The Definitive Guide to Living in the Capital , Cairo , Egypt

كافيهات
Place 2 Be

مطعم وكافيه Place 2 Be: تجربة إيجابية في شارع 9

Place 2 Be المعادي بيتزا ثكنات المعادي شارع 9 كافيهات المعادي مطاعم المعادي
  • شارع 9 المعادي بجوار محطة مترو ثكنات المعادي
  • 08:00 - 03:00
تم التقييم بواسطة
Cairo 360
قيم
قيم الآن
مطعم وكافيه Place 2 Be: تجربة إيجابية في شارع 9

أحياناً بنكون محتاجين نفصل، ونلاقي مكان مميز نقعد فيه ونرتاح ونبعد عن كل المشاكل والدوشة، والحقيقة مطعم وكافيه Place 2 Be نجح ينقلنا لعالم تاني من الانبساط بعيد عن زحمة القاهرة.

المكان موجود في شارع 9 في المعادي، وبالتحديد بالقرب من محطة مترو ثكنات المعادي، هو مكان واسع وفيه قعدات مريحة جداً، وبمجرد ما بتدخل المكان بتحس إن القائمين عليه سعداء بوجودك وبيرحبوا بيك بصدق وبساطة.

القعدة نفسها مريحة، وفيه خصوصية في المكان يعني الترابيزات مش لازقة في بعضها، وعندك اختيارين، ممكن تقعد جوه المكان أو بره وتستمتع بالهواء المنعش.

لما وصلنا المكان كان فيه مباراة كرة قدم مهمة، وده ظهر في وجود ناس كتير بتتفرج عليها علشان كده اختارنا نقعد بعيد شوية عن الشاشات الكتيرة المنتشرة في المكان.. ولقينا الهدوء في قعدة حلوة جوه المكان والشاشة كانت بعيدة عننا.

سألنا الموظف عن الأكلة اللي يرشحها لنا فقال لنا إن البيتزا مميزة في Place 2 Be، وكمان عرض علينا عرض مستمر عندهم لمدة أسبوع، أي اتنين بيتزا معاهم بيتزا هدية مجاناً.

البيتزا عندهم حجم واحد وهو أكبر من المتوسط بشوية، يعني بتكفي فرد وتزيد كمان.

طلبنا بيتزا خضروات ومعاها بيتزا فونجي ودي عبارة عن بيتزا مشروم.. والحقيقة البيتزا فعلًا كانت غنية جدًا وطعمها مميز.. عجينة البيتزا نفسها كانت رفيعة مش سميكة.. ومستوية كويس.. والجبنة عليها طازة وبكمية معقولة والأوردر نزل لنا بسرعة كبيرة ومتأخرش.

سعر بيتزا الخضروات 60 جنيه، والبيتزا الفونجي 59 جنيه، واختارنا البيتزا الهدية مارجريتا.

وبمناسبة بيتزا المارجريتا لازم نقول إنها كانت خفيفة وعجينتها مقرمشة شوية.. وده عجبنا جدًا.. واستمتعنا بالجبنة اللي عليها.. كانت سايحة بطريقة لذيذة.

عجبنا في المكان مساحته الواسعة ودي حاجة هتعجب الناس اللي بتكره الأماكن الضيقة أو عندهم فوبيا منها.

المكان فيه مشروبات متنوعة، وسندوتشات وأكلات كتير، وكمان لو كنت من عشاق الشيشة هتستمتع بيها هناك.

تجربتنا في المكان كانت إيجابية، وعجبنا اللون الأبيض اللي مسيطر على حوائط المكان.

نصيحة 360

البيتزا تجنن، إيطالي بجد

أحسن حاجة

القعدات مريحة والمكان واسع

أسوأ حاجة

التليفزيون صوته عالي لما بيكون فيه ماتش كورة

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح