The Definitive Guide to Living in the Capital , Cairo , Egypt

كتب
إنسان ما بعد التحديث

إنسان ما بعد التحديث: دليلك العلمي للارتقاء النفسي

  • د. شريف عرفة
  • مساعدات ذاتية
  • من الآن
  • عربي عربي
  • 75 EGP
  • مكتبات القاهرة
تم التقييم بواسطة
Shaimaa El Gammal
قيم
قيم الآن
إنسان ما بعد التحديث: دليلك العلمي للارتقاء النفسي

كتاب إنسان ما بعد التحديث يعتبر واحد من الكتب القليلة جدًا إللي تستاهل تاخد خمس نجوم في التقييم على موقعنا لإننا بنعتبره واحد من أحسن الكتب في تخصصه علم النفس/ التنمية الذاتية إللي اتنشروا في مصر.. تعالوا نعرف ليه يستاهل خمس نجوم:

  • موضوع الكتاب إللي بيلمس أي شخص يقرؤه مهما كان سنه، راجل أو ست، ومهما كانت خلفيته الثقافية والإجتماعية. الكتاب بيساعدك تاخد لفة طويلة جوة نفسك وبيخليك تشوف الأمور بشكل مختلف. بيعرفك الإنسان بيفكر إزاي، من أول البني آدم إللي بيفكر بطريقة راجل الكهف البدائي لحد الإنسان المستنير إللي بنحاول كلنا نوصل ليه، وده من خلال طرح نقط مهمة بتهم أي حد زي العلاقة العاطفية، الهوية، الحكمة، الذكاء العاطفي، المشاعر الإيجابية، الدين، الصدمات النفسية.

  • النجمة التانية لأسلوب الكتابة، على الرغم من إنه الكتاب بيعتبر كتاب علمي بيتكلم عن علم النفس إلا إنه مكتوب بطريقة مسلية وبسيطة جدًا هتخليك مستمتع بالقراءة ومش حاسس بأي كلكعة او تعقيد.

المحتوى والمادة العلمية

  • محتوى الكتاب دسم 423 صفحة متعوب فيهم مدعمين بالتجارب العلمية والأمثلة التوضيحية والمصادر والمراجع العلمية. وعلى الرغم من إنه يبان كتاب سهل إلا إنه كتاب تقيل ومليان معلومات ومحتواه ممتاز.
  • الهوامش: من أكتر الحاجات إللي بيحبها القارئ المتخصص. في نهاية الصفحات فيه هوامش مكتوب فيها المصطلحات باللغة الإنجليزية وأسماء التجارب العلمية وأسماء كتب وحاجات يقدر القارئ المهتم يرجع لها أكتر علشان يعمل بحث أونلاين ويقرأ أكتر عن الموضوعات.. ميزتها إنها مش هتشتت ولا هتضايق القارئ المبتدئ إللي مش عايز يدخل في متاهات وفي نفس الوقت هي وجبة دسمة لقارئ تاني.
  • الجزء التفاعلي: دكتور شريف عرفة دايمًا بيحب كتابه يكون تفاعلي، يعني القارئ بيقدر يلاقي حاجات مسلية وأنشطة تخليه يتفاعل مع الكتاب.. الكتاب فيه اختبارات نفسية وقوائم تملاها بنفسك وألعاب تخيلية تشارك فيها وبعدين تكتب ملحوظاتك.

ودلوقتي هناخدكم في جولة داخل فصول الكتاب التسعة:

الفصل الأول بيوضح لك أربع مراحل لتطور الإنسان وهي إنسان الغاب، إنسان القبيلة، الإنسان المستقل، الإنسان المستنير ومن خلالهم هتقدر تعرف إنت كقارئ في أي مرحلة فيهم بالظبط وكمان هتعرف ليه مهم إنك تتطور دايمًا.

الفصل التاني بيناقش فكرة السخرية، إزاي ممكن تستخدم السخرية علشان تتأقلم مع مشاكل كتير في حياتك. أما الفصل التالت فبيناقش العلاقة الزوجية أو العلاقة بين الراجل والست إزاي ممكن العلاقة دي تتطور وتوصل لأحسن مستوى بين الشركاء.

الفصل الرابع مهم جدًا لإنه بيعرفك على هويتك، إزاي تبني شخصية مستقلة مستنيرة الفكر خاصة بيك إنت وما تكونش شبه حد تاني أو شبه أفكار جماعة معينة إنت منتمي ليها.

وبعد كدة هنوصل لتطور الحكمة في الفصل الخامس، إزاي تفكر في الأشياء بمنظور مختلف وإزاي توصل لإنك تكون إنسان حكيم.

الفصل السادس بيناقش فكرة الذكاء العاطفي، إزاي تقدر تفهم نفسك وتقيم مشاعرك وإزاي تفهم مشاعر الناس وتقدر تتواصل معاهم وبعدين هتدخل على فصل قصير بعنوان تطور المشاعر الإيجابية وهو يعتبر إمتداد لفصل الذكاء العاطفي.

الفصل الثامن بقى خاص بالدين وتطور التجربة الدينية، الفصل ده بيعملك إنك لازم تشغل عقلك وتستخدمه علشان تفهم الدين بشكل سليم وتستفيد منه في حياتك.

وأخيرا الفصل التاسع والأخير وده بالنسبالنا كان من أكتر الفصول المفيدة والملهمة: تطور ما بعد الصدمة. كل واحد فينا أكيد ممكن يمر بصدمات نفسية أو مشاكل كبيرة في حياته، إزاي الشخص منا ممكن يبص لأزماته نظره مختلفة ويستغلها كبنزين بيحركه للأمام علشان يتطور.

وأخيرًا:

كتاب إنسان ما بعد التحديث واحد من الكتب المهمة الناجحة إللي تستحق القراءة فعلا وفي فترة قصيرة جدًأ اتباع منه آلاف النسخ ومن أفضل كتب الـself help إللي قرأناها مؤخرًا.

 

عجبك ؟ جرب

كيف تكون إنسانًا د. شريف عرفة

عن الكاتب

كاتب ومحاضر في علم النفس الإيجابي وفنان كاريكاتير. حاصل على ماجستير علم النفس الإيجابي التطبيقي وماجستير إدارة الاعمال تخصص إدارة الموارد البشرية وبكالوريوس طب وجراحة الفم والأسنان. تتصدر مؤلفاته قوائم الأكثر مبيعًا وقد تم تكريمه في عدد من الجامعات والمؤسسات الثقافية. فاز بجائزة تريم عمران وجائزة الكاريكاتير العربي، وتم ترشيحه لجائزة الصحافة العربية.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح