The Definitive Guide to Living in the Capital , Cairo , Egypt

كافيهات
دانكن دونتس – Dunkin Donuts

دانكن دونتس: مستوى متفاوت لأشهر سلسلة دوناتس في مصر

تم التقييم بواسطة
Ramy Soliman
قيم
قيم الآن
دانكن دونتس: مستوى متفاوت لأشهر سلسلة دوناتس في مصر

كلنا فاكرين اللي حصل لما سلسلة الدوناتس العالمية “دانكن دوناتس” فتحت أول فروعها في مصر، وبسرعة بدأ الكلام عليهم يكتر. ناس كتير اشتكت من مستوى الدوناتس، واتكتب كلام كتير على شبكات التواصل الاجتماعي إن البيجل عندهم فيه عفن، وبعدها نزلوا بوست فيه كلام اتفهم غلط، ووقتها اتهموا السلسلة بالعنصرية. بغض النظر عن كل الكلام ده، دانكن فتحوا لغاية النهارده عشرة فروع!

يوم زيارتنا لأجدد فروعهم في ميدان المساحة الدقي اتفاجئنا بالزحمة الرهيبة هناك. الفكرة إن المكان نفسه صغير والترابيزات قريبة جدًا من بعض ودي حاجة مش مريحة خالص. في عندهم كمان منطقة أوت دوور صغيرة جدًا فيها كام ترابيزة أرحم شوية من جوه.

 

 

بعد جولة سريعة وسط منتجاتهم اللي تفتح النفس بأشكالها وألوانها، طلبنا كريم تشيز بيجل (23 جنيه) وويدجز (13 جنيه) وقطعتين دونات (15 جنيه) وبراوني كراميل (20 جنيه) وباشون فروت كولات كبير (47 جنيه).

نبدأ كلامنا مع البيجل اللي كان تخين وناشف شوية، وبالتالي كان صعب يتمضغ. البيجل بتكون محشية جبنة بيضاء وإحنا زودنا بناءً على نصيحة الكاشير قطعة رومي (7 جنيه) ماكانش لها طعم بصراحة وماتستاهلش سعرها الغالي. في فكرة أحسن وأرخص إنك تشتري البيجل وتحشيه في البيت على مزاجك. أما الويدجز فكانت عايزة تستوي أكتر من كده وكمان محتاجة شوية توابل وبهارات.

 

نروح لأهم حاجة وهي الدوناتس، البوسطن كريم كانت محشية كسطرد مالهوش طعم، بس الحلو في الموضوع إن عليها صوص شوكولاتة هايل. أما الجرين أبل دونات فكانت محشية تفاح بالقرفة تحفة، بس عليه طبقة خضراء صناعية مالهاش طعم. بالنسبة لقطعة الدونات نفسها كانت خفيفة ومنفوشة، لكن برضه فيها نكهة صناعية مش لطيفة.

بعدها كان الدور على الكراميل براونيز اللي مافيهاش أي نوع من أنواع الكراميل، وكمان كانت شاربة مياه كتير وفيها جزء مزيت، والأغرب من كده إن بقيتها كانت ناشفة ومسكرة بزيادة وواضح إنها مش طازة أساسًا. الحاجة الوحيدة اللي كانت على المستوى كان الباشوت فروت سموزي المنعش، اللي قوامه كان صح الصح ومليان عصير الباشون فروت اللذيذ.

وبكده نكون وصلنا لأخر الحكاية، وبرضه ماقدرناش نعرف ليه دانكن دوناتس عندهم فروع كتير خصوصًا مع تجربتنا المحبطة معاهم. إحنا دايمًا بنحاول ندور على الجانب الإيجابي، بس الوضع هنا كارثي بصراحة، فممكن نقول إنه مكان مش بطال لو هتقابل حد على السريع.

نصيحة 360

زوروا www.talktodunkinegypt.com واكتبوا الرقم الموجود في الفاتورة ورأيكم في زيارتكم لدانكن دوناتس وهتكسبوا قهوة صغيرة ببلاش.

أحسن حاجة

السموزي كان روعة ويعتبر اختيار ممتاز لفصل الصيف.

أسوأ حاجة

نبتدي منين الحكاية؟ من الأخر كل حاجة كانت وحشة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح