The Definitive Guide to Living in the Capital , Cairo , Egypt

حلواني التيسير

التيسير: حلويات شرقية وآيس كريم في رمسيس

  • 34 شارع عماد الدين
  • مخبوزات وحلويات
  • 0225778835
تم التقييم بواسطة
Waleed Abuarab
قيم
قيم الآن
التيسير: حلويات شرقية وآيس كريم في رمسيس

في ميدان رمسيس وقبل مسجد الفتح وعلى نفس الصف بتاعه فيه محل كبير واخد
ناصية من شارع رمسيس وناصية من شارع عماد الدين ولمباته منورة بألوان الأحمر
والأزرق مكتوب عليه «حمدي علي» بخط كبير وتحتها بخط صغير مكتوب «حلواني التيسير».
مش عارفين ليه المحل ممكن يكون له اسمين لكن المهم أن منتجاته تكون كويسة. ويكون
يستاهل الموقع الحيوي اللي هو فيه؛ هـ يكون فين أفضل من ميدان رمسيس أزحم مكان في
العالم!

المحل مشهور بالحلويات الشرقية والمخبوزات والآيس كريم، فيه جاتوهات وتورتات
وحلويات غربية لكن من البداية بـ نقول لكم بلاش الجاتوه من هناك، لأن الدستة بـ 24
جنيه، يعني تقريبًا ربع ثمنها في أماكن ثانية معروفة وممكن طعمها يبقى صدمة لأي حد
متعود على «لابوار» أو «لو كرنفال». خلينا في الحلويات الشرقية.

واضح أن 12 هو الرقم المفضل لأصحاب المحل، لأن كيلو أي حاجة بـ 12 جنيه؛
بسبوسة، كنافة، بلح الشام، لقمة القاضي، جلاش، كيك، هريسة وبسيمة، كله بـ 12 جنيه،
حتى كيلو الحلويات المشكلة بـ 12 جنيه، الموضوع بسيط جدًا عند «حمدي علي».

الكيلو المشكل الأصناف فيه بـ تبقى محددة، ممكن تبقى غلس شوية وتقف جنب
الشخص اللي بـ يحضر لك الطبق وتطلب منه يقلل من صنف ويزود في غيره، إنما مش هـ
ينفع تضيف صنف مش موجود في الكيلو أصلًا. ولازم نقول أن العلبة اللي بـ يتقدم فيها
الحلويات بـ تبقى شكلها شيك وأحسن من اللفة التقليدية بالأطباق الكرتون والورق
السوليفان اللي بـ تقدم فيه معظم المحلات حلوياتها.

الطعم بقى روعة، السكر مش قليل ولا كثير، مظبوط جدًا ودي أهم حاجة بـ تفرق
حلواني عن الثاني. الجلاش بالكريمة هو الأفضل وبعده تيجي الكنافة بالمكسرات
والبسبوسة، السمن المستخدم مش بلدي صافي لكن بالنسبة لنا ده كان أحسن علشان ما
يبقاش ثقيل ودسم قوي. بلح الشام خطير وصوابع زينب تحفة والمهلبية الفرن اختراع.
الحقيقة أن الناقد كاتب المقال ده مش مدمن حلويات شرقية لكن «حمدي علي» غير فكرتنا
عن الحلويات الشرقية اللي مرتبطة في ذهننا بالشربات المعسل والسمن البلدي الثقيل
وتلزيق السنين، بالنسبة للأصناف اللي تكلمنا عليها الموضوع ما كانش كده خالص.
يمكن أقل حاجة في الطبق المشكل ده هي الزلابية وكيك الباباز بالشربات، الأولى
ما كانتش فريش زي باقي الأصناف، والثانية كانت معسلة قوي لدرجة تميع النفس.

ثلاجة الآيس كريم الموجودة خارج المحل فيها المذاقات الأساسية فقط، فواكة
وشوكولاتة وزبادي وفانيليا وموكا، البولة بـ 2 جنيه، وطعمه حلو قوي وهـ يفكرك
بالمحلات الموجودة على طريق البحر في الإسكندرية، دائمًا فريش والبسكويت مقرمش
ولذيذ.

حلواني «التيسير» لصاحبه “حمدي علي” ممكن يبقى اختيار كويس لو
نفسك في حتة بسبوسة وكنافة وأنت معدي من وسط البلد، أو عاوز تجيب هدية وأنت رايح
زيارة لبيت حد، طبق الحلويات المشكل دائمًا فكرة ظريفة.   

نصيحة 360

المحل له 4 فروع 3 منهم في شبرا، وده الفرع الوحيد اللي في شارع عماد الدين، حدود شبرا من ناحية رمسيس برضه.

أحسن حاجة

حلويات شرقية نموذجية.

أسوأ حاجة

أكيد الجاتوه والحلويات الغربية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح