The Definitive Guide to Living in the Capital , Cairo , Egypt

كافيهات
شيكاغو – Chicago

شيكاغو: وتستمر لعنة 45 شارع ميشيل باخوم في الدقي

  • 45 شارع ميشيل باخوم، الدقي.
تم التقييم بواسطة
Ramy Soliman
قيم
قيم الآن
شيكاغو: وتستمر لعنة 45 شارع ميشيل باخوم في الدقي

كان يا مكان في يوم من الأيام وإحنا صغيرين كان فيه محل على شارع ميشيل باخوم في الدقي، والمحل ده ناس كتير على مدار السنين حاولت تفتح فيه مطاعم وكافيهات، لكن دائمًا المشروع كان بيفشل ويقفلوا بسرعة.

من وقت قريب المحل قفل ورجع فتح فيه مطعم وكافيه اسمه شيكاغو. طبعًا كان لازم نروح ونشوف هل هيقدر يقاوم التيار ولا هيقفل زي أفينيو والسفرة وغيرهم من المطاعم والكافيهات اللي كانت موجودة في نفس المكان قبله وقفلت!

المكان من بره شكله لطيف خصوصًا مع الشباك الكبير اللي بيخليك تشوف كل حاجة. المكان من جوه عبارة عن كافيه عادي بديكورات مش مترابطة وماتحسش فيه بهوية معينة. جايز لما تشوف بوسترات ناطحات السحاب اللي بالأبيض والأسود وصور زعماء المافيا الكرتون على وش المنيو تفتكر إنهم قاصدين يفكرونا بزعماء المافيا زي أل كابوني وميكي كوهين، بس الموضوع تحسه قديم فعلًا.

 

 

إحنا من أنصار إننا مانحكمش على كتاب من صورة الغلاف، وعلشان كده كان لازم نجرب الأكل ونبتدي بطبق مقبلات ناتشو جريلد تشيكن (100 جنيه) علشان نشوف إيه الأخبار. الطبق عبارة عن تورتيلا سادة عليها شوية جبنة شيدر وفاصوليا حمراء ومكعبات فراخ باردة جدًا ومالهاش طعم مميز، وفوقهم ساور كريم ثقيل. الطبق اللي بنتكلم عليه سعره 100 جنيه؛ تخيلوا!

 

 

الموضوع كان أسوأ مع الأطباق الرئيسية. طلبنا تويستد ماك تشيكن أند تشيز (95 جنيه) وده عبارة عن طبق مكرونة مالهاش طعم ومافيش عليها أي جبنة أو صوص، وعليها فراخ مشوية برضه محتاجة تتبلة أو شوية بهارات حتى يعملوا طعم حلو. الحاجة الوحيدة الحلوة في الطبق كان العيش بالثوم الكبير اللي بينزل معاه.

 

 

بعدها جربنا أل كابوني برجر (99 جنيه) وده المفروض إنه برجر بيتي بس جودة اللحمة مش على المستوى. قطعة اللحمة كانت ناشفة باستفزاز، وحتى قطعة حلقة البصل الوحيدة وشوية البيكون والجبنة القليلين قللوا أكتر من طعم الساندويتش.

 

 

أخر حاجة جربناها كانت فيليه ستيك ساندويتش (95 جنيه) وكان أرحم شوية من اللي فاتوا. الساندويتش مليان شرائح لحمة رفيعة وفلفل مشوي ومشروم وبصل، وكمان فكرة الخلطة اللي تشبه الفاهيتا مع الجبنة الموتزاريلا السايحة على الوش عملوا شكل جميل للساندويتش. هو يعتبر ساندويتش كويس لو معمول في كافيه.

 

 

نهاية رحلتنا كانت مع الكاروت كيك (49 جنيه). الكيكة كانت ناشفة شوية والفروستنج كان مسكر بزيادة، وبينزل معاها آيس كريم مانجو. هو بصراحة التركيبة بين كيكة الجزر والجيلاتي بالمانجو كانت لطيفة، بس المشكلة كانت في كتل السكر الغريبة اللي تحت الجيلاتي.

 

 ممكن نقول إن طبق الحلو كان الحاجة الوحيدة الملفتة في منيو تقليدية جدًا. وصحيح الموظفين هناك كانوا هايلين والخدمة كويسة بشكل عام، بس مافيش حاجة تخلينا نرجع تاني بعد ما شوفنا مستوى الأكل والأسعار الغالية والمكان نفسه.

نصيحة 360

تقدروا تعرفوا أكتر عن شيكاغو من الفيديو الجميل ده.

أحسن حاجة

الستيك ساندويتش وطبق الحلو كانوا أحسن الوحشين.

أسوأ حاجة

كل حاجة هناك محتاجة شغل أكتر.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح