The Definitive Guide to Living in the Capital , Cairo , Egypt

سكوبس – Scoops

سكوبس: الآيس كريم في أجمل صوره في أبراج نايل سيتي

تم التقييم بواسطة
Dina Mokhtar
قيم
قيم الآن
سكوبس: الآيس كريم في أجمل صوره في أبراج نايل سيتي

حاولنا نلاقي افتتاحية مناسبة للمقال، لاقينا أن أي كلام هنقوله عن الآيس الكريم مكرر وكليشيه؛ لأننا هنتكلم عن قد إيه الآيس كريم منعش ولذيذ –وخصوصًا في حر أغسطس- وأنه حلو خفيف مناسب لأي وقت في اليوم… كل الكلام ده قلناه قبل كده فهندخل في الموضوع على طول.  قررنا نعمل زيارة لواحد من أشهر الأماكن اللي بتقدم آيس كريم وهو سكوبس – Scoops، واللي موجود في أبراج نايل سيتي.

وبالرغم من أن نايل سيتي مول فيه مجموعة كبيرة من المحلات المميزة، إلا أن عامل الجذب الأساسي للمكان هو السينما. كنا بنفكر أن موقع المحل ممكن يكون ظلمه كثير، إلا أن وجوده ممكن يعمل خروجة ممتازة مكونة من سينما وآيس كريم.  المحل عبارة عن  ركن مفتوح فيه حوالي ترابيزتين مرتفعتين ممكن تستمتع عليهم بالآيس كريم، أما بقية المكان فهو عبارة عن كاونتر فيه ثلاجة آيس كريم فيها أنواع ونكهات كثيرة، ومجموعة من الإضافات اللي ممكن تحطها على الزبادي المثلج.

الآيس كريم أحجامه وأسعاره كالآتي، البولة الواحدة (16 جنيه)، الاثنين (30 جنيه) والثلاثة (40 جنيه). أما الزبادي المثلج فالعادي أسعاره من الأصغر للأكبر كالآتي 18 – 28 – 40 جنيه، ولو بنكهة 20 – 30 – 46 جنيه. أما الإضافات فالواحدة بـ 5 جنيه. سكوبس كمان عنده جيلاتو ستيكس وهي عبارة عن بولة آيس كريم بنكهات مميزة على عصاية (20 جنيه للواحدة)؛ من ضمن نكهاته شوكولاتة بالبندق وشوكولاتة دوبل بالفستق.

من مجموعة الآيس كريم اختارنا الآتي، بولة بنكهة الليمون بالنعناع، والثانية بالقهوة والثالثة تيراميسو. بالرغم من أننا من عشاق نكهة الليمون، إلا أننا كنا متشككين من طعم النعناع، واعتبرنا نفسنا بنجازف لما اخترناه. ولكن نعترف أنها كانت مجازفة في محلها، وخصوصًا أن ما فيش نكهة طاغية على الثانية، والاثنين مع بعض كانوا أكثر نكهة منعشة ذقناها في حياتنا.

وبما أننا بنقدر أي منتج بطعم القهوة، نقدر نقول أن نكهة القهوة في سكوبس لا يعلى عليها؛ لأن بعكس الأماكن الثانية اللي نكهة القهوة عنده بتبقى نكهة نسكافيه، أما نكهة سكوبس فأول المعلقة بتحس بطعم حلو بعدين تتخبط بنكهة القهوة القوية، ده غير حبات القهوة المحمصة اللي هتلاقيها كل شوية اللي أضافت قرمشة لنعومة قوام الآيس كريم.

أول ما هتدوق التيراميسو هتحس أن طعم القهوة مش واضح قوي وأن طعم بقية مكونات التيراميسو هو الطاغي؛ إلا أن مع أول قطعة كيك ظهرت لنا حسينا بطعم القهوة واكتمل طعم التيراميسو بالنسبة لنا.

أما الزبادي المثلج، فاخترنا الحجم الأصغر وأضافنا عليه جرانولا وقطع بسكويت الآيس كريم مكسرة. بالرغم من أن قطع الجرانولا كانت كبيرة فخلصت بسرعة وتمنينا أنها تكون مفتتة أكثر علشان نوزعها على الزبادي بأكبر شكل ممكن، الآيس كريم المكسر نكهته ما كنتش قوية زي ما توقعنا ولكن ساعد على أن يكون فيه قرمشة جانب قطع الجرانولا. ما فضلش غير أننا نقول أن طعم الزبادي كان رائع، مضبوط ما بين الطعم الحلو والطعم اللاذع المعتاد للزبادي. غير كده كمان سكوبس عنده زبادي مثلج بنكهة زبدة فول السوداني، وعجبتنا لما ذقناها، إلا أننا خوفنا طعمها القوي يغطي على طعم الإضافات اللي هنطلبها.

إجمالًا، نعتقد أن سكوبس من الأماكن اللي قدرت تحافظ على مستواها بمرور الوقت، فسواء القوام أو قوة النكهة وحتى الكمية مقابل سعر معقول… سكوبس قدر أنه يحقق الثلاثة دول بامتياز ويستحق الزيارة.  

نصيحة 360

سكوبس عنده كمان مجموعة من الميلك شيكس اللي ممكن تكونها بنفسك (34 جنيه)، ده غير أنهم بيقدموا فوندو الشوكولاتة (39 جنيه).

أحسن حاجة

الليمون بالنعناع... منعش!

أسوأ حاجة

ما فيش.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح