The Definitive Guide to Living in the Capital , Cairo , Egypt

التطور العمراني

التطور العمراني: تعرف شوارع القاهرة من 100 سنة كانت عاملة إزاي؟

  • واقعية
  • من الآن
  • عربي عربي
  • 150 EGP
  • مكتبات الشروق ووسط البلد وبائعي الجرائد
تم التقييم بواسطة
Cairo 360
قيم
قيم الآن
التطور العمراني: تعرف شوارع القاهرة من 100 سنة كانت عاملة إزاي؟

“ياااه هي الشوارع فعلاً كانت كده… الله على الجمال والروقان” هو ده أول تعليق هـ يخطر على بالك أول ما هـ تمسك كتاب “التطور العمراني” وتشوف الصور الرائعة في الكتاب لشوارع مصر ومبانيها على مدار قرون، إزاي كانت كل حاجة مثالية، إزاي كان فيه نظام، وكان فيه حاجات كثير حلوة أوي ما عادتش موجودة دلوقت.

لكل حاجة تاريخ، للبشر، وللأماكن، والأحداث، كمان الشوارع لها تواريخ، ومؤرخين مهتمين أنهم يرصدوا أحوالها بين زمان ودلوقت، فتحي حافظ الحديدي، واحد من المؤرخين دول، حط خلاصة أبحاثه وتأريخه للشوارع في كتابه “التطور العمراني لشوارع مدينة القاهرة من البدايات حتى القرن الـ 21”.

الكتاب بـ يرصد أسماء الشوارع وأسباب تسميتها، وإزاي تغيرت الأسماء، والمساحات اللي كانت العقارات بـ تُبني عليها، وارتفاعها، والقواعد الرئيسية، وإزاي كثرة الورثة ضيعت مباني كثير، تمام زي الزيادة السكانية اللي ضيعت الدنيا، كمان بـ يرصد الأضرحة على الطرق القديمة لمدينة القاهرة، وإزاي مافيش معلومات رسمية كفاية عن شوارع مصر اللي هي في ذيل اهتمامات الحكومة، تغير اسمها وقت ما تحب، وبدون مناسبة، ويبقى الاسم المكتوب حاجة واللي الناس بـ تقوله حاجة وعك في عك.

الكتاب مش بس بـ يقدم معلومات عامة عن الشوارع لكنه كمان بـ يختار مجموعة شوارع يتكلم عنها بعينها دونًا عن غيرها زي شارع أحمد باشا، وشارع أحمد ماهر “تحت الربع” وشارع الألفي وشارع البستان “عبد السلام عارف”، وشارع محور شمال الجمالية، 56 شارع وميدان بـ يتكلم عنهم الكتاب بالتفصيل، لكن الروعة الحقيقية مش بس في الشوارع والمعلومات المميزة والنادرة عنها، لكن كمان في صور نادرة للشوارع.

الكتاب ده له حكاية غريبة، الدراسة مش جديدة، لكن نشرها جاء على مراحل، أول مرحلة كان عن الهيئة العامة للكتاب، وكان سعر الكتاب 10 جنيه بس، لكن علشان هو كتاب مميز ومهم، اختفى تمامًا، نظرًا لجودته وقلة سعره، الدار المصرية اللبنانية أعادت نشره بجودة أعلى كثير، لكن طبعًا السعر بقى أعلى كثير وصل لـ 150 جنيه، لكن خلينا نقول أن الكتاب مميز ومهم، كل مكتبة محترمة ما ينفعش تخلو من كتاب زي ده لأنه يعد مرجع، ويخلي الواحد ماشي في الشارع وهو فاهم ده ليه وده إمتى وده إزاي!

لو بـ تروح الجمالية ووسط البلد وما حولهم وبـ تبقى مبهور بالعماير المتهالكة وتحس أنها سر غامض، فالكتاب ده هـ يساعدك تعرف حاجات كثير جدًا جدًا.

عجبك ؟ جرب

"العمارة الإسلامية في مصر" إعداد علياء عكاشة، و"المساجد" للدكتور حسين مؤنس.

عن الكاتب

فتحي حافظ الحديدي كان في الأصل موظف في وزارة الأشغال العمومية، وهي الوزارة المعنية بتخطيط الشوارع وتسميتها ووضع حدودها الجغرافية والتوثيق لمبانيها القديمة والحديثة علي السواء، بالإضافة إلى تشييد المباني العامة وصيانتها، وده قبل ما تختفي الوزارة دي من خريطة وزارات الحكومات المتعاقبة على حكم مصر، واللي بقيت في النهاية وزارة "الري"!

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح