The Definitive Guide to Living in the Capital , Cairo , Egypt

ديب أند ديب – Dip n Dip

ديب أند ديب: رحلة مع كوكب الشوكولاتة وفرعهم الجديد في سيتي ستارز

تم التقييم بواسطة
Ramy Soliman
قيم
قيم الآن
ديب أند ديب: رحلة مع كوكب الشوكولاتة وفرعهم الجديد في سيتي ستارز

في ناس السعادة عندها تساوي كلمة واحدة: شوكولاتة – طبعًا عندهم سبب مقنع جدًا. الشوكولاتة علميًا بتنتج هرمونين مهمين جدًا، أولهم الدوبامين اللي بيزود التركيز والانتباه والثاني هو السيروتونين – أو هرمون السعادة زي ما بيقولوا – اللي بيمنع الاكتئاب. نفسنا راحت لحاجة حلوة، ويا سلام لو معاها شوية دوبامين وسيراتونين، وعلشان كده طلعنا فورًا على " ديب أند ديب-Dip n' Dip" بصفته واحد من أجمد محلات الشكوكولاتة والحلويات في القاهرة اللي بتحقق كل أحلام عشاق الشوكولاتة.

فرع ديب أند ديب في فوود كورت سيتي ستارز يتميز بمساحة كبيرة  معمولة بديكورات خشب، وبيستخدموا اللون الأحمر والأسود والأبيض في كل حاجة من السقف للحيطان وحتى الأطباق، وطبعًا لازم نكلمكم عن الثلاث نافورات شوكولاتة المعروضين عند المطبخ المفتوح. المكان بشكل عام كبير وفيه كذا ترابيزة بره، وبالتالي مافيش قلق من الانتظار لوقت طويل اللي دائمًا بنشوفه في فرعهم في كايرو فيستيفال سيتي.

منيو ديب أند ديب فيها تشكيلة كبيرة جدًا من الحلويات، منها Caramel Pain Perdu (50 جنيه) وBrownies n’Cheesecake Pot (65 جنيه) وطبعًا الاختراع الرائع فتوتشيني كريب (60 جنيه) – عبارة عن كريب متقطع عليه شوكولاتة سائحة – وإحنا بصراحة كنا عايزين نجرب كل حاجة، وفي النهاية قررنا نطلب Funky Brownies Crepe (50 جنيه) وكلاسيك وافل ديب أند ديب (60 جنيه).

الأول عبارة عن كريب ممتاز محشي براونيز ومتغرق في كوكتيل صوصات شوكولاتة بالحليب وبيضاء وداكنة. أنا معاك أن الكلام يبان جميل على الورق، بس فكرة حشو البراوني في الكريب مش تمام، خصوصًا أن صوص الشوكولاتة كان كثير جدًا لدرجة أننا بنشيله علشان نتذوق طعم الكريب نفسه. من الآخر، الطبق كان مسكّر بزيادة ومكوناته مش ماشية مع بعض.

أما الوافل فكان حكاية ثانية خالص. شوية فراولة وكيوي وموز وأناناس مع كريمة مخفوقة واختيارك من شوكولاتة بحليب أو بيضاء أو داكنة؛ يا عيني يا ليلي! من الأخر برضه، ديب أند ديب بيعمل أحسن وافل فيكي يا جمهورية.

في نقطة مهمة وهي أن سعر الوافل غالي شوية وهي أصلًا عبارة عن نصف قطعة وافل مقرمشة من بره وطرية من جوه. الجرسون وصل ومعاه برطمان فيه صوص الشوكولاتة البيضاء ورشها على الطبق بطريقة تفتح النفس، بس الشوكولاتة من ثاني كانت زيادة جدًا وطغت على طعم الوافل اللذيذ.

ديب أند ديب بأجواءه اللطيفة والشوكولاتة المميزة أكيد يقدر يمتع كل زواره. يمكن الملاحظة الوحيدة إن الشوكولاتة كانت طاغية على طعم الحلويات بشكل زيادة عن اللزوم. لو كنت من الناس اللي بتحب تضيف كمية شوكولاتة قليلة لحلوياتها – زي حالاتنا – فالموضوع هيكون ثقيل شوية، لكن عمومًا ديب أند ديب هو جنة لكل عشاق الشوكولاتة.

نصيحة 360

ديب أند ديب فتح فرع جديد في أمريكانا بلازا الشيخ زايد.

أحسن حاجة

الوافل حكاية وبيؤكد إنهم بيعملوا أكلات مميزة مش مجرد شوكولاتة رائعة وخلاص.

أسوأ حاجة

الأسعار غالية جدًا والشوكولاتة الزيادة طغت على الطعم.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح