The Definitive Guide to Living in the Capital , Cairo , Egypt

كافيهات
نانتيز

نانتيز: وافلز لطيفة باختيارات محدودة فى مول العرب

تم التقييم بواسطة
Angie El Batrawy
قيم
قيم الآن
نانتيز: وافلز لطيفة باختيارات محدودة فى مول العرب
كفاية الرائحة.. بجد.. رائحة الوافل فى أى مكان بـ يقدمه كفاية أنها تكون بمثابة أداة الدعايا الأولى لهم.. يعني فى رأينا أنهم مش محتاجين يصرفوا فلوس على مطبوعات على قد ما يتقنوا حلوى الوافل اللى بـ يقدموها ورائحتها هى اللى هـ تجر رجل الناس لحد عندهم.

وإحنا ماشيين فى مول العرب بـ نتفرج على فتارين المحلات بدل ما نبص ناحية اليمين دماغنا لفت مرة واحدة بشكل تلقائى ناحية الشمال وبالتحديد فى منتصف الممر المواجه لمطعم ستوديو مصر علشان مناخيرنا توجهنا ناحية “نانتيز – Nuntees” اللى له زي Booth صغير بـ يقدم فيه وافل وكريب، أمام الولد عناصر الاختيار أو المكونات والإضافات محدودة، أحبطنا لما عرفنا أن مافيش فواكة ولا آيس كريم! رغم أن دي من أساسيات أي مكان بـ يعمل وافل!

سعر الوافل بـ 15 جنيه، أى صوص بـ 3 جنيه وفيه حوالى 6 اختيارات من نوتيلا إلى شوكولاتة بالحليب للشوكولاتة البيضاء وغيرها، وبـ 3 جنيه برضه ممكن تضيف مكسرات أو سبرنكلز أو شوكولاتة زي مارس وفريرو روشيه بـ يقطعها لك شرائح أو قطع صغيرة فوق الصوص اللى بـ تختاره.
أول ما بـ تطلب بـ يسألك الولد عاوز الوافل مقرمشة Crispy ولا طرية، الخدمة سريعة والولد لطيف، بـ يتحط الصوص الأول وبعدها فوقه المكونات اللى أنت حاببها، اختارنا أنها تكون طرية وطلبنا ثلاثة بصوصات ومكونات مختلفة وكلها كانت تحفة مع صوص الشوكولاتة بالحليب وواحدة ثانية بالنوتيلا، بعضها عليه بندق، وفريرو روشيه، وسبرنكلز، الجودة مافيش كلام عليها وكانت سخنة وفريش. بـ تقدم فى طبق من الفوم الأبيض وعلى الجنب هـ تلاقى شوك وسكاكين بلاستيك ومناديل للسيطرة على الموقف.
وأنت ماشي فى مول العرب لازم تعدي على “نانتيز”، زيارتنا المرة دى كانت مستهدفة الوافل لكن مافيش مانع نروح ثانى عندهم علشان نجرب الكريب، لو كنت من الناس اللى بـ تعمل دايت خطر أنك تعدي حوله.. وإلا على الدايت السلامة. 

نصيحة 360

"نانتيز" لهم صفحة على الفيسبوك.

أحسن حاجة

جودة الوافل والرائحة خطيرة وأنت ماشي.

أسوأ حاجة

الأكل صعب وأنت واقف لأن مافيش مكان جلوس، إلا لو حالفك الحظ ولقيت الكراسي اللى فى منتصف المول فاضية!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح