The Definitive Guide to Living in the Capital , Cairo , Egypt

لو جاء اليوم وطلبوا مننا نتخصص
فى نوع واحد من المقالات النقدية للكافيهات أو المطاعم فى موقع كايرو 360 أكيد هـ
يكون اختيارنا الأماكن اللى بـ تبتكر أنواع مختلفة للـ “الآيس كريم”..
دى هـ تكون حِجة عظيمة علشان نروح ونذوق حبيب قلبنا وإدماننا العظيم.

حاجة كده زي المغناطيس بـ تشدنا
ناحيته، لكن المرة دى شكل المكان وصور التشكيلات اللى عنده خلتنا ننط داخل المحل
الزجاجى اللى موجود فى الدور الثاني من داندي مول الموجود على الطريق الصحراوي.

بعد فروع كثيرة فى دبي وأبو ظبي
والبحرين والكويت وقطر وعمان فتح من سنة فى داندي مول وبعدها سيتي ستارز كمان، المكان
حجمه صغير بالداخل وفيه كام ترابيزة عاليين، لكن فيه كمان الجزء اللى بره الزجاج
للجلوس بترابيزات صغيرة، ممكن تعرف معلومات أكثر عن البلاد اللى موجود فيها وأنواع
الآيس كريم والمشروبات كمان اللى بـ يقدموها والزبادي منزوع الدسم من على الموقع الرسمي أو صفحة فرع
مصر على الفيسبوك.

الموضوع مش أنك تختار نكهة معينة
من ثلاجة العرض الزجاج وتختار علبة ولا بسكويت وتمشي وخلاص، الموضوع عبارة عن
خطوات كثيرة شوية، فى الأول بـ تختار نوع الآيس كريم (من أكثر من 40 نكهة) وحجمه
بـ يتحدد على حجم الكوباية اللى موجود منها 4 أحجام، وبعدين من البار اللى جنبه بـ
تختار الإضافة (حوالى 20 نوع) اللى أنت حاببها سواء مكسرات، كوكيز، فواكة، حلوى
جيلاتينية، مارشميللو، قطع شوكولاتة، بسكويت، كوكيز، كيك، إم أند إمز وسنيكرز وغيرها
كثير، بعدين بـ يقوم الولد اللى استقبلنا بوجه بشوش بفرد الآيس كريم على رخامة
أمامه وبـ يخلط داخلها الإضافة واللى بـ توضع داخل الكوباية أو ممكن تختار كونو البسكويت
اللى فيه منه سادة أو بإضافات أو طبق من البسكويت وأخيرًا نوع الصوص اللى ممكن
فاكهة أو شوكولاتة هيرسيز أو صوص فراولة وغيرها.

اختارنا آيس كريم Value بـ 24 جنيه واللى فيه ممكن تأخذ
ميكس مجانًا وعليه واحد كمان لو حابب، جربنا السنيكرز اللى كان وهمي بصوص الكراميل
والآيس كريم الكريمي كان بـ يذوب فى فمنا بطريقة مش طبيعية، الكمية كانت كبيرة لكن
من طعامته خلصناه كله، بجد آيس كريم زي ما الكتاب بـ يقول، الناس دي بـ تفهم فى
الطعم، كوب الوافل البسكويت بـ 4 جنيه، والوافل كونو بـ تأخذه مجانًا والكونو
المغموس فى الشوكولاتة بـ 6 جنيه، جربنا كمان آيس كريم فانيليا بإضافة Graham Crackers وهو عبارة عن بسكويت مستورد مبشور
أعطى طعم مقرمش مع صوص الشوكولاتة الهيرشيز خلاها قطعة من الجنة زي ما بـ يقولوا.

لو أنت حد بـ تحافظ على وزنك وبـ
تخاف من السكر والتخن فيه هناك زبادي منزوع الدسم وكمان بـ يعملوا تورتات آيس كريم
بـ تتوصل لحد بيتك لو أنت من سكان السادس من أكتوبر أو الشيخ زايد (لخدمة التوصيل
اتصل بـ 01283377007) ده غير المشروبات من ميلك شيك والساخن منها كمان.