The Definitive Guide to Living in the Capital , Cairo , Egypt

كافيهات
ديفاز – Divas

ديفاز كافيه: إفطار رمضاني لطيف في حدائق الأهرام

  • 189 منطقة ص - حدائق الأهرام تاني يمين من بوابة حورس
تم التقييم بواسطة
Angie El Batrawy
قيم
قيم الآن
ديفاز كافيه: إفطار رمضاني لطيف في حدائق الأهرام

حدائق الأهرام من الأماكن اللي قليل ما بنكتب عنها على موقع كايرو 360 وده لأنها –ولفترة قريبة- كانت مافيهاش أماكن خروج، لكن في الفترة الأخيرة ظهر فيها كمية مطاعم وكافيهات كتيرة جدًا، بعضها بسيط جدًا فى الجودة والجو العام، والبعض التاني مصروف عليه وشيك وخدمة ممتازة، وبالتالي بيكون الموضوع فيه مخاطرة شوية لما تروح تجرب أي مكان جديد، ولأن أصدقائنا راحوا المكان ده قبلنا ورشحوه بعد تجربة سحور اتبسطوا منها جدًا، تشجعنا وقولنا نجرب بقى عندهم الإفطار.

الإفطار في ديفاز كافيه – Diva’s Cafe عبارة عن المنيو العادية أو لو عاوز تختار من 3 أنواع Set Menu، الأولى عبارة عن طاجن خضار باللحمة وأرز وبطاطس محمرة وسلاطة خضراء ومشروب رمضاني وحلويات مشكلة (110 جنيه)، والتانية نصف فرخة مشوية وأرز بسمتى وطحينة وبطاطس محمرة ومشروب رمضاني وحلويات مشكلة (100 جنيه)، والتالتة بيف ستيك بصوص المشروم وأرز بسمتي وبطاطس محمرة ومشروب رمضاني وحلويات مشكلة (120 جنيه)، الأسعار دي غير شاملة الخدمة.. وباقي المنيو ممكن تعرفها من لينك على صفحتهم على الفيسبوك.

لازم تتصل قبل ما تروح وتحجز وده اللى عملناه فعلًا، اختارنا المنيو رقم 1 و3 (بلغنا الأوردر بالتليفون) مع تغيير صوص المشروم بصوص البلو تشيز والأرز البسمتي بدلناه بأرز عادي، رحنا قبل ميعاد الفطار بنص ساعة، المكان شيك جدًا يغلب عليه اللون الأحمر، الديكورات شيك وفيه كذا مكان للقعدات، فيه outdoor وفيه indoor وكمان فيه دور عُلوي، الدور اللي تحت فيه جوه Kids Area اللعب فيها حلوة أوي ومبهجة علشان اللي عاوزين يستمتعوا بوقتهم وأطفالهم بيلعبوا قريب منهم.

 

 

أول حاجة نزلت لنا على الترابيزة المشروب الرمضاني، بتختار بين قمر الدين وسوبيا، اختارنا الأتنين، هما كان طعمهم حلو بس قوامهم تقيل شوية، بعد الفطار بوقت طويل الأكل ما نزلش رغم أننا مبلغينه بالتليفون بدري، ودي أول حاجة ضايقتنا.

بعد ما سألنا الجرسون نزل لنا الأطباق الرئيسية وسلاطة واحدة بس وطبق بطاطس واحد، ولما طلبنا منه الأطباق التانية اللي ناقصة الجرسون قال لنا هيسأل إيه مكونات منيو رمضان لأنه مش عارفها! ودي تاني حاجة ضايقتنا، لأن كمان طبق السلاطة التاني اللي جالنا كان حجمه أصغر!

بعد ما نزل لنا كل الأكل بدأنا بالسلاطة اللي كانت فريش وحلوة جدًا بس الشيف حط فيها فلفل حراق ممكن ما يتقبلهاش الناس اللي ما بتحبش الأكل المشطشط، الأطباق الرئيسية كان طعمها حلو جدًا بس كان لنا تعليق على أن برام الخضار اللي نزل لنا كان بطاطس باللحم، ونازل معاها بطاطس محمرة وبالتالي كانت حاجة غريبة جدًا، المفروض كان الخضار يبقى نوع تاني.

بس الحقيقة لازم نعترف إن دي من المرات القليلة اللي ناكل فيها قطع لحمة مستوية بشكل هايل وكمان مافيهاش دهون وكميتها كبيرة، معمولة زي ما الكتاب بيقول، البيف ستيك كمان كانت تسويته ممتازة وصوص البلو تشيز كان رائع وقوامه مضبوط.

بعد ما خلصنا أكل سألنا على الحلو، خيرونا ما بين مهلبية وقمر الدين (مطبوخ) وكنافة بالنوتيلا وكنافة بالمانجا فاختارنا الأخيرة، شكلها كان حلو جدًا بس للأسف كانت ناشفة ومش Juicy زي ما المفروض تكون، حتى الكريمة فيها ما كانتش كتيرة، وإحنا ماشيين بلغنا تعليقاتنا لمدير المكان اللى كان ذوق جدًا ووعدنا أنهم هيشتغلوا على التعليقات دي.

ديفاز كمان عندهم منيو سحور فيها تشكيلة جبن وفول وطعمية وبيض ومقبلات وبطاطس وهتتبسطوا جدًا سواء من جودة الأكل أو الكميات عن تجربة، ممكن تعرفوا المنيو من هنا.

ديفاز كافيه مكان شيك وجرسونات محترمة وأكل حلو تستمتع به، ممكن تروح هناك لو أنت من سكان حدائق الأهرام أو الهرم وتستمتع بجو مختلف وأطفالك كمان هينطلقوا هناك، للحجز اتصلوا بـ 01006508090 أو زوروا صفحتهم على الفيسبوك علشان تعرفوا تفاصيل أكتر.

نصيحة 360

للحجز اتصلوا بـ 01006508090 أو زوروا صفحتهم على الفيسبوك علشان تعرفوا تفاصيل أكتر

أحسن حاجة

الأطباق الرئيسية مخدومة وطعمها حلو.

أسوأ حاجة

التأخير في نزول الأكل، وبعض الأكل محتاج يكون أفضل من كده.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح