The Definitive Guide to Living in the Capital , Cairo , Egypt

كافيهات
بامبكين

بامبكين: محل متخصص في الكيك والتارت في الزمالك

  • 15 ب شارع طه حسين
  • مخبوزات وحلويات
تم التقييم بواسطة
Angie El Batrawy
قيم
قيم الآن
بامبكين: محل متخصص في الكيك والتارت في الزمالك

في محل صغير خالص جنب محل تي
شيرتات «زافير – Zafir»
في الزمالك موجود محل كيك وتارت «بامبكين – Pumpkin»، بابه جرار مش هـ تعرف تفتحه
لوحدك لأنه ثقيل شويه، المحل مساحته صغيرة جدًا يا دوب فيه ثلاجة عرض بزجاج شفاف
فيه جميع أنواع التارت مقطع لـ 8 قطع وكاشير على شمال الثلاجة وراها تصميم جرافيك
مميز لمحل بامبكين، وفيه أجزاء في الحائط خشب، وبـ يستقبلك صاحب المحل ومعاه شخص
ثاني حلواني هو اللي بـ يجهز لك الطلب.

“بامبكين” بدأوا في
الإسكندرية عام 1999 وهم رواد في إنتاج أنواع مختلفة من التارتات والكيك والفطائر
زي فطيرة التفاح المخبوزة كلها طبقًا لوصفات أوربية وكندية وأمريكية. أكثر من 25
نوع تارت وكيك لقيناهم في المنيو على الرغم من أن اللي لقيناه هناك لما رحنا كان حوالي
10 فقط لأن الأنواع الثانية خلصت، هـ تلاقي بالقهوة، البلح والمكسرات، وباللوز،
ووايت فورست، والتشيز كيك بمذاقات مختلفة زي الكريز وكمان التوت، القرفة، وواحدة
فيها 3 أنواع شوكولاتة، والتوفي، وشوكولات موس، والفواكة وغيرها.

أحلى حاجة في المنيو أن كل تارت
له صورة بـ توضح كل مكون من مكوناته من خلال رسم توضيحي، وكاتبين سعر القطعة كام
ولو أخذت التارت كله بكام، أسعار القطع كلها بـ تتراوح من 14 لـ 15 جنيه على حسب
النوع، وسعر التارت كامل (8 قطع) اللي قطعته بـ 14 جنيه هو 105 وسعر تارت اللي
قطعته 15 جنيه هو 110 جنيه، وبكده أنت بـ توفر 7 جنيه فى الأولى و10 جنيه في
الثانية.

إحنا مش عارفين سبب تسمية المحل
بامبكين (حلوى اليقطين أو القرع عسلي) لكن على الموقع بتاعهم كاتبين قصة جميلة
للبامبكين رابطينها بالحلويات، وعلى الرغم من أنهم مشهورين بحلويات بوصفات عالمية
لقينا عندهم إعلان عن توافر حلويات شرقية سورية بالمحل، العلبة الصغيرة سعرها 120
جنيه والكبيرة 130 جنيه بس شيك جدًا.

جربنا 4 أنواع مختلفة من التارت
عندهم: التشيز كيك بالتوت، وتريبل شوكولات، وتارت التفاح، ومارس أند كريم، بـ
تأخذهم تيك أواي لأن مافيش مكان قعود، كل قطعة تارت بـ تتحط في علبة صغيرة كارتون مثلثة
نفس شكل وحجم القطعة، كل ده بـ يتحط في شنطة فيها شوك ومناديل وبـ يقفل الشنطة
بدبابيس علشان ما تتبهدلش.

التشيز كيك بالتوت كانت عليها قطع
توت من فوق وكان الجزء اللي فيه الجبنة طرية وناعمة وسكرها حلو والبراونيز ثقلها
وقوامها معقول وعامل توازن مع الطبقتين فوقها المكونين من: الجبنة وقطع التوت.

الأبل تارت أو تارت التفاح طري
والقرفة فيه حلوة وطعمها واضح مع المربى اللي قوامها متماسك، التفاح كان مقرمش
وناشف مش طري واخد من المربى اللي تحتها. التفاح مقطع شرائح رفيعة مرصوصة فوق
بعضها بحيث تلاقي التارت مليان تفاح من فوق عليها طبقة جيلى شفاف خفيفة علشان تمسك
القطع سوا لكن للأسف كان منفصل عن الجزء اللى تحته.

تريبل شوكولات فيها 3 طبقات:
شوكولاتة نوتيلا وموس شوكولا وكريمة شوكولاتة بالكراميل، كانت ثقيلة شوية ومسكرة
لأن فيها شوكولاتة كثير بس كانت فظيعة بـ تذوب في الفم وناعمة جدًا.

أما مارس أند كريم مكونة من قطع
مارس مقطعة صغير فوق كريمة بطعم الكراميل كل ده فوق موس شوكولاتة، سكرها كان حلو
لكن ثقيلة ما تقدرش تكملها، والطبقات متماسكة لكن عطشتنا شوية.

في بامبكن ممكن تطلب تارتات مخصوص
للمناسبات، بـ تروح قبلها بيومين وتحدد معاهم الحجم والسعر، وبرضه عندهم خدمة
التوصيل اللي بـ تختلف قيمتها حسب بُعد المنطقة عن الفرع، الفروع في القاهرة (الزمالك
– داندي مول – المعادي – مدينة نصر)، والإسكندرية (رشدي – شارع السلطان حسين –
سموحة – لوران)، وفي الساحل الشمالي داخل قرية سيدي كرير.

نصيحة 360

الركن أمام المحل صعب شوية، اركن في أقرب حتة واتمشى أحسن – اشتري التارت كامل أفضل لأنه أوفر.

أحسن حاجة

التريبل شوكولات والتشيز كيك بالتوت.

أسوأ حاجة

سعر القطعة ممكن يكون أعلى شوية من أماكن ثانية، ولكن يشفع لهم أنهم من زمان في المجال وعندهم أنواع مش موجودة في أماكن ثانية.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح