The Definitive Guide to Living in the Capital , Cairo , Egypt

فكرة أنكم تتعلموا رياضة ركوب العجل علشان تمارسوها في يوم كرياضة، فكرة لطيفة جدًا، وفيه أماكن كتير بتوفرلكم تعليم العجل في القاهرة، لكن في الموضوع ده هنكلمكم عن مكان مختلف، كنا رايحينه علشان بس نشرب فيه قهوة، ولكن لقينا عنده عجل بأنواع وماركات مختلفة مع كل إكسسواراته وقطع غياره.

المكان اللي بنتكلم عليه هو Bike Yard Cafe، وده لأن هدفهم ينشروا مفهوم ركوب العجل في مصر، وكمان يوفروا مكان لراحة الدراجين، وخلال السطور الجاية هنقول لكم على تفاصيل تجربتنا في المكان الجميل ده.

المكان صغير مش كبير، ولكن ديكوراته معمولة بعناية والترابيزات والكراسي تليق بالمعادي الجميلة، وأول ما تنزلوا درجات السلم اللي بتؤدي للمكان هتلاقوا بار خارجي تقدروا تاخدوا قهوتكم فيه، وجوه المكان هتلاقوا عالم كامل من العجل (الدراجات) بيحتل جزء كبير من الكافيه، وكمان هتلاقوا خريطة المعادي على حائط المكان معمولة بشكل إبداعي ولطيف.

كافيه Bike Yard بيقدم دورات تدريبية يعلم فيها كل الفئات ركوب العجل، وده شيئ عظيم أنه يبقى بيحصل في القاهرة، وكمان ممكن تأجروا منه عجل، أو تشتروا عجل وإكسسوار وقطع غيار، وكمان عندهم فكرة لطيفة لكل الناس اللي بتحب تذاكر، مش مهم تشرب حاجة عندهم بس المهم تذاكر، وحتى فيه أوقات بيعملوا فيها “ضيافة” للشباب علشان تذاكر بمشروبات مجانية، المهم تذاكروا، وطبعًا المذاكرة تكون بعيد عن وقت الماتشات اللي بتتذاع عندهم، وكمان عندهم مكتبة كتب حلوة لعشاق القراءة.

بصراحة احنا مكتفناش اننا نعرف تفاصيل عنهم وبس، لا إحنا كمان جربنا المشروبات بتاعتهم مرتين مش مرة واحدة، الأول جربنا في المكان والتانية كانت تيك أواي، وطلبنا كابتشينو وكان سعره 34 جنيه، وجودته كانت عالية جدًا، وكمان القهوة التركي عندهم بـ15  جنيه، وخلينا نعترف أنها كانت فوق توقعاتنا من حيث جودة البن المستخدم، وعندهم كل أنواع البن.

تقدروا تعرفوا أكتر عن Bike Yard من خلال صفحة الفيسبوك من هنا.