The Definitive Guide to Living in the Capital , Cairo , Egypt

يقول تعالى: “إن أبغض الحلال عند الله الطلاق”.

كلنا عارفين الآية دى وبـ نطبقها وننفذها على طول، ما إحنا عايشين فى سعادة وهدوء وراحة بال لكن أول ما الدفة تميل شوية…

طبعًا طبعًا الطلاق كلمة أول ما حد يسمعها لازم يقول: “ألف سلامة.. خير.. بعد الشر عننا وعن السامعين”، الكاتب والمحامى “محمد رضا” له خبرة كبيرة مع القضايا اللى من النوع ده.. يعنى تخصصه وأكل عيشه.. مع أنه بـ يحاول كثير فى الصلح وخلافه.. لكن كثير برضه بـ يقع المقدر.. وعلشان كده قرر يؤلف كتاب عن الطلاق.. أسبابه وبعض الحلول اللى ممكن تنفع الناس.

وعلشان الوقاية خير من العلاج رضا قرر يعرض أسباب الطلاق فى المجتمع المصرى والحلول اللى شايفها يعنى فى محاولة أن الناس تتعلم.

لو تكلمنا عن أسباب انتشار الطلاق فى مصر هـ نلاقيها: “الخلع.. المشاكل الاقتصادية.. الإنترنت.. بخل الرجل.. عدم التوافق”.. إلخ.

وقفنا شوية أمام يعنى إيه الخلع سبب من أسباب الطلاق، مع أنه شكل من أشكال الطلاق.. تعالوا نشوف تحليل محمد رضا للموضوع:

اللى هـ نعرفه أول ما نبدأ قراءة أن الخلع وسيلة للمرأة سهلة للتخلص من زوجها خاصة لما يرفض الطلاق.. وطبعًا ده راجع لقانون الخلع اللى بـ ينص على أن الزوجة لو قالت فى المحكمة أنها بـ تكره زوجها وتخاف ألا تقيم حدود الله.. فالقاضى يحكم لها على طول بالخلع.. وبـ يعرض الكاتب لكمية ثغرات فى القانون كثيرة.. منها أن الزوج ممكن ما يعرفش أصلًا أن مرفوع عليه قضية خلع.. المهم بـ ننتهى أن الخلع سلاح ذو حدين ومحتاج تعديل.

أما عن المشاكل الاقتصادية فحدث ولا حرج، دى من أهم المشاكل الزوجية، خذ عندك يا سيدى: غلاء الأسعار.. انخفاض الراتب الشهرى.. حب المظاهر.. وعلشان إحنا بـ نحب المظاهر فـ تلاقينا بـ نصرف فلوس كثير على حاجات ممكن نستغنى عنها زى نوع المحمول والمكالمات الكثير وشراء الهدوم الغالية ده غير الطلبات الكثير قوى من قبل الزواج واللى بـ يطلبها الأهل علشان الموضوع يتم، وغيرها.

وده اللى خلى الشباب يبعدوا عن فكرة الزواج أصلًا وده طبعًا زاد من نسبة العنوسة فى البلاد والنصيحة اللى بـ يقدمها محمد رضا هى همسة فى أذن كل أب وأم العريس، مش معناه أنه شاب معاه فلوس ويقدر ينفذ الطلبات لكن الاختيار لازم يكون مع شخص يتق الله فى زوجته.