The Definitive Guide to Living in the Capital , Cairo , Egypt

حضرتك تعرف إيه عن البوكر؟

أعرف أنها جايزة حلوة

تمام… البوكر حضرتك بقيت واحدة من أهم الجوائز في العالم العربي، واللى أخذها من مصر الروائي يوسف زيدان عن رواية "عزازيل".

أها.. طيب عاوز اقرأ حاجة كسبت جائزة البوكر.

إيه رأيك تقرأ رواية الطلياني اللى أخذت بوكر 2015؟

يا سلام.. طبعًا.

تمام.. خلينا نحكي لك عنها شوية.

شكرى المبخوت:

الأول لازم أكلمك عن شكرى صاحب الرواية، ولد عام 1962 وهو أديب وناقد تونسي معروف حاصل على دكتوراة الدولة في الآداب من كلية الآداب بمنوبة ورئيس جامعة منوبة وشغل سابقًا عمادة كلية الآداب والفنون والإنسانيات في نفس الجامعة.. صدر له مجموعة روايات وكتب منها سيرة الغائب، ونظرية الأعمال اللغوية.

الطلياني:

دلوقت هـ نكلمك بقى عن بطل الرواية عبد الناصر الطلياني، شاب يسارى بـ يجمع متناقضات عجيبة، نشأ في تونس وهو اشتراكي النزعة بـ يحب الاشتراكية والفقراء وبـ يدافع عنها بكل قوة، تفهم من الرواية أنه ملحد غير مؤمن بدين، لكن داخل العمل هـ تفهم أنه شخصية واعية ومؤمنة بحق الجميع في العيش، ويمكن ده اللى يتاخد على شكري أنه الرواية شوية رميت بفكرة الإلحاد في نص الرواية علشان هو اشتراكي فـ يبقى ملحد (متلازمة يعني) مع أن فيه اشتراكيين مسلمين ومؤمنين عادي، بل وفيه اللى خلى الاشتراكية فيها من تعاليم الإسلام كمان، المهم أهله بـ يعتبروه نبت شيطاني خارج عن العائلة وهي العائلة المحافظة اللى فيها الأخ الأكبر الاقتصادي المعروف والشهير وصاحب السفريات خارج البلاد أغلب الوقت، وفيها الأب الكبير صاحب المكانة المرموقة، واللى بـ يموت في أول الرواية لكن سيرته موجودة في الفلاش باك.

الفلاش باك:

نسينا نقول لك أن خاصية الفلاش باك اللى بـ يستخدمها المبخوت قادرة تخليك تعيش في كذا حدث في نفس الوقت، قادرة تفهمك ليه عبد الناس متغير عن عائلته، وإزاي نشأ، وكمان الراوي في الرواية ذكي وبـ يشوف اللى بـ يحصل هو راوي عليم لكنه مجهول بـ يحكى من وراء ستارة وأنت مش عارف هو مين، وده أعطى طعم مختلف للرواية، أما السر بقى فـ اتكلم براحتك أنت ممكن تلاقي نفسك قاعد تقرأ مخلص أول 100 صفحة في الرواية وأنت مش حاسس من السرد الجميل والهادئ والسلس ودي قدرة مش عند أي حد، وأعتقد أن دي كمان سبب مهم في أنه كسب جائزة البوكر.

الرواية:

يمكن من الحاجات اللى هـ تشوفها صعبة وأنت بـ تقرأ المصطلحات اللى في الأول واللى بـ تبان في نقاشات عبد الناصر الاشتراكي وأخوه الأكبر الرأسمالي والخبير الاقتصادي.. فـ هـ تلاقي مصطلحات عن سياسة التكييف الهيكلي للاقتصاد، والتدخل الإمبريالي، والسياسة الليبرالية، والتموقع في الفضاءات الاقتصادية، والشعبوية، لكن دي برضه من نسيج الرواية لأنها باختصار بنت الرواية ومن واقعها، وهو ده كلام الاشتراكيين والخبراء الاقتصاديين، وما كانش ينفع يغير فيه.

باختصار لو عاوز تعرف أحوال تونس قبل بورقيبة وبعده في فترة التسعينيات وما بعدها اقرأ الطلياني، ماشي، موافق، طب يلا بقى، سلام.