The Definitive Guide to Living in the Capital , Cairo , Egypt

الشيخ زايد مش هـ تبطل تفاجئنا بالأماكن الجديدة والجامدة جدًا، مافيش مكان هناك وحش، أماكن تجمع لكافيهات مطاعم كثيرة أحدثها هو "داون تاون" اللى هـ نكتب لكم عن الأماكن اللى فيه الأيام الجاية.

موجود جنب بنزينة Total في الشيخ زايد، من أول الأماكن اللى زرناها هناك "الفرن – El Forn" واللى عرفناه من خلال صفحته على الفيسبوك وكمان موقعه على الإنترنت اللى شدونا بصور المخبوزات والحلويات اللى فيها، وقت زيارتنا كان بالليل فما كانش فيه كل الأصناف اللى موجودة فى المنيو "الكبيرة جدًا" واللى بـ تنقسم لكل أنواع العيش، والكرواسون، والمافينز، والدوناتس، والمقرمشات، والسناكس، والدانش، والمنين والنواعم اللايت.

من الأصناف المتاحة وقتها اختارنا 1/8 كيلو منين بالجبنة الرومي، و1/8 كيلو منين بالجبنة والزيتون (الكيلو 50 جنيه)، ومافين شوكولاتة (7 جنيه)، كيس فيه 2 باجيت بالحبوب (9 جنيه)، وبقسماط مدور ناشف بالسمسم (الكيلو بـ 32 جنيه) وأخيرًا دوناتس بالكاسترد (5 جنيه)، والصراحة لو كنا طولنا أكثر من كده كنا أخذنا حاجات ثانية لأن شكل المخبوزات كان مغرى جدًا.

مش هـ نقول حاجة عن المخبوزات والحلويات عامة غير أنها "فريش وطعمها حلو جدًا" دي الصفة العامة اللى لقيناها، وبالنسبة للعيش فحجمه كبير ممكن يتقسم كمان لو للأطفال، البقسماط المدور مش متعودين أنه يكون طري، بـ نحبه مقرمش لكن رغم كده طعمه حلو جدًا، المافين غنية بالطعم وأهم حاجة الشوكولاتة، الدوناتس طرية وهشة وطعم الكاسترد المحشو فى النصف خفيف، وعليها من فوق سكر مرشوش وقطعة كريز أضافوا للطعم النهائي، المنين كمان كان هش وخفيف على عكس أماكن ثانية بـ تعمله ثقيل وتحس أنه مليان سمنة، وكمية الجبنة والزيتون فيه معقولة على حجمه.

تجربتنا في "الفرن" مميزة، لسه بـ نستمتع بأصنافه لحد لحظة كتابتنا للمقال ده، ونعتقد هـ يكون مكاننا المفضل لو حابين نشتري الصبح بدري مخبوزات وحلويات فريش للفطار، ونعتقد هـ يكون مكانكم المفضل أنتم كمان بعد ما تجربوه.