The Definitive Guide to Living in the Capital , Cairo , Egypt

ماتيجوز هوكة لاونج – Matigoo’s Hookah Lounge

ماتيجوو: لما تتجمع لك مميزات الكافيه والمطعم في مكان واحد في المعادي

  • 45 شارع 9
  • 0227510555
تم التقييم بواسطة
Nagla Ashraf
قيم
قيم الآن
ماتيجوو: لما تتجمع لك مميزات الكافيه والمطعم في مكان واحد في المعادي

ماتيجوو – Matigoo.. أول ما بـ تسمع الكلمة دي هـ ترد: “نيجي فين؟”، بس ماتيجوو اختار اسم على مسمى فعلًا، لأنه من أجمل الأماكن اللي ممكن تستمتع فيها بوقتك في القاهرة، لأنه جمع لك ما بين جمال أكل المطاعم المحترفة وجمال قعدة الكافيه وتنوع مشروباته، مش مجرد كافيه بس زي ما كنا فاكرين.

جذبنا شكل المكان والإضاءة الخفيفة، المكان مقسم لقسم داخلي فيه تكييف، وقسم خارجي علشان تستمتع بالجو الطبيعة. أول ما دخلنا استقبلنا الجرسون، اللي كان في منتهى الذوق والأدب طوال فترة ضيافتنا في المحل.

المنيو كان متنوع جدًا، فيه كل حاجة في المطعم العادي إلا أنه متميز بـ تقديمه وجودته، هـ تلاقي فيه مكرونة وبيتزا وساندويتشات برجر وأطباق عادية، وكل أنواع العصائر اللي تتخيلها، وأنواع كوكتيلات مختلفة كمان. أما الديكور فكان هادئ ومناسب لألوان اللوجو وطابع المحل.

بدأنا بعصير بيكاسو بـ 20 جنيه، واللي فكرنا طبعًا بالفنان العالمي بيكاسو ولوحاته والحقيقة أنه كان حلو قوي، كأنه لوحة فنية بس على كوباية، وهو عبارة عن كوكتيل أناناس، وسفن آب، وأكسير فواكة لونه أزرق، وكانت ألوانه مدرجة زي أمواج البحر، وهو فعلًا حسسنا بانتعاش البحر واستمتاعه.

أول حاجة قُدمت لنا كان Fillet Trois sauce بـ 85 جنيه، وده عبارة عن ثلاث قطع لحمة متوسطة مع ثلاث أنواع صلصة مختلفة، عارفين لما تحسوا أن الأكل بـ يجذبكم لعالم خاص، خالي تمامًا من أي حاجة إلا أنت والطبق، هو ده اللي حصل بالضبط.. فصلنا تمامًا، أول صوص كان صوص المشروم بالكريمة، والحقيقة أن قطعة اللحمة ما كانتش مقطعة بالتساوي فكان فيه جزء مستوي أقل من الباقي، بس طعمها كان حلو جدًا، الكريمة كانت مضبوطة والمشروم كان طازج، بعد كده انتقلنا لصوص الفلفل الأسود، واللي كان متبل بعناية فائقة، بـ تحس في فمك طعم الفلفل الجميل وقطعة اللحمة الطرية مع الصوص البني.. مزيكا، أما بقى اللي خلانا نذوب ونتنطط في نفس الوقت كان صوص المسطردة.. اللسعة الخفيفة اللي فيها مع عذوبة الصوص.. حكاية غرام وانتقام بين الصوص وقطعة اللحمة اللي شارباه كويس جدًا وفرحانة به وبـ تنتقم مننا من حلاوتها، وكان مقدم معاها بطاطس مهروسة متقنة جدًا ومضبوطة، وخضار مسلوق اللي للأسف خيب أملنا، علشان كان مُقطع كبير فبالتالي ما استواش كويس.

الطبق الثاني كان Matigoo steak بـ 85 جنيه، وده كان عبارة عن قطعتين لحمة كبار مع صوص المشروم بالكريمة، وبطاطس محمرة، وأرز. الحقيقة أن قطع اللحمة طعم الصوص كان واضح فيها أكثر لأنها كانت أكبر، كمان البطاطس كانت مختلفة، كانت متقطعة شيبسي ومقرمشة ومليانة توابل منعشة، والأرز كان كويس بس عادي مافيهوش حاجة مميزة.

بعد كده جابوا لنا طلبنا سلاطة تاكو – Taco salad بـ 43 جنيه، اللي للأسف تأخرت جدًا وجاءت بعد الوجبة الأساسية، وده طبعًا غير مقبول بالمرة، إلا أن شكلها مع طعهما خلانا نتغاضى عن التأخير، لكن للأسف ما عرفناش نأكلها كلها علشان كنا شبعنا.

بعد الوجبة الدسمة دي ندمنا أننا كنا طلبنا chocolate fudge بـ 31 جنيه، خاصة أنه كان حلو قوي، طبعًا مش خفيف والشوكولاتة فيه تتحدث عن نفسها وبـ تقول لك أنا قطعة شوكولاتة حلوة، لو جدع كُلني.. عشاق الشوكولاتة هنا هـ يستمتعوا جدًا، بس لما تأكلوا غذاء زينا كده، ابقوا اطلبوا حاجة أخف والحقيقة أنه كان عنده حاجات كثير متنوعة في الحلويات.

وكالعادة لما تيجي تروح مكان حلو، روح مع حد بـ تحبه، شخص تستمتع بكلامه وتسمعه، الناس اللي بـ تسمع قلبك من غير ما تتكلم دي، أيوه الناس النادرة اللي قربوا ينقرضوا دول، ممكن يكون صديق، أو أخ، أو الأب، أو الأم. المهم أنك تستغل كل لحظة في حياتك علشان تعبر للي بـ تحبهم عن حبك بالطريقة اللي تحبها وعارف أنهم هـ يحبوها.

نصيحة 360

جرب مشروباتهم مختلفة وهـ تعجبك.

أحسن حاجة

Trois sauce Fillet.

أسوأ حاجة

تأخير السلطة وتقديمها بعد الطبق الرئيسي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح