The Definitive Guide to Living in the Capital , Cairo , Egypt

أرض النبى

أرض النبى: رواية بين علامتين تنصيص

  • خالد إسماعيل
  • روايات
  • من الآن
  • عربي عربي
  • 20 جم
  • مكتبات وسط البلد، وفى دار ميريت
تم التقييم بواسطة
Ahmed Abd El Gawad
قيم
قيم الآن
أرض النبى: رواية بين علامتين تنصيص
“كل طيب ولّى، والبلاد حليفة الشقاء، تئن تحت أقدام الغرباء… وتأمل صاحب الأرض تعسره الحاجة والغريب يملأ كرشه”.

بين علامتين تنصيص كان لازم دى تكون بداية قرائتنا لأرض النبى، لأنها باختصار هى البداية اللى اختارها خالد إسماعيل لروايته وهـ نعرف ليه لما نتأمل شوية فى الرواية، وآه على فكرة إحنا هنا مش هـ نعمل قراءة، إحنا هنا هـ نتأمل فى حضرة الأرض المختلفة اللى رسمها خالد إسماعيل، ركزوا معايا هـ نتأمل.. هاه.. سكووون وتعالى بروحك لأرض ثانية.

أرض النبى هى مصر فى تاريخ قديم أيام سعد زغلول لما قرر يزور الصعيد أيام ما كانت القاهرة مركز الثورة على الإنجليز، أيام ما كان لسه فيه بقايا أتراك، أيام ما كان الرجال بالفعل مش بالكلام.
ثلاث عناوين كبيرة بأسماء ثلاث شخصيات بـ يتكلم الراوى العليم فى الرواية، الراوى شخصية مشاركة فى أحداث الرواية عاشت الأحداث وبـ ترويها لنا بانفعال فى أوقات وبهدوء فى أوقات ثانية.
الشخصيات اللى بـ تتكلم عنها الرواية بـ تفكرنا فى تعددها بشخصيات ماركيز فى رواية “مائة عام من العزلة” يعنى حضرتك محتاج تعمل خريطة نسب وتكتب مين ابن مين ومين تزوج مين ومين جد مين وهكذا.
الشخصية الأولى هى “فهيمة بتّ محارب” وبـ تبدأ الرواية بالحكاية عن جد الراوى وجدته اللى هى فهيمة، والحرب الخفية والمعلنة اللى كانت بين العائلتين “عائلة البلايزة” و”عائلة العواجيز” وإزاى قدر جده يخفف من الحرب دى بأنه تزوج جدته، بـ تبدأ الرواية بالكلام عن جدة الراوى فى نهايتها وحكيه اللى بـ يصور لنا مراسم الموت فى القرى المصرية زمان، بـ يكلمنا عن العزى اللى استمر لمدة 7 أيام عن “فن العديد” وهو فن موجود فى صعيد مصر عبارة عن شعر بـ يُقال للميت بطريقة حزينة وبـ توجع القلب، وإزاى كان العديد بـ يُقال ولازم يكنسوا الغرفة اللى كان عايش فيها المتوفى.
فى أول ثلاث صفحات مثلًا هـ تقابل شخصيات كثير زى أم الراوى ووالده وعمته وخاله وعمه، وبعدين تتعرف على عمدة البلد اللى هو الثالث من آل عبيدى اللى ماسكة العمودية فى البلد، وكمان تعيش مشهد سعد زغلول وهو جاى البلد وإزاى الناس كانت بـ تستقبله، وهـ تشوف فى الجزء الثانى شخصية “خديجة بتّ معوض” وهى خالة الراوى، وفى الجزء الثالث شخصية “لطيفة بتّ البورى”.

فى كل ده هـ تقابل أحداث كثير متتابعة مرتبطة بالعائلة الكبيرة اللى الرواية بـ تتكلم عنها، أسلوب الرواية جميل وشيق، وتعدد الشخصيات بـ يعطى للرواية روح مختلفة، اللى ممكن نأخذه على الرواية هو وجود بعض الألفاظ الخارجة عن المألوف، لكنها بـ تخدم السياق.رواية أرض النبى رواية مختلفة فى سردها وحكايتها وشخصياتها.. اقرأوها وقولوا لنا رأيكم.

عجبك ؟ جرب

رواية "زهرة البستان" لنفس المؤلف.

عن الكاتب

خالد إسماعيل روائى مصرى من مواليد 1968، ولد فى محافظة سوهاج، من إصداراته: درب النصار (مجموعة قصصية)، العباية السودا (رواية)، 26 أبريل (رواية).

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح