The Definitive Guide to Living in the Capital , Cairo , Egypt

كافيهات
سويت كورنر – Sweet Corner

سويت كورنر: جاتوه طازة وحلويات ممتعة في المعادي

تم التقييم بواسطة
Nagla Ashraf
قيم
قيم الآن
سويت كورنر: جاتوه طازة وحلويات ممتعة في المعادي

محلات الحلويات في المعادي معروفة، وطبعًا ما بين عمالقة الحلوى زي Sale Sucre وDelight، ممكن نعتبر سويت كورنر – Sweet Corner فضل مدة زمنية طويلة محافظ على سمعته وجودة منتجاته.

أول ما دخلنا المكان تفاجأنا أنه لسه بـ يقدم منتجات رمضانية، وده كان شيء مبهج بالنسبة لنا، لسه فيه كنافة بالمانجو وكحك وبسكويت، كمان كان عامل تشكيلة جديدة من الماكرون الملون روز وأخضر وأصفر، الكيلو بـ 100 جنيه، ذوقنا واحدة كان طعمها حلو قوي، بس مسكرة زيادة عن اللزوم بالنسبة لنا ننصح بها لعشاق السكر.

كمان تشكيلة التورتات اللي عنده كانت حلوة قوي، ما بين تورتة أم أند أمز وكيت كات بـ 120 جنيه، وتورتة كنافة بالمانجو، والتورت العادية اللي نصف شوكولاتة ونصف فانيليا، بس الجديد كانت التورت اللي بـ يبقى عليها عجينة سكر للتزيين، وممكن تختار من الكتالوج الشكل اللي تحبه، لو عاوز تعمل عيد ميلاد مميز لطفل. كمان كان فيه تشكيلة حلويات شرقية بـ تُباع بالكيلو، وكنابيه (ساندويتشات صغيرة) النصف كيلو بـ 45 جنيه، وجاتوه سواريه بـ 70 جنيه، غير تورت الآيس كريم اللي بحوالي 130 جنيه.

نيجي بقى لأكثر حاجة بـ نحبها في سويت كورنر.. "الجاتوه"، ليه ده أكثر حاجة بـ نحبها عندهم؟ لأنه ببساطة مافيش في حلاوته، كمان بـ يبقى طازة جدًا لدرجة تخليه يذوب في فمك، مهما كان اللي طلبته، لما وصلنا ما كانوش حطوا كل الأنواع، فاستنينا شوية، وطلبنا 4 قطع: كراميل، وشوكولاتة بالكراميل، وفانيليا بالكيوي والأناناس، وبلاك فورست، القطعة الواحد بـ 9 جنيه، كمان كان فيه ميل في، وإكلير، وكور خالصة من الشوكولاتة، بس لأننا مش من محبي الشوكولاتة اكتفينا بالجاتوه.

نبدأ بقطعة الكراميل، وكانت حلوة جدًا وخفيفة، تدخلك في عالم ثاني مافيهوش غير السكر بس والعذوبة، أما قطعة البلاك فورست فلأننا من عشاقها فمش هـ نعرف نعطيها حقها في الوصف، بس هي كانت طازة ومنعشة، كمان قطعة الشوكولاتة بالكراميل كانت مختلفة، بس لأننا مش من عشاق الشوكولاتة ما حبيناهاش قوي، لكن اللي كانت متناهية الجمال هي قطعة الفانيليا بالكيوي والأناناس، بمجرد ما تأخد شوكة واحدة منها، هـ تطير لمدينة الفانيليا الساحرة، طبقات الكيكة الهشة الخفيفة مع الفانيليا الرائعة، المتوجة بالكيوي والأناناس، لازم تخطفك لمدينة السعادة اللي فيها كل منتجات الفانيليا بس.

باختصار سويت كونر من أحسن الأماكن اللي تشتري منها جاتوه، أو تورتة، نتمنى أنكم تستمتعوا بكل حاجة هناك.

نصيحة 360

تابعوهم على صفحتم على الفيسبوك.

أحسن حاجة

جاتوه الفانيليا بالأناناس والكيوي.

أسوأ حاجة

بعض المنتجات شكلها مش مغري قوي بس طعمها حكاية.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح