The Definitive Guide to Living in the Capital , Cairo , Egypt

كافيهات
بريد باسكت – Bread Basket

بريد باسكيت: أحلى أفطار وبداية ليومك في المهندسين

تم التقييم بواسطة
Angie El Batrawy
قيم
قيم الآن
بريد باسكيت: أحلى أفطار وبداية ليومك في المهندسين

في ميدان الجمهورية في شارع متفرع من البطل أحمد عبد
العزيز، وفى نفس مكان مطعم «جوليوز – Golio’s»
كانت ثاني زيارة لنا.. لكن زيارتنا ما كانتش علشانه لكن علشان جاره «بريد باسكيت –
Bread
Basket» في
الدور العلوي له، من وقت زيارتنا للمطعم الأول ومن ساعتها حطيناه فى دماغنا وقلنا
أننا لازم نعدي عليه فى يوم من الأيام خاصة أن مدخله مشترك مع “جوليوز”
لكن بـ تحود يمين وبـ تطلع له بسلم.

«بريد
باسكيت» له نظام يشبه إلى حد كبير محل مخبوزات “تي بي إس
فى أنك بـ تلاقى كمية كبيرة من المخبوزات وتشكيلة للعيش خطيرة وتقدر تعمل مكونات
ساندويتشك بنفسك وأمام عينيك، لكن الموضوع مش تقليد لأننا عرفنا أن “بريد
باسكيت” شركة رائدة للمخبوزات من زمان مقرها جنوب أفريقيا وبـ تعتبر متجر كبير
للمخبوزات والطعام زي ما هما كاتبين فى اللوجو بتاعهم “Food
Emporium”
لأنه عبارة عن محل مخبوزات وسلاد بار وكوفي شوب.

أول ما بـ تطلع هـ تلاقي مكان بالخارج للقعود فى الهواء
الطلق والشمس، ومن الداخل  فيه ديكور بـ
يغلب عليه اللونين البنى والبيج موزعين بطريقة مريحة للأعصاب جدًا. فيه ثلاجات
فيها أصناف مخبوزات وثلاجة ثانية فيها مكونات السلاطات والإضافات اللى بـ تضيفها
للعيش أو الساندويتش بتاعك. وكمان مكتبات وأرفف فيها كتب مختلفة بـ يحيطها زجاج
شفاف.

المنيو ضخمة جدًا بالنسبة لمحل مخبوزات، مقسمة لـ: عيش
ورولز، الإضافات، الكرواسون (باللوز، والشوكولاتة والقرفة والجبن الفيلادلفيا،
والسادة)، والرابس والبيتزا، والحلويات (مافنز، تشيز كيك وشوكولات تشيب كوكيز،
دانش، دونتس.. إلخ)، والبسكويت، مشروبات ساخنة، مشروبات باردة، ووجبات أفطار (زي
الأومليت بالأعشاب، وبالسبانخ، والبيض والروست مشروم أند تشيز، وأفطار صحي مكون من
طبق الموسلى بزبادي دسم قليل ومعاه عسل)، وكمان فيه ركن للسلاطات.

الجميل هنا أنك مش بس بـ تعمل الساندويتش بتاعك لأ كمان
ممكن تطلب كرواسون وهما بـ يفتحوه ويحطوا لك المكونات اللى حاببها، طلبنا خبز Malt
Grain loaf (5 جنيه) واختارنا الإضافات تركي كريم تشيز (21 جنيه) وهما بـ
يحطوا من غير ما تختار الخس والطماطم والصوصات زي المايونيز والمسطردة، كمان جربنا
كرواسون عليه جبنة رومي من فوق (8.50 جنيه) ورشحوا لنا نحط فيه سلامي كريم تشيز
(20 جنيه).. وقد كان.

قعدنا فى المنطقة اللى بالخارج،
مكان هادئ للأعصاب والجو كان جميل، شوية وجاء الأفطار، التقديم حلو جدًا والخدمة
أحلى، حسينا أننا بـ نفطر فى بلكونة بيتنا، لأننا طلبنا كمان شاي باللبن (الشاي 7
جنيه وإضافة اللبن 4 جنيه) فـ جاء لنا فى براد أبيض صغير واللبن منفصل فى اللبانة
فكان إحساس رائع، وكمان طلبنا هوت تشوكلت (16 جنيه) وحطوا لنا مع كل مشروب نوع
حلوى مختلف علشان نذوقه. ده غير طبق الحلويات المشكل من بسكويت باللوز وبالعين
الجمل والمربى والكوكيز وغيرها اللى حطوه لنا هدية نذوق منه لأننا كنا محتارين
نأخذ إيه ودى كانت أحلى مفاجأة وهدية منهم.

العيش كان طعمه رائع على الرغم
أنه كان ناشف شوية، بـ ينزل لك مع اختيارك بطاطس شيبسي بالملح، وكمان الكرواسون
بالمكونات اللى رشحوها لنا كانت خرافية، وكان طازج وطري واستمتعنا بكل قطمة فيه. الشاي
باللبن والهوت تشوكلت برضه كانوا حلوين قوي.

“بريد باسكيت” عندهم كمان خدمة تحضير الأكلات فى
المناسبات Catering بـ يعملوا صوانى أو
“باسكيت” لأنواع ساندويتشات تقدم فى المناسبات بـ ينزل معاها اختيارك من
ستة ميني مافينز أو ميني دونتس والباسكيت بـ يكفى من 4: 6 أشخاص ولازم تحجزه قبل
المناسبة بتاعتك بـ 24 ساعة وبـ يتراوح أسعارها من 45 جنيه لباسكيت الميني بيتزا
و55 جنيه لساندويتشات التوست لحد 130 جنيه لباسكيت الأمريكان بيجلز.

وإحنا ماشيين طلبنا من بار
السلاطة شيف سلاد (27 جنيه)، والجميل عندهم أنهم عملوا
إيصال للسلاطة لوحده لأن التيك أواي مش بـ يضاف عليه الـ 12% خدمة للمحل، لكن
أضيفت على إيصال الحاجات اللى طلبناها فى المكان.

من الآخر.. نفسك فى تجربة مختلفة للأفطار وتبدأ يومك
بإحساس جميل مختلف.. روح “بريد باسكيت”.

نصيحة 360

ده الفرع الوحيد للمحل، وبعد أسبوع هـ يفتحوا فرع جديد فى الزمالك في 132 ش 26 يوليو، مافيش فروع ثانية وخلى بالك أحسن تتلخبط لأن فيه محلات ثانية اسمها "ذا بريد باسكيت" تأسيسها أصلاً في ألمانيا ودى حاجة مختلفة عنهم.

أحسن حاجة

منتجات طازجة وجو حلو فى القعدة بالخارج والخدمة ممتازة.

أسوأ حاجة

الأسعار غالية شوية، أفطارنا مع السلاطة اللى أخذناها تيك أواي كلفنا 118.50 جنيه.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح