The Definitive Guide to Living in the Capital , Cairo , Egypt

كافيهات
قعدة عربي

قعدة عربي: مكان لطيف في الزمالك.. لكن تجربة عادية جدًا

  • 140 شارع 26 يوليو، الزمالك
  • 08:00 - 03:00
تم التقييم بواسطة
Mohammed Sabry
قيم
قيم الآن
قعدة عربي: مكان لطيف في الزمالك.. لكن تجربة عادية جدًا

الكافيهات اللي بتقدم أكل موجودة في كل حتة. وأكيد موجود منها في منطقة الزمالك، اللي مليانة كافيهات ومطاعم في كل شبر. وإحنا بنلف في شوارع الزمالك عينينا وقعت على كافيه ومطعم “قعدة عربي”. فقولنا ندخل نجربه ونشوف بيقدم إيه.

بصراحة أول ما دخلنا كان الاستقبال لطيف جدًا، مع ابتسامة جميلة من اللي شغالين في المكان. وأول ما قعدنا على الترابيزة، على طول نزلت زجاجة الميه ومعاها الكوباية. وواحد حط المنيو علشان نختار.

imag0202

اختيارات الأكل كانت أغلبها عادية ومفيهاش جديد، فطلبنا طاجن مسقعة باللحمة المفرومة “51 جنيه”. وكمان شوربة لسان عصفور “23 جنيه. الشوربة نزلت الأول بدون تأخير، ومعاها نص الليمونة اللي بالنسبة لك أهم من الشوربة نفسها، علشان يظبط الطعم. لكن للأسف الشوربة كان طعمها مش حلو أوي. ولسان العصفور كان ناشف شوية، كأنه ماستواش كويس.

أما طاجن المسقعة باللحمة المفرومة فنزل متأخر شوية. بس إحنا تجاوزنا ده لإنه نزل سخن كأنه لسه جاي من على النار لنا على طول. الطاجن عوض شوية الطعم بتاع لسان العصفور لأنه كان أفضل منه. ده غير إن حجمه الكبير يشبعك لو انت جعان. والجميل بقى إنه نزل مع الطاجن طبق أرز صغير، كان هو أحلى طعم في الأكلة كلها. من الآخر كده ظبطها.

بصينا بقى على جزء الحلويات والعصائر، لقيناه برضه عادي ومفيش جديد. فطلبنا أم علي بالمكسرات “35 جنيه”. ودي بقا للأسف خيبت ظننا لأن طعمها ماكنش حلو وماقدرناش نكملها.

4984911-1117947270

الكافيه من جوة إضائته هادية ومريحة. إنما بالنسبة للديكور فكل علاقتهم بالقعدة العربي هي الفرش اللي على الكنب والترابيزات. يعني بتكون قاعد على كنبة مودرن عادية بس عليها فرش واخد الشكل العربي. إنما المكان في المجمل لطيف، خصوصًا لو انت جعان أو عايز تشرب حاجة في السريع.

نصيحة 360

قعدة عربي، كافيه مناسب لحالات الخروجات الطارئة في الزمالك، اللي بتيجي فجأة. لكن مش أحسن حاجة.

أحسن حاجة

الخدمة فيه حلوة جدًا والناس اللي شغالين لطاف ومحترمين.

أسوأ حاجة

مفيش no smoking area. فانت لو مش بتدخن والشيشة بتتعبك مش هتبقى مرتاح.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح