The Definitive Guide to Living in the Capital , Cairo , Egypt

لو بـ تدور على
كوفي شوب مش مشهور وعالمي من عينة «ستاربكس» و«كوستا كوفي» يبقى مكانك الصح في وسط
البلد. وسط البلد زي أي منطقة تانية فيها فروع للكافيهات العالمية، بس الأهم والمميز
هو وجود عدد لا نهائي من القهاوي البلدي اللي كلنا بـ نحبها. المشكلة بقى لو خرجت
مع أصحابك – من غير تخطيط – في وسط البلد ومحتاج قعدة مريحة وجوها مناسب للدردشة وفيه
الخصوصية؛ «المَضيَفة» بـ تقدملك الحل.

عارفين مقولة
“ما تحكمش على الكتاب من عنوانه؟” ده ينطبق بالظبط على «المَضيَفة». في
شارع عدلي في قلب وسط البلد، الديكور متهالك والمرايات متكسرة وفيه عواميد مش
محطوطة في مكانها وقصريات زرع صناعي ومتربة زي اللي كانت بـ تبقى في أوضة الكرار في بيوت جدودنا
زمان. ومع ذلك الكراسي كبيرة ومريحة وفيه كَنبْ كمان.

القهوة دايماً
فيها ناس كتير بس عمرها ما بـ تتزحم عالآخر، المكان مفتوح والتهوية كويسة وهـ تعرف
تشم هوا نضيف بين كل نفس شيشة والتاني. أما المنيو فبسيط وده عجبنا جداً. فيه
العصاير المعروفة والكوكتيلات والقهوة وفيه برضه موز باللبن جامد وفريش جداً (5.50
جنيه) وكوكتيل المضيفة بـ13 جنيه وده عليه بولة آيس كريم فراولة بـ تغطي عصير
المانجو والفراولة اللي في الكاس.

فيه الإختيارات العادية لأي كافيه تاني، السلاطات من 4
لـ6 جنيه والشوربات من 6 لـ8 جنيه وأطباق مشويات من 30 لـ40 جنيه. بحذر اعتقدنا ان
البيتزا هـ تكون أحسن إختيار، والمفاجأة أنها كانت لذيذة جداً، وأسعارها كانت من
12 لـ20 جنيه وكانت معمولة بطريقة الـ« Deep Dish » اللي بـ تخلي البيتزا سميكة قوي وفي نفس الوقت مقرمشة،
جربنا بيتزا الخضروات (14 جنيه) بالفلفل الأخضر والزيتون والبصل والطماطم،
والكميات كانت معقولة ومفيش حاجة أكتر من التانية بالنسبة للخبيز والإضافات، لدرجة
اننا ممكن نقول انها من أحسن البيتزات اللي كلناها في وسط البلد.

الخدمة سريعة وممتازة والويترز متعاونيين وبـ يطمنوا كل
شوية أن كله تمام ومافيش زبون ناقصه حاجة. الشيشة بـ3 جنيه بس ونكهة البرتقال كانت
خطيرة والخدمة عليها مميزة برضه.

عندهم قهوة تركي بـ7 جنيه وسحلب ما بـ يهزرش، الكوباية
مليانة مكسرات وزبيب وجوزهند بـ7.50 جنيه، كان طبق حلو في حد ذاته. لو غاوي حلويات
قوي ورايح مخصوص عشان كده هـ تلاقي آيس كريم وأم علي بـ12 جنيه.

روح «المَضيَفة» لو عايز بديل للأماكن التقليدية في وسط
البلد، وفيه هناك انترنت لاسلكي ( Wi-Fi ) لو عايز تخلص شوية شغل وانت هناك.