The Definitive Guide to Living in the Capital , Cairo , Egypt

الزبادي المثلج من ضمن الحلويات اللي انتشرت في الكام سنة اللي فاتت وفتحت لها مجموعة كبيرة من المحلات في القاهرة، وبالرغم من أن الزبادي المثلج يعتبر من مشتقات الآيس كريم –وبالنسبة لناس كثير ما يفرقش عنه في حاجة- إلا أن أكثر حاجة بـ تميزه عن الآيس كريم هو أن محلات كثير في مصر بـ تقدمه بدهون أقل، ده غير كم الإضافات اللانهائية اللي ممكن تضيفها عليه.

سويت فروج –  Sweet Frog  -واللي فتح من فترة في مول العرب- يعتبر من محلات الزبادي المثلج المشهورة على مستوى العالم، وده حمسنا أننا نشوف مدى اختلافه عن الأنواع الثانية اللي جربناها قبل كده، ولكل اللي ما يعرفش الموضوع بـ يمشي إزاي في محلات الزبادي المثلج، اسمح لنا نشرح لك؛ الموضوع ببساطة أنك بـ تخدم نفسك بنفسك، تروح تأخذ كوب بالحجم اللي تحبه وبعدين تملأه بأي نكهة تحبها من مجموعة ماكينات الزبادي المثلج، بالكمية اللي تحبها، ومنها تروح لـStation  الإضافات واللي عادة ما بـ تخرجش عن الآتي: مكسرات، كورن فليكس وموسلي، شوكولاتة وحلويات، إلخ… بعدها بـ توصل للحظة الحاسمة واللي بـ تحدد هـ تدفع كام، لأنك بـ تروح للكاشير وبـ توزن اللي أنت أخذته.

المهم؛ أول حاجة عجبتنا في سويت فروج، هو أن أحجام الأكواب كبيرة من أصغرها لأكبرها، بعكس أماكن كثيرة بـ يبقى الحجم الأصغر صغير قوي والحجم الأكبر منه على طول مبالغ فيه. عادة بـ نختار الزبادي المثلج بنكهته الأصلية، معتمدين على الإضافات اللي هـ نختارها بعد كده؛ وفي محاولة مننا أننا نعمل "اختيار صحي"، اختارنا النوع اللي بدهون أقل، وأضافنا عليه موسلي بالشوكولاتة وجوز الهند –طبعًا ده كله بالحجم الصغير (وزنه 160 جرام بـ 28 جنيه).  طعم الزبادي نفسه ما كانش أعظم حاجة في التاريخ لأنه كان خفيف جدًا لدرجة أنك تحس أنك بـ تأكل مياه مثلجة، ده غير أنه ما كانش فيه "مزازة" الزبادي المثلج اللي بـ نحبها، لكن تقبلنا طعمه بفضل الإضافات واللي كانت فريش خصوصًا الموسلي.

بالمقارنة مع محلات ثانية، الاختيارات ما كانتش كثيرة وخصوصًا الحلويات –اللي كان أغلبيتها نفس فكرة إم أند إمز وحلويات جافة، أما ركن الفاكهة فلاحظنا أن المكونات كلها فريش وشكلها يحمسك أنك تختار منها، مشكلة الـ Station الوحيدة أن الاختيارات مكانها وراء حاجز زجاجي فيه مكان ضيق تدخل منه أيدك بشكل غير مريح علشان تختار، ولو أن ده مصلحة في حد ذاتها علشان ما توزنش كثير برضه.

التجربة ما وقفتش عند هنا، ماكينات سويت فروج ممكن تعمل لك ميكس متساوى بين نكهتين، وطبعًا كان لازم نجربها؛ جربنا في نفس الكوب ميكس البطيخ والزبادي المثلج السادة، وشوكولاتة وقهوة، بعكس النوع اللي قلنا عليه في الفقرة اللي قبل اللي فاتت، الشوكولاتة والقهوة كانوا رائعين؛ الطعم كان متوازن بين حلاوة الشوكولاتة وطعم القهوة القوي، أما الميكس الثاني فكان البطيخ هو سيد الموقف، نكهته كانت أقوى من الزبادي العادي، وننصحكم أنكم تجربوه لوحده ومعاه فاكهة… أكيد الموضوع هـ يبقى رائع، زي ما قلنا الميكسين دول كانو في كوب واحد (وزنهم 155 جرام بـ 26 جنيه).

بالرغم من أن التجربة مش مختلفة اختلاف كبير عن تجاربنا مع أماكن ثانية من نفس النوع، إلا أن أكثر حاجة عجبتنا في سويت فروج هو تنوع نكهات الزبادي المثلج وجودتها.