The Definitive Guide to Living in the Capital , Cairo , Egypt

كافيهات
كريستال كافيه – Crystal Cafe

كريستال كافيه: سندويتشات على كورنيش المعادي

  • مركب نايل كريستال، أول طريق المعادي
  • شيشة
  • 10 صباحاً - منتصف الليل -
تم التقييم بواسطة
Melissa Howell
قيم
قيم الآن
كريستال كافيه: سندويتشات على كورنيش المعادي

من أروع الحاجات في القاهرة كورنيش النيل وكل المحلات
والمطاعم والفنادق اللي عليه وكمان البواخر والمطاعم العايمة اللي جوة النهر نفسه.
كورنيش المعادي من أجمل أجزاء الكورنيش بسلسلة كبيرة من المطاعم والكافيهات ومنها المكان
بتاعنا النهارده «كريستال كافيه». موجود في أول كورنيش المعادي بعد محطة بنزين
التعاون على الصف التاني، المركب السياحية اللي فيها الكافيه إسمها «نايل كريستال»
وهي تابعة لشركة «مصر للسياحة»، بـ تعمل كل يوم رحلات نهرية فيها غذاء وعشاء، وبـ
يكون فيه عرض تنورة ورقص شرقى وفرق موسيقية بـ تلعب مزيكا لايف، بس لو بـ تقلق من
المية عموماً وتفضَّل تاخد وجبتك على أرض ثابتة بعيد عن موضوع الإبحار ده، أدخل « كريستال
كافيه» اللي يادوب على حافة المية.

فيه كذا مكان للقعاد، جزء خارجي تحت برجولة كبيرة جنب مراسي المركب، ودي أكتر قعدة مريحة
والمنظر اللي بـ تبص عليه أحسن من الساحة المرصوفة اللي وراه، بس الخدمة هـ تبقى
أصعب عشان الويترز بـ يقفوا بعيد عن الجزء ده.

ماتتوقعش ان المشروبات تكون عظيمة في الكافيه، إحنا طلبنا قهوة وعصاير والإتنين
كان مالهومش طعم وفيهم مية كتير زي ما يكون المطبخ بـ يوفر في المكونات!

وبعد ما أحبطتنا المشروبات كنا خايفين نطلب الأكل يطلع أي كلام، بس جربنا
الساندويتشات والحمدلله طلعت حلوة جداً، البرجر كان بـ 25 جنيه وهو أصلاً لحمة
مجمدة بس مشوي كويس وعليه خس طازة وصوص خاص بالمكان وشرايح طماطم وعيش رقيق  بالسمسم.

الساندوتش التاني أسمه «بورا بورا» سعره 25 جنيه برضه وده عبارة عن قطع
فراخ متبلة وعليها بصل وفلفل في عيش فرنساوي طويل، الفراخ مش مشطشطة قوي زي ما
المفروض تكون، بس فيه صوص حار طبعاً، الساندويتشين بـ يتقدم معاهم بطاطس محمرة
وجزر وزيتون وبصل مخلل.

الكميات كريمة جداً بالنسبة للأسعار، ويمكن عشان المنيو نفسه صغير والأكلات
اللي فيه قليلة؛ أكلات الكافيه التقليدية٬ فالمطبخ بـ يعملها كويس. السلاطات والمقبلات
مش موجودة في المنيو، بس لو سألت الويتر هـ يقولك فيه طحينة وبابا غنوج وحمص
والطبق الواحد بـ8 جنيه.

من أكبر مشاكل إنك تاكل وانت بـ تبص على النيل إنك من أول ما الأكل ينزل
على الترابيزة هـ تقعد تحارب الحشرات الطايرة والهاموش اللي بـ تعمل غارات جوية
على طبقك، بس لو معاك مبيد حشري يبقى «كريستال كافيه» مكان مناسب لفسحة وأكلة على
النيل.

نصيحة 360

لو روحت وقت بداية الرحلات النهرية للمركب هـ تقدر تشوف المراكب وهي بـ تتحرك وساعتها هـ تقدر تشوف منظر واضح لجزيرة الدهب.

أحسن حاجة

العيش ناعم والحشو كتير جوة الساندويتش.

أسوأ حاجة

الحشرات اللي بـ تطير حواليك لا تطاق.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح