The Definitive Guide to Living in the Capital , Cairo , Egypt

كتب
إيروس

إيروس: كتاب عن العلاقات العاطفية على شكل رواية

  • أحمد هشام النبراوي
  • روايات
  • من الآن
  • عربي عربي
  • 35 EGP
  • مكتبات القاهرة
تم التقييم بواسطة
Shaymaa El Gammal
تقييمك
قيم الآن
إيروس: كتاب عن العلاقات العاطفية على شكل رواية

الكاتب أحمد النبراوي طبيب بيطري وبيحب بيكتب بالعامية، فلما لاقينا رواية اسمها إيروس (إله الحب والجنس عند الإغريق) وغلافها شكله يشد بصراحة أصبح عندنا فضول كبير إننا نشوف يا ترى هل هتكون بالعامية زي ما هو بيحب يكتب دائمًا، وهل هتكون كويسة؟

أول ما فتحنا الرواية لقيناها بالعامية زي ما توقعنا وما بقيناش عارفين نشجع فكرة إنه يبقى فيه روايات بالعامية ولا نحتفظ بفكرنا التقليدي اللي بيشوف إنه الرواية اتخلقت علشان تتكتب بالفصحى، فضلنا في الصراع ده في أول كام صفحنا في الرواية ولاقينا نفسنا بننسحب في القراية وبيتضحك علينا! الكتاب ده مراوغ جدًا في ظاهره رواية وفي باطنه كتاب Self Help عن العلاقات العاطفية! لعبة ذكية الصراحة وعلشان كده إحنا حابين نركز على فكرة إنه كتاب مفيد عن العلاقة بين المرأة والرجل أكتر من إنه رواية أو عمل أدبي.

الفقرة اللي جاية دي من مقدمة الكتاب بتعرفنا أكتر على الفكرة إللي بتقدمها الرواية:

“علشان تفهم بيولوجيا الإنسان تأمل الحيوان، وعلشان تفهم العلوم النفسية بطريقة أوضح تأمل حياة الحيوانات، والحيوان هو الشكل المبسط للتعقيدات الإنسانية وهو الشكل المجرد من أي تدخلات مادية ممكن يكون ليها عامل في الحكم الواضح على السلوك، للأسباب دي دراسة الحيوانات وتأملها بيخلينا نجاوب أو حتى نقرب من إجابة اسالة كتير ممكن تظهر بسيطة بس معرفتها هتخلينا نبص للدنيا بشكل مختلف ونتأمل بشكل مختلف. النظرة للإنسان بطريقة أخرى بتحليل ومقارنة طبيعة الحيوان بتخلينا نجاوب على غموض كتير في حياتنا وعلاقتنا”.

الكتاب بيغوص في أعماق النفس البشرية علشان يعيد رؤيتك -من خلال تأمل عالم الحيوان- لعلاقة الرجل والمرأة وبيناقش مواضيع زي الحب والغيرة والخيانة والجنس.

الرواية بتقدم معلومات جديدة بالنسبة لك لو إنت مش قارئ جيد في عالم الحيوانات كتير منها ممكن تكون بتعرفه للمرة الأولى، هتحس إنك بتتفرج على برنامج العلم والإيمان ولكن بشكل جديدة المرة دي لإنه بيربط سلوك الحيوان بسلوكك أنت شخصيًا.

د. أحمد اختار يسمي بطل الرواية آدم، اسم أول رجل على الأرض اللي بيمثل كل البشر  اللي بيحاولوا يسيطروا على غريزتهم الحيوانية بسبب الدين والمجتمع والعرف وبيعرفنا أكتر على الغرائز دي في 13 فصل .

من الأجزاء المسلية في الكتاب الجزء اللي بطل الرواية فيه بيقرر إنه يتحول لذكر الألفا وذكر الألفا هو أكتر ذكر في القطيع بيكون ليه أكتر نصيب من الأكل وأكتر عدد من الإناث.. بدأ “آدم” يرصد لينا تصرفات ذكر الألفا في الحيوانات ونظير التصرفات دي عند الراجل وفعلا هنلاقي إنه في البني آدمين كمان بنشوف نموذج للذكر الألفا فعلًا وهو الراجل اللي بيعرف يكسب فلوس كتير ويكون حواليه عدد كبير من الستات!

أجمل ما في الرواية دي فكرتها، وإزاي إنه طبيب بيطري قدر يستغل معلوماته ويقدمها في قالب روائي خفيف مسلي لأي حد ومناسب لأي قارئ مبتدئ.. الجميل في الرواية دي إنها كتاب في العلاقات العاطفية ولكن متقدم بشكل جديد.

عجبك ؟ جرب

كلب بلدي قط شيرازي لنفس الكاتب

عن الكاتب

دكتور احمد هشام النبراوي بيشتغل طبيب بيطري، له كتاب ساخر سابق يحمل اسم "كلب بلدي قط شيرازي" بيتكلم  عن المواقف اللي بيواجهها  الطبيب البيطري مع مربي الحيوانات الأليفة ، بالإضافة إلى بعض المعلومات العلمية عن الحيوانات.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح