The Definitive Guide to Living in the Capital , Cairo , Egypt

من فترة طويلة وإحنا
بـ نشوف المكان، لفت نظرنا الشكل المميز للقعدة، ومنظر الناس وهم طالين على الشارع
وفاتحين اللابتوب بتاعهم وقاعدين براحتهم.

أول ما دخلنا «سكند
كب – Second
Cup» حصلت حاجة مش لطيفة،
جري علينا الجرسون علشان يفتح الباب ويسألنا: ركن المدخنين ولا غير المدخنين؟ لو
كنت بـ تتوتر من الأسئلة والخدمة الزيادة هـ يضايقك تصرفه، في النهاية هو اللي
اختار المكان مش إحنا اللي اختارناه،  ودي
كانت حاجة مش لطيفة، رغم أن المكان كان شكله مريح.

داخل المحل مافيش أي علامة
من علامات الإعلان عن نفسهم، مش هـ تلاقيهم كاتبين أي حاجة واضحة عن أنهم أكبر
سلسلة محلات قهوة في كندا، ولا أنهم ثاني أكبر سلسلة محلات بـ تبيع القهوة على
مستوى العالم، لذلك ورغم جمال المكان وموقعه المميز على شارع جامعة الدول العربية،
إلا أننا حسينا إننا مقيدين، ولما قعدنا حسينا أن الكرسي كبير قوي علينا، ولو اثنين
قاعدين أمام بعض مش هـ يسمعوا بعض ولا هـ يعرفوا يتكلموا غير لما يبقوا قاعدين
قعدة مش مريحة.

بصينا في المنيو،
ولاقينا حاجات عادية جدًا ممكن تلاقيها في أي منيو لأي محلات مشابهة زي «سيلانترو
– Cilantro» أو «ستاربكس – Starbucks»، لكن لفت نظرنا صورة لمشروب الكراميل كوريتو، وده من اختراعهم وعبارة
عن نسكافيه بلبن وعلى وشه كريمة وكراميل، لكن القهوة فيه دوبل، وطعمه رائع بمعنى
الكلمة، مافيش منه صغير للأسف فيه فقط وسط وكبير، الوسط ثمنه 21، والكبير 23،
وكمان بـ يقدموا الكراميل كوريتو مثلج، إحنا جربنا السخن ونقدر نقول أنه جميل جدًا
وغني، وطعمه حلو فعلاً.

«سكند كب» بـ يقدم
سندويتشات بسيطة جنب المشروبات زي الروست بيف بالجبنة، والتونة، والتركي المدخن، وأنواع
ثانية مش كثير، بـ يتراوح ثمن السنديوتش بين 18 لـ 23 جنيه، غير أن عندهم سلاطات
زي الجريك سلاط وغيره أكثر من نوع بـ يتراوح ثمن طبق السلاطة بين 16-لـ 19 جنيه،
كمان عندهم كرواسون بالزعتر، وكراميل تشيز كيك، مافن، وبراوني، وغيره من التحليات،
بـ يتراوح ثمنها بين 7.5 لـ 21 جنيه.

أما المشروبات ففيه
منها كثير معروف زي المشروبات الطبيعية من مانجو وفراولة وبرتقال، وأنواع القهوة
والكابتشينو، والنسكافية، والشاي ساقع وسخن، والنكهات المختلفة المتاحة وهكذا.

المكان كان مليان
ناس، رغم أن المساحة مش كبيرة، وناس تدخل وناس تخرج، يمكن سر تميزه في ألوان الحوائط،
هادئة جدًا بيج في بني لون القهوة، ولولا الخدمة الزائدة اللي شفناها في الاستقبال،
واللي مش من القلب كنا قلنا أنه من أجمل الأماكن اللي ممكن تشرب فيها قهوة.

لو عندك مشروع تخرج،
أو مشوار شغل، أو قعدة اتفاقات ممكن تروح هناك، لا بأس به لأنه عملي جدًا، أما لو
عاوز تروح أنت وحبيبتك هناك علشان تشربوا قهوة وتتكلموا فالمكان مش مناسب قوي، مع
أن شعار المحل “فيه شوية حب في كل كوباية”.

الموقع الإلكتروني بتاعهم جميل، تقدر تدخل
عليه وتعرف أنواع المشروبات اللي بـ يقدموها، وقيمتها الغذائية بالتفصيل الممل،
وعدد السعرات الحرارية فيه وكمان مكوناته

الموقع بـ يقول أنك
تقدر تشتري القهوة بتاعتهم وتوصل لك لحد البيت، لكن مش موضحين هل ده ينطبق على مصر
ولا لأ.