The Definitive Guide to Living in the Capital , Cairo , Egypt

كافيهات
فوجز – Fog’s

فوجز-Fogs: سبع صنايع في كافيه ووتر واي

تم التقييم بواسطة
Omar Yousry
قيم
قيم الآن
فوجز-Fogs: سبع صنايع في كافيه ووتر واي

وسط عالم موازي من المطاعم والكافيهات اللي ماليين القاهرة من شرقها لغربها، وطبعًا مش هتلاقي أكتر من الأسماء الكبيرة والأماكن المشهورة، ولو دورت بينهم هتلاقي “فوجز-Fogs”، وده كافيه صغير في ووتر واي. المكان هناك هادي ومريح ومناسب جدًا لو عايز تخلص شغل أو تذاكر، أو حتى قعدة لذيذة مع أصحابك. القعدة هناك عبارة عن كراسي مريحة، والديكورات بسيطة ومفيهاش مبالغة، والحيطان معمولة بألواح الخشب اللي عامل للمكان شكل أنتيكي.

المنيو في فوجز صغيرة شوية، بس عمومًا إحنا طلبنا كاساديا تشيكن (53 جنيه) وتشيكن تندرز (46 جنيه) ووينجز (55 جنيه) وكريمي بيكد ديب (43 جنيه).

الكاساديا كانت مقرمشة ولذيذة والفراخ جواها طرية ومعاها فلفل أخضر وجبنة سايحة، والطبق ده يعتبر اختيار هايل لو محتاج سناك سريع ولذيذ.

لما نتكلم عن الوينجز لازم نتكلم عن الطعم المدخن، والوينجز هناك بتكون عايمة في صوص باربيكيو مسكر شوية بيغلي من كتر السخونة. يمكن الوينجز كانت معجنة شوية، بس بصراحة اللحمة كانت طرية جدًا.

أما الكريمي بيكد ديب فكانت جبنة موتزاريلا مع عجينة بني مليانة بهارات وتوابل، مع شوية ملح وشطة كتير جدًا. مرة تانية بنقول إنه طبق بسيط صحيح بس لذيذ وطعمه حلو خصوصًا مع العيش المحمص.

نروح للتشيكن تندرز اللي بتتكون من خمس أصابع ذهبية مقرمشة. يمكن طعمهم كان عادي، بس الطعم بيتحسن كتير لما تغمسه في صوص 1000 أيلاند.

تعالوا نروح للأطباق الرئيسية ونجرب فيلي تشيز ستيك سلايدرز (57 جنيه) وفوجز برجر (52.90 جنيه) وعليه بيكون (12 جنيه). الأطباق كلها بتنزل على صواني خشب ومعاها بطاطس محمرة بالملح والفلفل في طبق معدن.

كل طبق من أطباق السلايدر عبارة عن ثلاثة ساندويتشات سلايدر ماشية بينهم شريحة جبنة سايحة. ابتدينا بالفيلي تشيز ستيك وده عبارة عن بصل مكرمل وفلفل أخضر ومشروم، وطبعًا الجبنة. اللحمة كانت مستوية زيادة شوية ومحتاجة وقت للمضغ، بس رائحة الشواء بتاعتها كانت تحفة.

أما الفوجز برجر فمكانش على المستوى. قطعة البرجر واضح إنها مش طازة ومفيش فيها تتبيلة لدرجة إننا مش قادرين نحس بطعم اللحمة في الموضوع.

وصلنا لمرحلة الحلويات، والحلويات انهاردة كانت ستاكد آيس كريم براوني Stacked PB Ice-Cream Brownie ثمنه (35 جنيه) وتشيز كيك (43 جنيه). الستاكد براوني كانت عبارة عن قطعتين معمولين ساندويتش وبينهم كمية زبدة فول سوداني محترمة، وعليهم بولة آيس كريم فانيليا وصوص شوكولاتة على الوش.

البراونيز كانت دافئة وده ساعد زبدة الفول السوداني إنها تسيح شوية، وكمان كان فيها فادج شوكولاتة مسكر وجميل وده عمل طعم هايل مع نكهة زبدة الفول السوداني المملحة.

بعدها كان الدور على التشيز كيك الخفيفة جدًا جدًا، والحلو فيها كمان كان الشوكولاتة المبشورة اللي عملت نكهة مسكرة جميلة. مرة تانية وتالتة هنقول على الطبق إنه بسيط لكن هايل.  

طبعًا الشيشة دلوقتي من الثوابت في أي كافيه مصري، وفوجز مش هيكسر القاعدة أكيد. الشيشة هناك سعرها 57 جنيه بحالهم، وممكن تختار شيشة عادية أو شيشة زجاج. الشيشة الزجاج دي عبارة عن زجاجة وفوقها طبق زجاج برضه عليه الفحم والتبغ. ميزة الشيشة في فوجز إنها سالكة ومش مفحمة، وبالتالي حسينا في كل نفس بطعم البطيخ المميز.

طيب دلوقتي ممكن نميز فوجز بإيه؟ هل هو مطعم؟ صحيح عندهم أكل لكن صعب ينافسوا جيرانهم في ووتر واي. ممكن نقول إنه كافيه؟ هو فعلًا هناك الحلويات والمشروبات كويسة، بس ستاربكس جنبهم والاتنين سعرهم قريب. نقول الشيشة وخلاص؟ الشيشة هناك تحفة بصراحة، بس تفتكروا الشيشة كفاية؟

عايزين تعرفوا رأينا في تجربتنا مع فوجز؟ المكان هناك بيقدم أكل كويس وحلويات ومشروبات حلوين وكمان الجرسونات لطاف والشيشة تحفة، بس الفكرة إن أماكن كتير فيها نفس الكلام فمفيش حاجة تخليك تروحلهم وتسيب بقية المطاعم والكافيهات هناك.

نصيحة 360

فوجز بيشغلوا الماتشات والأحداث الرياضية المهمة.

أحسن حاجة

عندهم حاجة من كل حاجة.

أسوأ حاجة

مافيش ميزة واضحة تخلينا نروح مخصوص ونسيب بقية الأماكن في ووتر واي.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح