The Definitive Guide to Living in the Capital , Cairo , Egypt

كل سنة بـ تطلع موضة جديدة في الحلويات وتبدأ كل المحلات تبدع في التجديد، من سنتين طلعت موضة الكنافة بالمانجو، لكن السنة دي بقى موضة الكنافة بالريد فيلفت منتشرة بأكثر من شكل وصورة في كل المحلات. وبما أننا ناويين نرصد لكم كل جديد طوال الشهر الكريم بإذن الله قلنا نبدأ بنولا – Nola، واللي كان عامل ديكورات حلوة قوي بمناسبة رمضان بالفوانيس والزينة على الرفوف.

أول ما دخلنا لفت انتباهنا أن نولا عاملة صينية بسبوسة شكلها مغري جدًا بكل أنواع المكسرات. ده غير تورتة الكنافة بالنوتيلا المعروفة، أما بالنسبة للكب كيك نولا قدمت لنا 6 أنواع بمناسبة رمضان: كب كيك كنافة بالمانجو، وبالبلح، وبالمكسرات والقهوة، وبالكنافة والنوتيلا، والمستكة، وملكة اليوم بسبوسة بالريد فيلفت، سعر الواحدة بـ 15 جنيه. كمان عاملين ميني كب كيك بنفس الأنواع، والأنواع العادية كمان، سعر الست قطع بـ 45 جنيه. كان فيه أنواع ثانية بس ما شفناهاش لما رحنا، بس لما دخلنا على صفحتهم على الفيسبوك شفناها زي كب كيك الكركديه، واللي مرسوم عليها هلال رمضان، أو مكتوب عليها رمضان كريم.

اختارنا أربع أنواع كلهم أحلى من بعض، نبدأ بكب كيك البسبوسة بالريد فيلفت Red Velvet، ودي كانت عبارة عن طبقة بسبوسة لونها أحمر بلون صوص الريد فيلفت بالضبط وتحتها كريم شانتيه وبعدين كب كيك ريد فيلفت عادي، صباح السكر بالحلويات يعنى، طعمها كان حلو جدًا وفريش وإضافة الكريم شانتي كانت مناسبة جدًا للتخفيف، يعنى من الأخر لو عاوز تعدل مزاجك وتجرب حاجة مختلفة لازم تجربها، وتستمتع بها من أولها لآخرها.

أما بقى الحكاية الثانية اللي عجبتنا جدًا كانت كب كيك بالبلح والكراميل المملح، كانت خفيفة جدًا ومنعشة، وبـ تدوب في فمك، كأنها جاية لك من كتاب ألف ليلة وليلة. ولعشاق القهوة بكل مشتقاتها كب كيك المكسرات بالقهوة كفيلة أنها تخليك سهران طوال الليل لو لسه الكافيين بـ يؤثر فيك أكيد، وإضافة المكسرات كانت حركة ذكية جدًا الحقيقة.

نيجي لكب كيك الكنافة بالمانجو اللي كان شكلها تحفة، لكن للأسف برغم أن المانجو مع الكريم شانيه طعمه كان حلو قوي إلا أن الكنافة والكب كيك نفسهم ما كانوش طازة، فعملنا زي الأطفال وأكلنا اللي في النصف فقط، نتمنى أن المرة الجاية اللي نزور فيها نولا تكون كل الحاجات طازة لأن الكنافة بالمانجو بالذات لها معزة خاصة عندنا.

وما تنسوش أن الأكل الحلو ما يحلاش إلا مع الصحبة الحلوة، ولو جبت واحدة كب كيك زيادة وأديتها لحد في الشارع هـ يفرح بها أكيد وتبقى فرحت حد في رمضان ما أكلش الحاجة دي قبل كده.