The Definitive Guide to Living in the Capital , Cairo , Egypt

فيه أماكن من كثر حلاوتها بـ تبقى
قاعد مبسوط فيها وبـ تكون منبهر وبـ يتسجل في ذاكرتك علشان لما تحب تخرج في مكان
المطعم أو الكافيه ده بـ يكون في قائمة الأولويات عندك، للأسف المكان ده وقع من
أولوياتنا لو حبينا نخرج في نطاق الزمالك.

«لاروما – L’Aroma» كافيه واخد مساحة على الجنب في
شارع صلاح الدين تحس أنه في ممر أو مدخل عمارة وله يافطة صفراء، بـ تنزل له سلمتين،
عادي جدًا من الداخل، مساحته صغيرة والمطبخ أصغر، فيه تقريبًا ترابيزتين عاليين،
وأربع كنبات وكراسي بترابيزة منخفضة، الكاونتر عند المطبخ وفيه ثلاجة عرض فيها
الحلويات زي أي كافيه، وفوقها طبق شفاف فيه الكوكيز والكب كيك.

جربنا في البداية التشيكن رانش (21.50
جنيه) وده ورابس بـ يقدموها هناك بـ ينزل معاها بطاطس شيبسي، وكمان كريب نوتيلا (17.50
جنيه)، الطلب جاء بعد فترة، الورابس لافينها في ورق وجاء بارد شوية، طعمه لطيف
والخس والطماطم فيه كانت فريش، كان محتاج شوية صوص أو مايونيز علشان المكونات مع
بعضها كانت سادة شوية. أما الكريب كان حلو قوي وجاء على شكل مثلثات وتقديمه كان
حلو.

بعد شوية طلبنا تشوكليت تشيب
كوكيز “حجم كبير” (6.50 جنيه) ومعاها فريدوشينو موكا (22 جنيه)
وفريدوشنو بالقرفة (23 جنيه) والثاني أول مرة نشوفه في مكان قبل كده بـ يكون عبارة
عن قرفة مضروبة مع ثلج وشوكولاتة، قوام المشروبين ما كانش ثقيل قوي، الموكا كانت
كويسة والقرفة كانت لطيفة برضه لكن عيبهم زي ما قلنا أن قوامهم كان خفيف، والكوكيز
طلبنا منهم أنهم يسخنوها جاءت لنا وقطع الشوكولاتة فيها كانت سايحة لكن طعم
البسكويت نفسه كان طري قوي، بالنسبة لنا إحنا بـ نحبها تكون مقرمشة شوية علشان كده
ما جاءتش على مزاجنا شوية، كان ممكن تكون أفضل من كده.

المكان لطيف، عيبه أنه كله
للمدخنين، حتى غير المدخنين هـ يتأذوا من الدخان لأن المكان صغير ومافيهوش أى منفذ
هواء. الخدمة مش سريعة إلى حد ما، المنيو غنية بالعناصر لكن زي ما قلنا الأكل
والشرب اللي جربناه كان عادي، هو مكان زي أي كافيه ممكن تعدي عليه لو نفسك هفاك
على قهوة أو أكلة خفيفة فى السريع، لكن –في رأينا- ما تروحوش مخصوص لو حابب تخرج
خروجة حلوة.