The Definitive Guide to Living in the Capital , Cairo , Egypt

وافل ستيشن – Waffle Station

وافل ستيشن: وافل شهية وخفيفة فى أمريكانا بلازا الشيخ زايد

  • داخل مول أمريكانا بلازا
  • مخبوزات وحلويات
  • 01010050070
  • 11 صباحًا - 1 صباحًا
تم التقييم بواسطة
Angie El Batrawy
قيم
قيم الآن
وافل ستيشن: وافل شهية وخفيفة فى أمريكانا بلازا الشيخ زايد

وأنت فى انتظار الفيلم بتاعك يبدأ فى أمريكانا بلازا بالشيخ زايد، أو وأنت خارج فى المكان الرائع ده وحسيت بالجوع، فيه Booths كثيرة فتحت فى المنطقة المحيطة بالسينما، منها اللى بـ يقدم ساندويتشات هوت دوج سريعة أو نولا كب كيك، أو وافلز، الحلوى الشهيرة اللى انتشرت مؤخرًا خاصة السنة اللى فاتت (2014)، الـ Booth اللى شدنا اسمه "وافل ستيشن – Waffle Station" وبـ يقدم نوعين وافل: ساندويتشات أو تحلية، إلى جانب المشروبات زي الميلك شيك أو القهوة والأسبريسو.

الاختيارات مش كثيرة جدًا، فيه أنواع حادقة (شبه الساندويتشات) وكمان حلوة، الوافل بـ تتقسم نصفين وبـ يتحط جواها المكونات، وفيه 3 أنواع: وافل بالبرجر والجبنةMighty Burger بـ (28 جنيه)، ووافل فراخ وجبنة (25 جنيه)، ووافل كلوب (22 جنيه) والأخير ده بـ يكون فيه اختيارك من التركي المدخن أو الروزبيف أو الاثنين سوا.

أما فى قسم الحلو: وافل القرفة والسكر (25 جنيه)، ووافل تشيز كيك فيلادلفيا (27 جنيه)، وبالتفاح والقرفة (25 جنيه)، وممكن تكون الوافل الخاصة بك من اختياراتك (أى إضافة للصوص بـ 5 جنيه والـ Topping بـ 5 جنيه) وبولة الآيس كريم بـ 9 جنيه، والكريمة المخفوقة بـ 5 جنيه.

أخذنا وافل البرجر بالجبنة وكمان اللى بالفراخ، وفى زيارة ثانية أخذنا الحلو منها وهو القرفة بالسكر وبالتشيز كيك، الوافل الحلو مش بـ يأخذ وقت فى التحضير زي الساندويتش، لأن طبعًا البرجر أو الفراخ بـ يأخذوا وقت فى التسوية، لما طلبنا الحلو استغربنا فى الأول إزاى وافل بالتشيز كيك فأعطونا ملعقة منها علشان نذوقها والقضمة دي فتحت نفسنا وشجعتنا جدًا نطلبها، مكونة من جبن كريمي فيلادلفيا مع كريمة وعليها من فوق صوص التوت، أما الوافل بالقرفة والسكر كانت عبارة عن قرفة ومرشوش عليها عين جمل وIcing السكر وزودنا عليها كمان إضافة آيس كريم (9 جنيه).

التشيز كيك على الرغم من حلاوتها وابتكارها إلا أننا كنا ميالين أكثر للى بالقرفة والسكر، كانت اختارع، حاجة كده لما تأكلها تروح لمكان ثاني وترجع بسرعة، وتقعد كده تروح وتيجي لحد ما تخلصها، واللى زود حلاوتها كمان بولة الآيس كريم، لكن الاثنين كان طعمهم خفيف ولذيذ واشبعوا حبنا للسكريات والوافل بشكل خاص.

فى زيارة ثانية ذوقنا الساندويتشات، صورها فى المنيو أصلاً تفتح النفس، البرجر مكونة من برجر عليه صوص جبنة وبصل وخس وكاتشب ومايونيز، أما الفراخ عبارة عن قطع فراخ مقطعة معاها خس وجبنة صفراء سايحة، الاثنين ما يتخيروش عن بعض، وهميين.. طعم خفيف.. أى نعم مش بـ تشبع أوى لكن التسوية وطعم الفراخ مع المكونات الفريش كانت روعة، إلى جانب أن التغليف عندهم شكله جميل وبسيط.

"وافل ستيشن" مكان لطيف فى أمريكانا بلازا نجح فى عمل ساندويتش الوافل بأبسط المكونات ودى حاجة مش بـ ينجح فيها ناس كثير، إلى جانب الابتكار فى مكونات المسكر منه، هو ده المكان الصح لهم.

نصيحة 360

المكان له صفحة على الفيسبوك، ادخلوها وهـ تجوعوا من منظر الصور بس.

أحسن حاجة

طعم المكونات الفريش سواء فى الحلو أو الساندويتش.

أسوأ حاجة

الساندويتش مش بـ يشبع، محتاج تأكل اثنين منه! 

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح