The Definitive Guide to Living in the Capital , Cairo , Egypt

فلوكيجر – Fluckiger

فلوكيجر: حلويات منظر بس في المهندسين

تم التقييم بواسطة
Dina Mokhtar
قيم
قيم الآن
فلوكيجر: حلويات منظر بس في المهندسين

الحلويات هي الشيء الوحيد اللي مافيهاش وسط؛ هي يا حلوة بجد، يا غير قابلة للاستهلاك الآدمي، لسبب بسيط أنها معمولة علشان تدلع بها نفسك بعد أي وجبة، أو علشان تكسر بها ملل الدايت… أو لوعندك مثلًا اكتئاب تبقى هي الحاجة الحلوة اللي تفرح لك دنيتك… أو تكئبك أكثر لو هي مش حلوة… ده مثلًا!

“فلوكيجر – Fluckiger” المفروض أنه اسم كبير في إسكندرية، وبالتالي لما عرفنا أنه فتح في القاهرة، ومش بس كده، ده كمان قريب مننا في المهندسين، قررنا أننا نروح نشوف بنفسنا المحل الأسطورة اللي إسكندرية بـ تفخر به.

الواجهة الخارجية توحي بالأهمية والأبهة، من غير ما ندخل عرفنا أن أكيد فيه مكان نقعد فيه ونستمتع بقهوة فريش مع الحلويات. المكان من الداخل واسع، حوائطه البيضاء توحي بالنظافة والأناقة في الوقت نفسه. الدور العلوي للمحل هو المكان اللي فيه الكافيه، واللي للأسف مجهز بالكامل، إلا أنه ناقصه شيء واحد بس… الافتتاح. الكافيه هـ يُفتتح بعد رمضان… ليه؟ مش عارفين! طبعًا عرفنا أننا من الشارع وإلى الشارع سنعود… تخيل بـ تأكل جاتوه وأنت ساند على عربية في شارع البطل أحمد عبد العزيز… يا لها من أناقة!

جزء الحلويات الشرقية على اليمين أول ما تدخل المحل، المعروضات متنوعة وشكلها جميل… بس المهم الطعم، أما على الشِمال مجموعة الحلويات الغربية (الجاتوهات والتورتات) والحوادق، الثانية كانت كميتها محدودة جدًا سواء في النوع أو العدد.

الجاتوه (13.25 جنيه) موجود منه الأنواع المشهورة اللي ممكن تلاقيها في كل مكان: زي الإكلير بنكهاته المختلفة والماركيز (اللي هو جاتوه شوكولاتة عادي… من غير فذلكة) الجميل أننا لاقينا أنواع مبتكرة وجديدة، وهي دي اللي وقع اختيارنا عليها.

طلبنا جاتوه الفراولة بالموز، طبقتين من الكيك الإسفنجي، بينهم موس الفراولة بالموز، كل ده مُغطى بقطع الفراولة والجيلي. مبدئيًا، الجاتوه ككل ناقص سكر، ده غير أكذوبة الموز اللي ما كانش له أي وجود أو حتى نكهة.

جربنا سابليه الشوكولاتة بالكريمة اللباني والتوت… هو عبارة عن 3 قطع من السابليه بينهم كريمة وعليهم قطعة توت يتيمة بنقطتين صوص بالعدد. الشوكولاتة المستخدمة في السابليه رديئة جدًا، ده غير أن السابليه نفسه كان ناشف (بعكس اللي قيل لنا) وبالتالي ما عرفناش نأكله، لأننا بمجرد ما دبينا الشوكة فيه تحول إلى كتلة ركامية غير مفهومة.

قلنا لو الاختراعات بـ تشطح منهم، نجرب حاجة عادية يمكن التفرد يظهر فيها، طلبنا بسكويت نشادر (نظن مافيش أبسط من كده!) (1/4 كيلو بـ 12.5 جنيه) كان عادي جدًا. أما من الحوادق جربنا كاريه الجبنة الرومي (1/4 كيلو بـ 25 جنيه)، عجينة هشة مربعة بالجبنة… هو إحنا عاوزين نحدق بس مش لدرجة أننا نشرب زجاجة كاملة من المياه بعدها!

التجربة بالنسبة لنا كانت مؤسفة… ومازلنا مش متخيلين أن محل حلويات يبقى اسمه “فلوكجير” أيًا كانت الأسباب. يبقى الشيء الوحيد اللي كان أكثر من رائع في المكان كله هي الخدمة الممتازة والمعاملة الرائعة.

نصيحة 360

المحل بـ يقدم لك خدمة تجهيز تورت وجاتوهات تحت الطلب لو عندك مناسبة.

أحسن حاجة

ده فعلًا المكان اللي بـ يقدم لك المعنى الحرفي لمثل: "لاقيني ولا تغديني". المعاملة رائعة!

أسوأ حاجة

سابليه الشوكولاتة بالكريمة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح