The Definitive Guide to Living in the Capital , Cairo , Egypt

جرت العادة في الفترة الأخيرة أن أغلب الكافيهات يحطوا في المنيو بتاعهم أكل كأنهم مطعم وكده، ويسموا نفسهم لاونج، وللأسف أغلب الكافيهات دي أكلها بـ يبقى غير محترف بالمرة، وللأسف "جرافيتي – Graffiti" من الكافيهات دي.

برغم الإطلالة على النيل، والجرافيتي اللي مرسوم على الحوائط والمنيو اللي مليان ألوان وشكله حلو جدًا، إلا أننا خاب أملنا جدًا من زيارتنا للكافيه ده، لدرجة أننا محتارين من كثر الحاجات اللي ضايقتنا هناك.

لما دخلنا على صفحتهم على الفيسبوك بعد ما رجعنا فهمنا نوعية الأغاني اللي شغلوها هناك، اللي الكافيه بـ يحطها واللي أغلبها لأوكا وأورتيجا والمغنيين اللي بـ يغنوا نفس اللون، والحقيقة أننا لو كنا عرفنا الموضوع ده ما كناش رحنا خالص. بدأت الحكاية، لما لقينا بتاع 30 واحد متجمعين في عيد ميلاد قلنا وماله، لكن أنه يتحول من عيد ميلاد لفرح ولا كأننا في ديسكو وأولاد بـ ترقص وبتاع، ده كان غير مقبول بالنسبة لنا تمامًا.

كمان للأسف، معظم الكافيهات اللي في ساحة مطاعم وكافيهات "بلو بلو" اللي على النيل كلها فيها شيشة، وده بـ يخلى الناس غير المدخنة واللي عندهم حساسية من الدخان زينا، شبه مستحيل أنهم يتمتعوا بسحر منظر النيل من غير ما يتخنقوا، لأن مافيش مكان لغير المدخنين. فننصح العائلات بالذات لو خايفين على رئتهم وأطفالهم وودانهم، ده مش المكان المناسب للعائلات إطلاقًا. مكانك مش هنا.

المهم، المنيو كبير جدًا، ومليان اختيارات عديدة من بيتزا ومكرونة وبرجر ووجبات بأطباق جانبية ووجبات للأطفال، وكل أنواع المشروبات السخنة والباردة، ممكن القسم الوحيد اللي كانت الاختيارات فيه محدودة هو الحلويات.

إحنا كنا مجموعة كبيرة جدًا، وده ساعدنا أننا نذوق أكثر من طبق علشان حكمنا يبقى عادل. بدأنا بالمقبلات جرافيتي كومبو بـ 39 جنيه، واللي كان مكون من أصابع موتزاريلا وصدور دجاج ومشروم مقلي، مع ثلاث أنواع صوصات زي الباربكيو والـ Honey mustard والتشيلي الحار، كان كويس بس بعض قطع المشروم كانت باردة من الداخل، يمكن حمروه وهو مثلج، الله أعلم.

بعد كده طلبنا Beef Three sauce بـ 85 جنيه وده عبارة عن قطع لحم مع 3 أنواع صوصات مختلفين، وطلبنا أنه يبدل لنا صوص الريكفور بصوص ليمون، وفعلًا، الحق يقال صوص الـ Mustard وصوص الليمون كانوا حلوين، أما صوص المشروم كان بلا  أي نكهة، بس قطع اللحم ما كانتش ستيك ولا حتى فيليه، دي كانت 3 قطع صغيرة جدًا من لحم أشبه في حجمها وسمكها بالكبدة، مع بطاطس مهروسة ومكرونة المفروض أنها بصوص الكريمة، لكنها كانت أشبه بمكرونة مسلوقة وعليها من فوق جبنة بارميزان، طلبنا كمان MCM Chicken بـ 59 جنيه، وده عبارة عن صدور فراخ عليها جبنة موتزاريلا وروستو مدخن، لكن للأسف قطع الدجاج كانت أشبه باللي بـ نشتريها جاهزة من السوبر ماركت، وما شوفناش أي أثر للروستو، ذهب ولم يعد! أما الطامة الكبرى، كانت في البرجر، طلبنا Angus mushroom cheese بـ 40 جنيه، والحقيقة أن رائحته بس كانت كفيلة أننا ما ناكلوش، ومش محتاجين نقول لكم، أنه لا كان لا طعم ولا رائحة، على رأي أحد أصحابنا شبه البرجر بتاع فرج الله مش حلواني حتى. وطلبنا  كمان مكرونة Fettuccine Alfredo بـ 43 جنيه، واللي كانت برضه مكرونة مسلوقة مع صدور دجاج وجبنة بارميزان على الوجه، لكن الصوص كان أشبه بحبة لبن خفاف جدًا.

أما بالنسبة للحلو طلبنا، Fruit salad بـ 25 جنيه كانت لطيفة مش وحشة، وMolten cake بـ 25 جنيه، بالمناسبة ده كان أسوأ كيك ذوقناه في حياتنا لأنه كان مش طازة غير أنه ناشف من الداخل ومن غير آيس كريم كمان، مجرد صوص شوكولاتة عليه من فوق. وآخر حاجة Cheese cake بـ 25 جنيه، كانت بصوص التوت بس برضه للأسف كانت سميكة والصوص كان قليل عليها والبسكوت ذائب مش مقرمش.

أما بالنسبة للعصائر، طلبنا فرابتشينو بالشوكولاتة بـ 30 جنيه، وكان كويس، وعصير ثاني المفروض أنه كوكتيل عصير برتقال مع ليمون وسفن آب بـ 30 جنيه برضه، بس هم ما حطوش عصير برتقال طازة، حطوه تانج تقريبًا، فضيع النكهة تمامًا.

كافيه جرافيتي ممكن يصلح ككافيه للمراهقين أو طلاب الجامعة يستمتعوا فيه ويشربوا حاجة في السريع ويمشوا، لكن أنه يوصل للاحترافية أو للعائلات ده محتاج منه مجهود كبير جدًا، أوله أنه يغير الشيف بتاعه.