The Definitive Guide to Living in the Capital , Cairo , Egypt

في وسط الحر وفرهضة اليوم أكيد
لازم نعمل حاجة بـ نحبها علشان نخفف من علينا الإحساس بالتعب والخنقة من زحمة
الطريق أو من المشاكل اليومية، كايرو360 عندها اختيارات كثيرة في الحالة دي، لكن
أكيد ما حدش يقدر يمسك نفسه أمام إغراء “بولة آيس كريم”.

بعد ما تخلص كوبري الجامعة وتستعد
لدخول شارع المنيل متجه لميدان الباشا هـ تلاقي آيس كريم «أبولو – Apollo» موجود على ناصية على اليمين وأمامه حلويات «لابوم – La Pomme» واخد ناصية برضه، المحل لونه
أزرق في فضي وعليه فواكة مجسمة ومنورة حول باب الدخول.

المحل مساحته صغيرة فيه ثلاجة آيس
كريم فيها حوالي 20 نوع أو نكهة، وراء الثلاجة رف كبير عليه حجمين بسكويت وعلب كرتون،
ولو مش لك في الساقع ممكن تطلب من عندهم كابتشينو أو شوكولاتة ساخنة أو إسبريسو اللي
بـ يحضرها على الرف وراءه، كمان فيه ثلاجة على إيدك الشمال أول ما تدخل فيها
تورتات آيس كريم بأحجام مختلفة.

مكتوب على المحل بره أن الآيس
كريم بتاعهم من موفنبيك، لكن كمية التنوع في الأنواع خلتنا نشك، سألنا فـ عرفنا أن
زمان كانوا بـ يجيبوه من عندهم، لكن دلوقت هم اللي بـ يصنعوا الآيس كريم الخاص بهم
وأن اللي مكتوب على الباب وكمان في المنيو بتاعهم قديم.

أول ما بـ تدخل ممكن تسأل الولد
اللي بـ يساعدك على الأنواع المتاحة، هـ يجاوبك بكل ترحاب ويبدأ يمسك ملعقة ملونة
صغيرة ويذوقك من كل صنف خاصة غير المألوف منها، وكل صنف بـ تذوقه بمعلقة لوحدها،
وفي الآخر بـ تلاقي أنك عملت جبل ملاعق صغيرة في الطبق الشفاف اللي فوق الثلاجة،
لكن المحل ما عندوش مشكلة المهم تذوق وتحدد أنت عاوز إيه، الأنواع هناك: فانيليا
كروكنت، شوكولاتة كروكنت، قرفة بالبلح، بتر سكوتش، مستكة بالفستق، بتربيكان (عين
جمل)، بينتس بتر، برلينية (زبدة الفستق)، وغيرها إلى جانب الأصناف العادية
المعروفة.

عامة من زياراتنا المتكررة هناك
الأصناف كلها ما تتخيرش عن بعض، كلها فريش وطعمها رائع ومختلف عن الآيس كريم
العادي، كمان لما تيجي تأكله فيه أصناف بـ “تمط” معاك ودي حاجة رائعة
جدًا، سعر البولة 6 جنيه بدون الإضافات (صوص شوكولاتة أو مكسرات)، ولما بـ تقرر هـ
تأخذ إيه بـ يلف لك طرف البسكويت بورق فضي عامل زي الفويل علشان ما يحصلش “لغوسة”
وبـ يحط لك ملعقة طويلة جدًا علشان تأكل بها، وساعات ممكن يحط لك ديكور فوق البولة
شمسية ورق ملونة لزوم الدلع.

أسعار التورتات بـ تتراوح من 40
لحد 130 جنيه على حسب الحجم، وأصنافها زي اللي بـ يقدموه مع الإضافة طبعًا، و”أبولو”
عنده خدمة التوصيل للآيس كريم والتورتات حتى لو المكان بعيد (لأن المنيل الفرع
الوحيد) لكن عندهم نظام أن عليك أجرة التاكسي (تضاف على الطلب) والراجل رايح لك،
في حين أن تكلفة التاكسي والراجل راجع المحل عليهم هم. وسعر المشروبات الساخنة بـ
يبدأ من 6 لحد 15 جنيه، وجنب ماكينة المشروبات فيه سماعات كبيرة ومشغل مزيكا لكن
وقت لما رحنا كان المحل هادئ، وده كان نفس إحساسنا لما خلصنا بولة الآيس كريم
بتاعتنا.