتاب،
وكمان فيه مراجع ضخمة جدًا وقواميس قديمة وضخمة برضه، ودي مش للاستعارة، للاستخدام
الداخلي لكن مهمة، ومنها حاجات نادرة وغالية جدًا المكتبة هـ تسعفك فيها.

في الدور ده هـ تلاقي كافيتريا ممكن
تدخل تقرأ داخلها وتشرب أو تأكل حاجة وأنت بـ تقرأ، والكافيتريا دي ميزتها أن فيها
كل أنواع الجرائد والمجلات اللي ممكن تخطر على بالك من أول الأهرام لحد الفجر، ومن
أول روزاليوسف لحد النيوزويك النسخة العربي، وفي الدور ده كمان هـ تلاقي أجهزة
كمبيوتر مظبوطة على أنك تقدر تعمل بها بحث عن اسم الكتاب اللي أنت عاوزه، ويقول لك
مكانه، وعدد النسخ المتوافرة منه، أو تبحث عن كاتب معين وعدد الكتب المتوفرة له.

في الدور الثاني متعة خاصة، ده بقى دور
الأطفال، والشباب، دور حلو جدًا، كله قصص وروايات، قصص عالمية وكتب عن حاجات كلنا
بـ نحبها، إحنا تحديدًا من عشاق ركن قصص الرعب والأشباح ودي هـ تلاقي على الرف
بتاعها قصص صرخة الرعب، وقصص دكتور أحمد خالد توفيق أسطورتنا.. كمان هـ تلاقي كل أعمال
أجاثا كريستي، والروايات العالمية.. بجد متعة.

علشان تشترك في مكتبة مبارك لو أنت صغير
سنك أقل من 18 سنة هـ تدفع 16جنيه ونص ثمن الاشتراك واستمارة العضوية وهـ تحتاج صورتين
شخصيتين وصورة من شهادة الميلاد، أما لو كنت أكبر من كد فـ هتحتاج 31 جنيه ونصف ثمن
العضوية واستمارة الاشتراك، وصورة بطاقتك وصورتين شخصيتين لك، والاشتراك بـ يستمر
لمدة سنة كاملة، تقدر خلالها تستعير خمسة كتب كل ما تروح المكتبة وتستعير غيرهم
بشرط أنك ترجعهم قبل مرور أسبوعين كاملين، لكن لو عجبك الكتاب قوي وحابب تكمله في
البيت ممكن تجدد الاستعارة من خلال التليفون وتكمل الاستعارة أسبوعين كمان،
وترجعهم وتأخذ غيرهم وهكذا.

نصيحة 360

المكتبة مثالية جدًا للطلبة في الأجازات، وهي فعلاً بـ تكون زحمة في فترة الصيف، ومثالية أكثر للناس العادية في الشتاء، تروح هناك وتعيش يوم مختلف مع نفسك في هدوء وتركيز، صدقنا هـ تحس أنك غسلت وعيك، وفوقت وقادر تكمل.. المكتبة مفتوحة كل أيام الأسبوع من 10 الصبح لحد ستة بعد العصر، ماعدا الثلاثاء فقط.

أحسن حاجة

المشهد اللي هـ تشوفه من الدور الرابع لما تبص وتشوف النيل ومصر كلها، مشهد رائع يستحق تروح وتشوفه من هناك.

أسوأ حاجة

أن مافيش إنترنت Wi-Fi، ومش متاح لك أنك تستخدم الفيش بتاعة المكتبة في تشغيل اللاب توب بتاعك ودي مسألة تضايق فعلاً.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح