The Definitive Guide to Living in the Capital , Cairo , Egypt

كافيهات
شوجر اند سبايس – Sugar & Spice

شوجر اند سبايس: كافيه مبهج وأكلات خفيفة في سيتي ستارز

  • سيتي ستارز، الدور الرابع، المرحلة الثانية
  • مخبوزات وحلويات
  • 10 صباحًا - منتصف الليل -
تم التقييم بواسطة
Waleed Abuarab
قيم
قيم الآن
شوجر اند سبايس: كافيه مبهج وأكلات خفيفة في سيتي ستارز

تقريبًا ده آخر مطعم هـ نكتب عنه في ساحة طعام موزاييك الجديدة في الدور الرابع في المرحلة الثانية في مول سيتي ستارز، بعد ما زرنا كل المطاعم اللي فتحت هناك وآخرها الرائع «شيفز ماركت» كانت تجربتنا في  «شوجر اند سبايس – Sugar and Spice» وهو أقرب لكافيه من كونه مطعم، موجود بجوار مطعم «زوبا» مباشرة، لدرجة أنك هـ تشعر أن أماكن الجلوس مشتركة بين المطعمين، إلا أن الديكور المميزة لكل منهم بـ يخليك في آخر لحظة تعرف أنت هـ تقعد تبع أي مطعم.

شوجر اند سبايس من بعيد يبدو كانه بار عصائر وحلويات أكثر ما يبدو مطعم أو كافيه، قربنا منه ودخلنا “حرم” المكان في الفوود كورت واتفاجئنا بتصميم رائع للديكور والألوان المستخدمة في القعدات والترابيزات وشكل المنيو. المكان مبهج بكل ما تحمله الكلمة من معنى، من أول الديكور لحد أنواع الأطعمة والحلويات اللي بـ يقدمها، وكمان معاملة الويترز، وبـ يأكد على كلامنا أن كان في ترابيزتين عليهم احتفالات بعيد ميلاد وقت زيارتنا وتورتة وشمع وأغاني، أكيد مش أي مكان بـ يبقى مووده مناسب للاحتفال وقضاء وقت مبهج، فأول حاجة لازم نشيد بها هي طابع المكان المفرح اللي الإدارة نجحت في تأكيده في كل التفاصيل.

منيو «شوجر اند سبايس» فيه ساندويتشات ورابس وبرجر وباستا وسلاطات وحلويات ومشروبات متنوعة، مافيش أي أطباق، كله ساندويتشات، يعني أكلتك هنا لازم تبقى خفيفة وأقرب للأكل الصحي، حتى الباستا هنا كانت بأعشاب وإضافات خالية من الدهون، والبرجر من بيف بقري معمول خصيصًا بدهون أقل داخل مطبخ المطعم، والأسعار بشكل عام معقولة ومناسبة لطبيعة المكان ووجوده في أهم وأغلى مساحة في سيتي ستارز.

طلبنا شوربة مشروم بالصنوبر (24 جنيه) ودي المشروم فيها بـ يبقى مطحون وبـ تتقدم بقوام سميك غني بالطعم والمكسرات، بداية ممتازة لوجبتنا هنا، والمذاق احترافي لأقصى درجة. بعده سلاطة روكا ستيك (46 جنيه) اللي فيها قطع ستيك مشوية على الجريل وعيدان جرجير وطماطم شيري وجبن بارميجان وعين جمل ومغطاة بدريسنج الخل البلسمي، ودي من أحلى السلاطات اللي ممكن تأكلها في سيتي ستارز، وشوفنا ناس حوالينا بـ تيجي مخصوص علشان تأكل سالاد من عند شوجر اند سبايس، شابوه بجد.

برجر شوجر اند سبايس (51 جنيه) بـ يتقدم مع بطاطس ومخلل، حجمه كبير ومشبع واللحم نظيف ومتبل كويس، لكن مافيش مذاق مميز يخلينا نقول أنه أحسن حاجة تتطبلها هنا، انما الـ Pink Penne اللي بـ 44 جنيه أو البنا بقطع الدجاج والموتزاريلا والصوص الوردي الغامض اللي مديها لونها الرائع، كان طبق خطير فعلًا، وأحسن من أي بنا فتوتشيني ممكن تأكلها في أماكن كثير، والكمية كويسة وشكل التقديم يفتح النفس. إذن الأكل هنا حلو في المجمل، يعني مش مجرد كافيه بـ يقدم شوية أكلات، لأ فيه حرفنة في الموضوع. الحلويات قبل ما تطلبها ممكن تشوف شكلها في الصور الملصقة على الجدران، واللي ريقك يجري عليه أكثر أطلبه بدون تردد، هم شاطرين قوي في الحلويات لأن ده الجانب الأولاني من اسم المكان “Sugar” وبـ نرشح لك الشوكليت فوندو (31 جنيه) بس اطلبها قبل ما تحب تأكلها بـ 20 دقيقة على الأقل علشان بـ يعملوها فريش، وبـ تتقدم مع الآيس كريم بالفانيليا، يمكن بس احنا استعجلنا عليها شوية فاتقدمت طرية شوية وفيها رائحة الخبيز على غير رغبتنا، كانت محتاجة 5 دقائق كمان في الفرن.

زي ما قلنا الخدمة جيدة جدًا، بس حصل شوية لخبطة في شيك الحساب وجالنا غلط أكثر من مرة، فلازم تبص في الشيك بتاعك كويس قبل ما تدفع الفلوس، غير كدة أنت أكيد شخص مبسوط بوجودك في شوجر اند سبايس.

نصيحة 360

مشهورين ببرطمان الـ "Goodie Jar" بكيك الفيلفت الأحمر أو الشوكولاتة بالآيس كريم، اختراع لازم تجربوه.

أحسن حاجة

ألوان المكان المبهجة.

أسوأ حاجة

التنوع قليل في المنيو.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح