The Definitive Guide to Living in the Capital , Cairo , Egypt

إيتوال

إيتوال: حلواني مميز وقعدة زحمة في وسط البلد

تم التقييم بواسطة
Mostafa Fathi Abdelfadil
قيم
قيم الآن
إيتوال: حلواني مميز وقعدة زحمة في وسط البلد

إيتوال في الأصل محل حلواني، مقره في وسط البلد أمام دار القضاء العالي مباشرة، لكن في الدور الثالث من المبنى فيه كافيه مخصوص للناس اللي حابة تاكل حلويات ومخبوزات داخل المكان، أول حاجة حسينا بيها لما طلعنا الكافيه هي أن المكان زحمة جدًا والصوت عالي، كمان أن التدخين مش ممنوع في المكان فدي كانت حاجة مزعجة جدًا بالنسبة لنا ومع ذلك قررنا نخوض التجربة للنهاية.

المكان ديكوره بسيط، وبيطل على منظر واضح لدار القضاء العالي، الترابيزات من الخشب والكراسي حديد، وأنت داخل على الشمال هتلاقي مكان عمل تحضير الحلويات والمخبوزات، وبجانبه الكاشير، وعدد الترابيزات كتير، وده له عيب وحش أنك هتلاقي صعوبة أثناء التحرك في المكان، يعني ما كناش عارفين نوصل للترابيزة اللي هنقعد عليها بسهولة من كتر زحمة الترابيزات وعدم تنسيقها بشكل مريح، ومن الحاجات الإيجابية أن العالمين في إيتوال مبتسمين وأسلوبهم حلو.

المنيو بينقسم لحلويات، مخبوزات، ومشروبات، فاختارنا من منيو الحلويات شوكليت كيك (19 جنيه)، نقدر نقول أنها كانت حلوة قوي، معمولة بشكل محترف وهي أكتر حاجة بتميز أيتوال بصفة عامة، كيك شوكولاتة وعليها طبقة غنية من الشوكولاتة الحلوة، وعليها من فوق فصوص شوكلاتة مقرمشة وخفيفة، طعمها كان مميز عيبها الوحيد أنها كانت ساقعة جدًا. من منيو الحلويات اختارنا كمان اختراع في إيتوال اسمه "تورت الكنافة" (35 جنيه)، عبارة عن كنافة مستديرة حجمها صغير وعليها كريمة بالكريز، ومحشية مربى فراولة التورت شكلها حلو جدًا لكن طعمها ما عجبناش، السكر مش مضبوط والكنافة ناشفة شوية، ومربى الفروالة كانت كميتها قليلة جدًا لدرجة أننا ماحسناش بيها.

من منيو المشروبات اختارنا موز باللبن (14 جنيه)، اتقدم لنا بشكل كويس، وكان طازة، وسكره مضبوط، يمكن العيب الوحيد أن الكاسات اللي بيتقدم فيها تصميمها صغير وبيخلي كمية العصير قليلة.

من منيو المخبوزات طلبنا باتيه بالجبنة (6 جنيه ونصف) كان طازة وسخن جدًا والعجينة معمولة صح، وكمية الجبنة معقولة، الحقيقة أن الباتيه أكتر حاجة خلتنا نستمتع في إيتوال، خصوصًا وأنت بتاكلها مع شاي إيتوال المضبوط (4 جنيه).

نهينا القعدة بأرز باللبن بالبسبوسة، (6 جنيه) الطعم كان هايل ولسه خارج من الفرن طازة، قطع البسبوسة كانت حلوة وسخنة هي كمان وده خلاها شبه سايحة على الأرز والطعم النهائي كان حلو.

تجربتنا في إيتوال كانت مميزة بغض النظر عن أن المكان زحمة، ودخان السجائر كان مخلي الوضع صعب.

نصيحة 360

المكان بيوفر إنترنت مجاني.

أحسن حاجة

الشوكليت كيك وباتيه الجبنة.

أسوأ حاجة

عدم وجود مكان مخصص للمدخنين.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح