The Definitive Guide to Living in the Capital , Cairo , Egypt

حسونة

حسونة: عصائر وحلويات مبتكرة في الدقي

  • 113 ش التحرير - ميدان الدقي
  • مخبوزات وحلويات
  • 0237604006,0237604005,01091919866
تم التقييم بواسطة
Haisam Awad
قيم
قيم الآن
حسونة: عصائر وحلويات مبتكرة في الدقي

ميدان
دقي، زحمة وعربيات جاية من كل الاتجاهات وكوبري فوق ومحلات تحت وبياعين فارشين على
الرصيف، أكيد الجو مش مناسب لكوفي شوب وسط كل الكلام ده. لكن واضح أن أصحاب كافيه «حسونة»
بـ يفكروا بطريقة مختلفة. العلامة المميزة للكافيه باللون البرتقالي الفاتح موجودة
من بره بشكل مغاير لباقي المحلات بعلاماتها الأكثر وقار، ملفتة جدًا.

المنيو
غني ومميز، أنواع كثير من العصائر والكوكتيلات، وهـ تتوهم بالأسماء العجيبة
للميكسات والمشروبات اللي ممكن تختار مكوناتها وتعملها حسب رغبتك، والجرسون هـ
يعمل لك اللي أنت عاوزه مخصوص وأنت قاعد مريح على كراسيهم الخطيرة.

جربنا
الأول الكابتشينو العادي (5.50 جنيه) لكن كان خفيف والمياه فيه كثير. وهو لا يقارن
بالكابتشينو في سلاسل الكوفي شوب الكبيرة زي كوستا وكوفي بين. احتارنا شوية في
اختيار واحد من الكوكتيلات بأسماءها العجيبة. الأول “فنكوش” وده خليط من
الأناناس والكيوي بـ 8 جنيه، كان لذيذ قوي وكان أحسن من “السوبر فنكوش”
اللي بـ يضاف له شوية عصير تفاح ( 9 جنيه)، الكوكتيل كان مثلج وفريش لكن طعم
الكيوي كان مش واضح بسبب الأناناس المعسل!

مطبوع
على الحائط أول ما تدخل المحل أسماء وصور لاختيارات الكيك والتارت المميزة للمكان
وجابت نتيجة معانا وجربنا تارت التفاح ( 9 جنيه)، الكيك نفسه كان رطب شوية، لكن
كان غني بالطعم وما كانش مسكر قوي زي كل الحلويات ما بـ تتعمل في مصر، التفاح هو
اللي كان معسل وواخد شربات كثير وضيع التوازن اللي كنا عاوزينه. كان فيه كمان موس
الشوكولاتة بـ 9 جنيه، والتيراميسو بـ 13 جنيه، وسلاطة الفواكة اللي ممكن تختار
مكوناتها بنفسك.

بعد
المغرب مطبخ «حسونة» بـ يعمل فطائر وبيتزا بأحجام صغيرة ومتوسطة وكبيرة، الأسعار
من 16 لـ 40 جنيه حسب الحجم والمكونات، ماعدا بيتزا (Meat Feast) العملاقة بسعر 47 جنيه. الفطير من 12 لـ 31 جنيه وفيه منها
الحادق والحلو والحشو ممكن يبقى جبنة أو لحوم أو تونة أو شوكولاتة وفواكة.

من
ملاحظاتنا عن رواد المكان أن معظمهم ناس شيك سواء شباب أو ناس كبيرة من مستويات
اجتماعية فوق المتوسطة ومعظمهم من سكان المنطقة. بالليل شكل المكان والديكور بتاعه
من الداخل بـ يبقى أنيق، مع لافتات الحلويات والفواكة في كل مكان، «حسونة» كافيه
مريح وجوه ظريف.

نصيحة 360

فيه إنترنت (Wi-Fi) مجانًا، وفيه توصيل طلبات للمنازل.

أحسن حاجة

منيو ضخم، مكونات كل حاجة فريش.

أسوأ حاجة

المشروبات الساخنة، مش تخصص «حسونة».

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح