The Definitive Guide to Living in the Capital , Cairo , Egypt

لو ريف – Le Reve

لو ريڤ: مطعم عالمي وكافيه أنيق في مدينة الرحاب

  • صالة الطعام
  • قهوة
  • 0226923830
  • 9 صباحاً - 5 صباحاً
تم التقييم بواسطة
Waleed Abuarab
قيم
قيم الآن
لو ريڤ: مطعم عالمي وكافيه أنيق في مدينة الرحاب

بقالنا فترة ما زرناش الرحاب وما كتبناش عن أي أماكن هناك، لكن الفترة اللي
جاية هـ نعيد اكتشاف المدينة الهادئة ونكتب عن كل الأماكن الجديدة اللي فتحت مؤخرًا،
والقديمة كمان، وأول تجاربنا بعد العودة كانت مطعم وكافيه «لو ريڤ – Le Rêve» الموجود بساحة الطعام Food Court واللي هـ تشوفه من بعيد وأنت رايح
على ساحة الطعام لأنه على تبة مرتفعة عن الأرض في نهاية ساحة الطعام وهـ تلاقيه
شبه القلعة كده والاسم مكتوب باللون الأحمر المضيء وتحته كلمة Grill & Cafe.

المكان من الداخل إضاءته خافتة جدًا، تكاد تكون معدومة في بعض
المناطق، وفيه أباجورات على الترابيزات ولولاها مش هـ تشوف اللي قاعدين معاك ولا
الأكل اللي أمامك،  لكن الجو رومانسي
وكلاسيكي مافيش كلام، والديكور كله بألوان غامقة وفيه ممرات وأسوار رخامية بين
أماكن الجلوس علشان تكمل إحساس “القلعة” اللي قولنا عليه، وفيه ترابيزات
بأحجام مختلفة وأشكال الكراسي كمان مش زي بعضها، فاختار القعدة اللي تريحك قبل ما
تقرر هـ تقعد فين في المطعم.

منيو للمشروبات والحلويات ومنيو ثاني للمأكولات، في المشروبات ما لاحظناش
أي حاجة مميزة، هي العصائر والكوكتيلات العادية، بس الظريف أن أحجام الأكواب كبيرة
والأسعار معقولة، يعني طلبنا عصير برتقال قبل الأكل كان فريش ولذيذ وسعره 15 جنيه
بس. ومنيو الحلويات فيه براونيز وأوريو مادنيس وتشيز كيك وبرضه مافيش حلويات
مبتكرة أو حاجة خاصة بالمكان.

جربنا الأكل في «لو ريڤ» وبدأنا بطبق مقبلات كومبو بس الحجم الصغير (41
جنيه) اللي فيه حلقات البصل وقطع الدجاج التندر وكان المفروض يكون فيه موتزاريلا
ستيكس لكن ما كانش فيه وقت زيارتنا فطلبنا من الجرسون أنه يحط جمبري مقلي بدل
الموتزاريلا الناقصة وفعلًا عمل كده ونزل أمامنا طبق المقليات مع هوت صوص، الطعم
ظريف وكل حاجة بس كنا متوقعين كمية أكبر من كده شوية وصوصات أكثر من مجرد الهوت
الصوص. «لو ريڤ» شبه متخصص في الستيك والأكلات اللي على الجريل، فجربنا الستيك
فيليه بصوص المشروم البني (64 جنيه) وهنا أنت بـ تختار طبق جانبي واحد مش اثنين زي
باقي الأماكن، فـ اختارنا البنا بالصلصة والطعم كان حلو واللحم مستوي كويس والصوص له
قوام هائل، والكمية معقولة جدًا. ومن منيو الأطباق الخاصة والجديدة في المطعم
اختارنا ميكس جريل أسباني (70 جنيه) فيه قطعتين لحم بتلو Veal ووحدات جمبري كبير مشوية على الجريل مع الخضار
السوتيه. الطبق ده كان ناقصه صوص أو توابل معينة لأنه كان بـ يفتقد لأي مذاق،
اللحم والجمبري فريش بس كان لازم يكون فيه طعم أكثر من كده، لكن أنقذ الطبق ده
السوتيه الخطير المتشوح في زيت الزيتون. رغم أن كان ناقصه خضروات مهمة زي البروكلي
والفاصوليا.

الخدمة مرتبكة شوية ويمكن ده علشان المكان كان مزدحم وقت زيارتنا وكان فيه
صعوبة في أن الجرسون يشوفنا بـ نشاور له وسط الظلام المحيط ده والركن البعيد اللي
كنا قاعدين فيه، لكن المفاجأة أن الطلب جاء لنا بسرعة، أسرع ما توقعنا بكثير.
والمكان بشكل عام نظيف ومريح للأعصاب والخدمة ودودة. حبينا تجربتنا في «لو ريڤ»
وناويين نكررها بعد ما عجبتنا القعدة وجو المكان.

نصيحة 360

المكان مش بـ يقدم شيشة، بس فيه مكان للمدخنين.

أحسن حاجة

من أجمل الأماكن اللي ممكن تقعد فيها داخل الرحاب.

أسوأ حاجة

مالوش غير فرع ثاني في الساحل الشمالي، مافيش فروع ثانية في القاهرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح