The Definitive Guide to Living in the Capital , Cairo , Egypt

رواية بـ تدور أحداثها فى 24 ساعة.. أبطالها مجموعة من
الناس متصلين ببعض بشكل مباشر وغير مباشر فى حبكة درامية جيدة، بـ تبدأ الأحداث فى
اليوم اللي قبل يوم انتخابات مجلس الشعب فى الدورة البرلمانية لـ2010، أول شخص بـ يظهر
فى الرواية هو أسامة خريج الهندسة المتفوق اللي عانى كثير فى رحلة البحث عن وظيفة
رغم تخرجه بتقدير عالي من كليته، أسامة منتمي لأسرة مصرية بسيطة وأبوه رمز الموظف
المكافح بشركة بترول، ربى أولاده باجتهاد وركز على تعليمهم وحرص على إبعادهم عن
السياسة وما فيها خوفًا عليهم، وعلشان كده كان من السهل عليه اتباع تعليمات
مديرينه بخصوص مشاركته هو زملاؤه فى قطاع البترول فى الانتخابات البرلمانية بوجوده
فى لجان الانتخابات ولعبه لدور المندوب عن وزير البترول اللي مرشح نفسه ومسخر قطاع
البترول بأكمله لصالح شخصه فى الانتخابات، خصوصًا بعد ما عرض مكافأة 8 شهور لجميع
العاملين المشاركين فى الانتخابات فى حالة فوز الوزير فى الانتخابات، ودي المكافأة
اللي داعبت آمال “أحمد” الموظف بنفس الشركة علشان يقدر يتجوز
“ليلى” خطيبته لدرجة أنه ما فكرش ولا تردد فى الدور غير النزيه اللي بـ يقوم
به بسلامة نية كمندوب لصالح الوزير فى الانتخابات من تزوير ومخالفات قانونية كبيرة
فى العملية الانتخابية.

أشرف موظف بنفس شركة البترول قرر ما يشاركش فى العملية
الانتخابية لتأكده أنها هـ تنتهي لصالح الوزير سواء شارك أو لأ، ولا اهتم بأمر
المكافأة خصوصًا أنه بـ ينتمى لأسرة غنية، بـ تصادف أنه فى ليلة الانتخابات بـ يحضر
مع خطيبته حفلة خطوبة “نانسي” صديقتهم بنت رجل الأعمال فاحش الثراء اللي
أنفق ببذخ على الاحتفال وأقام ليلة أسطورية التكاليف علشان تليق بمقام المدعوين من
كبار رجال الدولة وفنانين ومشاهير واللي كان بينهم وزير البترول شخصيًا مما دفعه أكثر
لعدم المشاركة فى الانتخابات بسبب مشهد الوزير الواثق من نفسه فى ليلة مفترض أنها
عصيبة زي دي.

تصاعد الأحداث وتداخلها فى الرواية تم بشكل بارع وأظهر وجسّد
نماذج مختلفة من الواقع زي صورتين مختلفتين لضابط الشرطة الشريف والفاسد، وسواق
التاكسي الشهم والصحفية الشجاعة وغيرهم، وأجمل حاجة فى الرواية طريقة السرد وتتابع
الأحداث بشكل مشوق يخلي القارئ مشدود من أول الرواية لآخرها ودعّم ده كمان أن
الرواية مستوحاة من أحداث كثيرة حصلت فى الواقع تم سردها فى سياق درامي رائع، زي
وقائع تزوير الانتخابات وأحداث اشتباكات الأمن مع أقباط العمرانية.