The Definitive Guide to Living in the Capital , Cairo , Egypt

أول ما فتح سينابون في مصر كان عليه إقبال كبير، بطعم العجينة اللي محشية قرفة وسمنة وكريمة على الوش اللذيذ وحجمه الكبير، وسنة وراء سنة بدأ يعمل حاجات ثانية جنب السينابون زي الكب كيك والمشروبات المختلفة والتقليدية سواء بالشوكولاتة أو الكراميل، وبدأ ينوع في اختلاف وطعم السينابون فـ بقى فيه بالكراميل وبالشوكولاتة وآخر حاجة جديدة حاولوا يجربوها كانت السينابون بالتوت، واللي ما ننكرش أننا شخصيًا كنا متحمسين جدًا أننا نذوقها، لكن للأسف مش دائمًا الصورة الحلوة يكون طعمها حلو، إحنا رحنا هناك مرتين، أول مرة جبنا سينابون بس وثاني مرة جربنا المشروبات.

في أول مرة طلبنا شوكوبون بـ 25.5 جنيه، وكان طعمه رائع مع صوص الشوكولاتة زائد الشوكولاتة اللي بين كل طبقة عجينة والثانية، وبرغم أن مافيش منه حجم صغير، إلا أنه يستاهل أنك تضحي بمجهود كبير تعمله علشان تحرق كمية السكر اللي هـ تدخلها جسمك، كمان طلبنا ميني بون بـ 18 جنيه، وكان طعمها حلو قوي، والاختراع اللي فضلنا منتظرينه مدة طويلة الـMixed berry  بـ 12 جنيه الصوص، و18 جنيه قطعة سينابون حجم صغير.

نبدأ منين؟ هي السينابون سادة لوحدها طعمها عادي وبـ يتحط عليها صوص توت بأكثر من نوع أحمر وأسود وأزرق، بس للأسف الصوص طعمه كان مزز جدًا ومش متناسب مع طعم السينابون، يعني ما ننصحش به خالص، لا شكل ولا طعم، للأسف مالوش أي علاقة بالصورة، وفي الزيارة الثانية طلبنا Lemonattas raspberry بـ 18 جنيه، والمفروض أن ده عصير ليمون بالتوت، لكن للأسف صوص التوت اللي اتحط مع الليمون كان سائل زيادة عن اللزوم مش كثيف وطعمه مسكر بزيادة، من الآخر كان غير متناسق وغريب.

برغم حبنا للتجربة إلا أن أكيد في زيارتنا الجاية لسينابون هـ نلتزم بالحاجات الكلاسيكية بتاعته اللي هو مشهور بها ومش هـ نجرب اختراعات ثاني، ونتمنى أنهم يحسنوا المرة الجاية لأن دائمًا بـ تواجهنا مشكلة في تعاملهم مع الزبائن، يعني هم ممكن يسيبوا الزبون واقف نصف ساعة لحد ما ينقلوا الشيفت لبعض، ولا كأن فيه زبون واقف وده حصل معانا بالفعل.