The Definitive Guide to Living in the Capital , Cairo , Egypt

أصحاب الذوق الرفيع في الأكل مش بيعجبهم أي حاجة وعلشان كده تورتينا قدرت تنقذ الذويقة من الأماكن اللي بتتدعي إنها من أحسن أماكن الحلويات والمخبوزات في مصر، وبدأ يقدم مع حلوياته اللي مافيش في جمالها، مخبوزات طازة منعشة ما تتفوتش.

وبرغم إن تورتينا فتح فرع جديد في المعادي وقفل اللي في مترو ماركت وبقى موجود في شارع اللاسلكي متفرع من شارع النصر، إلا إننا خدنا بالنا منه في شهر رمضان اللي فات بس. وقولنا لازم نجرب تاني ألذ الأنواع عنده، وأول ما دخلنا لاحظنا تلاجة الآيس كريم اللي مليانة ما لذ وطاب من أوريو كيك وخلافه.

 ده غير التورت العادية زي الريد فلفت كيك وكيك المانجو اللي كان فيه منتجات زيها في رمضان وكانت حلوة جدًا بطبقات الكيك اللي متشرية صوص المانجو وعليها مارينج وكريمة لذيذة، بس المفاجأة بالنسبة لنا كانت كيك الكيت كات واللي كانت عبارة عن كيت كات ضخمة مستنية اللي يقرقشها.

لكن أكتر حاجة حبيناها لما لاقينا فيه ميني ساندويتشات العلبة بـ 110 جنيه، وباتيه وكرواسون الواحد بـ 10 جنيه، لأن ده معناه إننا ضمنا فطار لذيذ من يوم للتاني.

طلبنا قطعة تارت تويكس بـ 21 جنيه، وسليبر بـ 22 جنيه، وقطعة فريرو روشيه بـ 25 جنيه، وتارت ليمون بـ 22 جنيه، وباتيه بـ 10 جنيه. و كوكيز شيبس قطع بـ 10 جنيه.

قطعة التويكس كانت تقيلة شوية بس لذيذة، أما الفريروشيه فهي عبارة عن نصف كورة متغطية ببندق كتير بالشوكولاتة وجواه كيك فيها صوص شوكولاتة، كانت حلوة جدًا بس الأكيد أنهم محتاجين يقللوا البندق من بره لأنه بيوجع السنان وفي فريرو روشيه الأصلية بيكون متقطع أصغر من كده ومعاه طبقة كرانشي مش مجرد صوص شوكولاتة وبندق.

أكثر حاجة عجبتنا كانت تارت الليمون واللي فوقيها طبقة مارنج مع كريمة وعجينة الليمون بس السكر في المارينج كانت محتاج يدوب أكثر من كده. وأخر قطعة المفروض أنها كيك جواها توت كنا بنبحث عنه لأنه قليل ومافيش كريمة من جوه برغم طبقة المارنج الأسطورية اللي من بره.

نتمنى وقت زيارتنا الجاي يكون فيه اختيارت أكثر من القطع الصغيرة اللي مستوحاه من التورت، زي  تورتة النوتيلا بالمكسرات في طاجن فخار اللي بمجرد ما عرفنا مكوناتها كان هيغمى علينا من الجمال، غير تارت المانجو بأنواعه والريد فيلفت.