The Definitive Guide to Living in the Capital , Cairo , Egypt

تريانون – Trianon

تريانون: كافيه لطيف عليه بعض الملاحظات في فرع حديقة الأزهر

  • حديقة الأزهر
  • قهوة
  • 19020,01000929323,01000075177,01113258897
  • 10 صباحاً - منتصف الليل
تم التقييم بواسطة
Waleed Abuarab
قيم
قيم الآن
تريانون: كافيه لطيف عليه بعض الملاحظات في فرع حديقة الأزهر

كتبنا قبل كده عن أكثر من فرع من فروع تريانون، في القاهرة وفي الإسكندرية كمان، والاسم طبعًا غني عن التعريف ويعتبر واحد من أفضل وأشهر الكافيهات وأماكن الإفطار والحلويات والمعجنات في مصر، بفروعه المنتشرة في كل الشوارع الرئيسية في القاهرة والمحافظات ده غير المركب الشهير اللي بـ يحمل اسم الكافيه في شارع النيل في الجيزة.

لكن ما تتوقعش نفس المستوى لما تزور فرع «تريانون» داخل حديقة الأزهر في طريق صلاح سالم. لأن «تريانون» هنا أقرب لكشك صغير بـ يخدم الزبائن اللي بـ يقعدوا في المساحة المفتوحة أمام الكافيه. هو موجود في وسط الحديقة تقريبًا بالقرب من أعلى نقطة فيها، وهو مشهور كفاية أنك أول لما تدخل الحديقة وتسأل أي حد من العاملين فيها “فين تريانون؟” يوصف لك تمشي إزاي بالضبط.

القعدة حلوة علشان الحديقة نفسها حلوة، لكن مش هـ تحس بأي شكل من الأشكال أنك في فرع تريانون، ممكن دي تبقى ميزة لو كان هدفك تقعد في مكان تأخذ فيه مشروب ساخن وقطعة كرواسون وأنت بـ تتفرج على القاهرة من فوق وخلاص، لكن لو بـ تدور على الطابع المميز لتريانون مش هـ تلاقيه هنا. لكن المنيو نفسه الموجود في أي فرع، وطلبنا منه ديلوكس كلوب ساندويتش (30 جنيه) وعصير فراولة باللبن فريش (14 جنيه) لكن هنا الفراولة لوحدها بـ 14 جنيه وإضافة اللبن بـ 5 جنيه. طعم الساندويتش كان لذيذ وشرائح التركي المدخن والخس والطماطم كانت فريش والعيش التوست نفسه كان مقرمش، مع عصير الفراولة “بالمناسبة العصائر الفريش مميزة جدًا في تريانون عمومًا” كانت أكلة حلوة وخفيفة ومناسبة جدًا للطقس الرائع اللي كنا فيه يومها.

بعد وجبتنا حبينا نجرب الحلويات اللي هي من السمات المميزة للمكان، وكان اختيارنا قطعة تشيز كيك بصوص الكراميل “كنا عاوزينها فراولة برضه بس ما كانش موجود ساعتها” وكان سعرها 21 جنيه ولحسن الحظ قُدمت لنا فريش والكراميل فيها طعمه يجنن. يعني خلاصة تجربتنا هنا أننا اتبسطنا من مستوى المأكولات والمشروبات جدًا لكن مستوى القعدة والخدمة كان ممكن يبقى أحسن من كده، تقريبًا كنا قاعدين لوحدنا في المكان ومع ذلك كان فيه تأخير في تجهيز الطلبات وعدم انتباه العاملين لإشاراتنا المتكررة، وكان لازم نروح لحد الكاشير بنفسنا علشان ندفع الحساب بعد ما انتظرنا حد ييجي يجيب لنا الفاتورة لكن ما حصلش.

«تريانون» هـ يفضل «تريانون» ده أكيد، لكن التركيز على مستوى الخدمة في كل الفروع أمر ضروري للحفاظ على المكانة اللي وصل لها في آخر 10 سنين. منتظرين الأفضل في الزيارات القادمة.

نصيحة 360

عرفنا أن مش كل فروع تريانون بـ تتبع إدارة واحدة، فيه منها فروع واخدة حقوق امتياز أو انتفاع، يمكن ده يفسر تذبذب مستوى الخدمة من فرع للثاني.

أحسن حاجة

 المأكولات والمشروبات هنا ممتازة، والأسعار معقولة.

أسوأ حاجة

الظلام الشديد في أماكن الجلوس الخاصة بالكافيه داخل الحديقة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح