The Definitive Guide to Living in the Capital , Cairo , Egypt

بقلم وكاميرا: رنا شرف

من فترة، قدمنا لكم مقال عن “جروبي” (هتلاقوه في اللينك ده)، وبما إننا حبينا تجربة الرجوع للماضي، قررنا النهارده نروح مكان تاني من نفس زمن جروبي، مكان من روايح الزمن الجميل، بنتكلم عن الأمريكين.. تعالوا نتعرف أكتر عليه.

بداية الأمريكين في مصر

سنة 1943 ظهر في القاهرة الأمريكين، ووقتها كان بيستهدف الطبقة العاملة في منطقة وسط البلد، وكان بيقدم لهم وجبات ومشروبات بأسعار بسيطة مقارنة بجروبي مثلًا، يعني الأمريكين كان في الوقت ده بيعتبر مكان شعبي للناس اللي بتدور على قعدة حلوة في القاهرة بسعر مناسب.  

يلا بينا على الأمريكين

روحنا الأمريكين، في 44 شارع طلعت حرب، والحقيقة المكان جميل، بتميزه روح زمان وهتحسوا فيه فعلًا بتاريخ القاهرة.

أول ما هتدخل المكان، هتلاقي نفسك دخلت جو كلاسيكي، وكأنك روحت لفترة من زمن الأبيض والأسود.

الديكور في الأمريكين بسيط جدًا، لكن المكان مبهج وهيخليك تحس بسعادة كبيرة.

جربنا هناك من الحلويات مولتون كيك، والحقيقة كان جميل وخفيف، وسعره 45 جنيه بس.

طلبنا كمان موكا، وكان الطعم مظبوط ومخدوم كويس، والسعر 37 جنيه.

حبينا إن الأسعار في المكان لطيفة وفي المعقول، ونقدر نقول إن المكان حلو ومناسب لأي حد حابب ياخد قهوة أو حاجة حلوة في وسط يوم متعب.

عجبنا إن المكان فيه كل أنواع الحلويات والعصائر والمشروبات الساخنة، وبننصحكم بزيارته.. أكيد هتستمتعوا زي ما إحنا استمتعنا.