The Definitive Guide to Living in the Capital , Cairo , Egypt

المجموعة بـ تتكون من 10 قصص منها: “الروح الحلوة لدون داميان، والمحارب والأسير، والمراقبون، وسيدة، والكنز، والخاتم، وكليوتيده”.        
ومن بين القصص اللى بـ تحرك المشاعر قصة الروح الحلوة “لدون داميان” هى حكاية روح قررت أنها تفارق جسد صاحبها، معلش يا جماعة كلنا لها، والجسد ده لواحد اسمه “دون داميان” بـ يمر بسكرات الموت وهـ نعرف حكايته عن طريق روحه اللى ما قدرتش تستحمل درجة حرارته العالية واللى حست أنها لو صبرت شوية هـ تتحرق فـ قررت الانسحاب ولعبت دور المتفرج والحاكى فى نفس الوقت، المشهد كان عبارة عن سرير يرقد عليه جثة “دون داميان” والخادمة العجوز اللى بـ تبكى بمرارة، والحماة، والزوجة الشابة.
الروح عارفة كل واحد فيهم بـ يفكر فى إيه بالضبط وهى كمان شايفاهم وسامعاهم، الروح بـ تحكى عن كل واحد فيهم، عن الخادمة اللى حبته وخدمته بإخلاص 40 سنة وعن قصة زواجه من شابة صغيرة وإزاى الزوجة ما كانتش حزينة على موت زوجها لغاية ما أمها لفتت نظرها. الروح لسه بـ تتفرج لغاية ما بـ ييجى القسيس اللى ما حدش عارف هو جاء ليه وهو بـ يبرر ده أنه جاء علشان الاعتراف وهنا الخادمة صوتها بـ يعلى وتقول: “يعترف بإيه هو روحه كانت حلوة” وهنا بـ تفكر الروح ولأول مرة هى فعلاً حلوة ويا ترى هـ ترجع ثانى لدون داميان ولا إيه!
هاه دخلتوا فى جو المجموعة ولا لسه؟ طيب اعرفوا معانا إيه هى قصة “الخاتم” لإيلينا جارو “المكسيك” واللى لسان حالها بـ يقول “قليل البخت يلاقى…” وطبعًا كلنا عارفين بقية المثل وأنت بـ تقرأها هـ تفتكر فيلم لـ” إسماعيل ياسين” لما لقى الفانوس السحرى بس الفانوس كان وشه حلو على إسماعيل ياسين أما الخاتم فكان وشه وحش قوى على كاميلا الست الفقيرة قوى ربت أسرة لا تملك أى شيء حتى الأرض اللى كانوا بـ يزرعوها راحت منهم بالقوة علشان يبنوا عليها نادى لصيد الحمام.. والحكاية دي راح فيها ابنها الكبير، أما عن حكاية الخاتم كاميلا كانت خارجة فى يوم على باب “الله” شافت الخاتم مرمى على الأرض أهديته لابنتها الكبيرة سيبيرينا ويا ريتها ما أخذته.