The Definitive Guide to Living in the Capital , Cairo , Egypt

لو رجليك مشيت بك لمساكن شيراتون أكيد هـ تحب تقف تشرب عصير أو تأكل فخفخينا
من عند المحل ده، خاصة أنه من رائحة الحبايب. «عصائر حمادة» الفرع المتخصص في
العصائر من محلات (حمادة) اللي غزت شارع أنقرة مؤخرًا بعد ما أصبح اسم مساكن
شيراتون مرتبط باسم عربية الفول بتاعة (حمادة) أو «حمادة شيراتون» أو في رواية
ثانية (حمادة الدولي). في وقت من الأوقات كانت الناس بـ تروح مساكن شيراتون بس
علشان تأكل من عند حمادة وتشرب عصير من الـ FBI اللي كان مكسر الدنيا وقتها أيام ما كان الشباب بـ
يروحوا يعملوا دريفتات بعربياتهم في الأرض الفاضية اللي هناك. وعلشان كده واضح أن
إدارة محل فول حمادة (هو اشترى محل واستغنى عن العربية) قررت تعمل ستاند عصائر
كمان قريب منها أو بمعنى أصح لازق فيها علشان اللي ييجي عند (حمادة) يأخذ الكورس
كله مرة واحدة من نفس المكان، ومش بعيد قريب يوسعوا الشارع أمامهم شوية علشان
الناس تيجي تلعب بعربياتها ويسترجعوا مجد مساكن شيراتون القديم بالكامل.

العصائر هنا فيه منها العادي أو التقليدي بـ 3 أحجام من 3 لـ 8 جنيه، زي
عصائر الفاكهة العادية، فيه جرانيتا بـ 4 و6 جنيه، وقسم خاص في المنيو لمشروبات
الشوكولاتة زي السنيكرز والكيت كات
والتويكس والمارس مع إضافات من الفانيليا والمانجو والفراولة، ودي أغلى
حاجة في المنيو، الحجم الكبير بـ 12 جنيه والجامبو بـ 15 جنيه. وفيه مشروبات زبادي
بالعسل والفاكهة هم مسمينها زبادو بـ 5 و7جنيه. وأخيرًا الفروت سلاط بالآيس كريم
أو المكسرات أو كله على بعضه وده بـ يبقى اسمه حمادة سبيشيال بـ 10 جنيه.

الحاجات اللي مش تقليدية بقى هنا فيه منها التقليد لمحلات عصائر ثانية
مشهورة زي الرضعات وأسمائها اللي مش لطيفة خالص بالنسبة لنا، رضعة الأسد والنمر
والفيل والقرد والكلام ده ودي من الآخر بـ تبقى عبارة عن سوبيا بالآيس كريم وبـ
يضاف لها نوع فاكهة أو شوكولاتة وموجودة بـ 3 أحجام برضه. ابتكارات حمادة موجودة
في قسم الكوكتيلات وأسمائها ظريفة زي: سي بلاس، بوم بيري، هوريكان، باهاما ماما، كاليبسو
وشوربة عدس.. ولو بصيت لكل اسم هـ تلاقيه له علاقة بمكوناته، سواء فواكة
استوائية أو فيتامين سي أو غيره، وشوربة
العدس ده بـ يبقى شبه شوربة العدس فعلًا ولونه لأن مكوناته الأساسية هي المانجو
والموز. السعر موحد لكل الكوكتيلات 7 جنيه، و9 جنيه للجامبو. فيه مشروبات المكسرات
باللبن بـ 6 و10 جنيه وقسم المشروبات الشعبية زي القصب والتمر هندي والكركديه
والخروب بـ 1.5 جنيه لـ 3 جنيه.

تقريبًا جربنا كل الحاجات عند «حمادة» في مرات متفرقة، وعجبنا العصائر
الفريش والكوكتيلات المبتكرة بتاعته، بس ما عجبناش الفروت سلاط السبيشيال عنده
لأنه بـ يعمل الحركة السخيفة اللي بـ يعملها للأسف كل محلات العصير في مصر وهي أنه
بـ يملأه كانتلوب أكثر من أي فاكهة ثانية فبـ تحس أنك بـ تأكل طبق كنتلوب مش
سلاطة فواكة خالص.

عمومًا الوقفة أمام المحل مسلية والشارع هادئ نوعًا ما فممكن تفضل واقف
وتشرب أكثر من نوع عصير في الحر اللي إحنا فيه، والخدمة هنا طبعًا سريعة وبـ ييجوا
لحد العربية. بعد طبق الفول المتين من «حمادة شيراتون» اخبط شوب عصير من «عصائر
حمادة».